اُٿو اُميد جو پيغام ڏيو وڌندا هلو يارو
سَلامت قافلو پنهنجو رکو هلندا هلو يارو
مِٺي آ ديس جي مِٽي جيئاري ٿي جيئاريندي،
مِٽيءَ سان نينهن جو ناتو رکي نچندا هلو يارو
اسان جي واٽ ۾ ويري وڏا مقتل سَجائن ٿا،
ڀَري باهيون بَدن ۾ مَچَ ٿي مَچندا هلو يارو
حياتي گهورڻي ناهي حياتي گهارڻي آهي،
جيئڻ جا ڍنگ هر ڪنهن رنگ مان سِکندا هلو يارو
اچي ٿيندا سڀئي زاهد اسان جي ساٿ جا ساٿي،
مِٺن مارُن ميهارن سان مِٺا ملندا هلو يارو