پبلشر نوٽ
اڄ جڏهن دنيا جي مٿان حڪمراني ڪندڙ ٽولا، بغاوت، سياسي ڏاڍ مڙسي ۽ انقلاب کي رد ڪندي دنيا ۾ امن ۽ سلامتيءَ لاءِ فرد جي آزادي ۽ آزاد اقتصاديات کي ڇوٽڪاري جو سبب ڄاڻائي رهيا آهن ۽ عددي جمهوريت کي انساني مسئلن جي حل لاءِ ڪافي سمجهيو وڃي ٿو ته اهڙي صورتحال ۾ هڪ بنيادي سوال سامهون اچي ٿو ته ڇا دنيا جي فردن ۽ قومن واسطي نجات سياسي ڏاڍ مڙسي (Polilical Violence) بغاوت ۽ انقلابن ذريعي ڪرڻ ضروري آهي؟ ان حوالي سان اسان کي سياسي ڏاڍ مڙسي، بغاوت ۽ انقلاب جي سٽاءَ کي سمجهڻ جي ضرورت آهي. هن ڪتاب ۾ کنيل سوال ته ”ماڻهو بغاوت ڪڏهن ۽ ڇا لاءِ ڪن ٿا؟“ سان ئي هتي هي سوال اُٿل کائي سامهون اچي ٿو ته ماڻهو سياسي بغاوت، سياسي زورآوري ۽ انقلاب سان ڇو سلهاڙجي بيهن ٿا. ان جا محرڪ فطري آهن، حالتن جي پيداوار آهن يا ڪجهه عنصرن جي پاران پيدا ڪيل آهن. اهڙن ڪيترن سوالن جا جواب هي ڪتاب ٻڌائي اسان کي انقلابن جي ڪيميسٽري سمجهڻ ۾ مددگار بڻجي ٿو.
هينئر جڏهن پاڻ ويهين صدي کان اڳتي وڌي ايڪويهين صديءَ جي ٻين ڏهاڪي ۾ وک وڌائي رهيا آهيون ته ڇا اڄ به بغاوت، انقلاب ۽ سياسي ڏاڍ مڙسيءَ جي حيثيت عمل لائق ڏسڻ ۾ اچي ٿي، هي مطالعو ان لاءِ اسان جي ذهن سازيءَ کي سهنجائي مهيا ڪري ٿو. هن ڪتاب جي چونڊ سنڌ جي لاءِ سوچيندڙ ۽ لوچيندڙ شخصيت نامياري ليکڪ سيد مومن علي شاهه صاحب ڪري، اسان کي ان جي ترجمي لاءِ اتساهيو. اسان سيد مومن علي شاهه ۽ ڪتاب جي سنڌيڪار محترم امان الله شيخ جا ٿورائتا آهيون.
نور احمد ميمڻ
چيئرمين
سنڌيڪا اڪيڊمي