شخصيتون ۽ خاڪا

حالات زندگي حضرت مولانا عبدالڪريم لغاري

هن ڪتاب ۾ حضرت مولانا عبدالڪريم لغاري رحمة الله عليه جي حالات زندگي، علمي، ادبي، اصلاحي، سماجي خدمتن جو سرسري جائزو پيش ڪيو ويو آهي.
Title Cover of book حالات زندگي حضرت مولانا عبدالڪريم لغاري

تصنيف و تاليف:

حضرت مولانا عبدالڪريم لغاري جي زندگي انتهائي مصروف گذري، جنهنڪري کين تصنيف و تاليف جو موقعو بنهه گهٽ مليو. جيڪڏهن کين درس و تدريس، قديم و جديد تعليمي ادارن جي تعمير و ترقي ۽ ديک ڀال، سماجي ڀلائي جي ڪمن ۽ خدمت خلق جهڙن ڪمن کان فارغ البالي جو موقعو ملي ها ته شايد پاڻ بيشمار علمي ادبي تصنيفون لکي علمي دنيا ۾ قابل قدر مواد مهيا ڪن ها، جيڪو يقيناً اهل علم ۽ ادب دوست حضرات لاءِ نهايت مفيد ثابت ٿئي ها. پر پوءِ به انهي پهلو کي صفا خالي نه ڇڏيائون. ديني مدرسن ۾ رائج درس نظامي جي لحاظ کان سندن يادگار ٽي تاليفات آهن جيڪي دارالعلوم ديوبند ۾ پڙهڻ دوران، استادن جي شرح و بيان کي ترتيب ڏيئي لکيون اٿن. سي هي آهن.
1) حديث جي ڪتاب ترمذي شريف جو شرح (غير مطبوعه)
2) حديث جي ڪتاب مشڪوات شريف جو شرح (غير مطبوعه)
3) عربي ادب جي مشهور ڪتاب ديوان متنبي جو شرح (غير مطبوعه)
علاوه ازين سنڌي ادب جي حوالي سان سندن ڪجهه تصنيفون شايع ٿي چڪيون آهن ۽ ڪجهه اڻ ڇپيل آهن. شايع ٿيل تصنيفون ادبي دنيا۾ داد حاصل ڪري چڪيون آهن، جيڪي پاڻ ذاتي خرچ تي ڇپائي پڌريون ڪيائون.