سرمد عباسي ٻاراڻي ادب ۾ نواڻ آڻيندڙ ليکڪ: زاهد منگي

مون سميت ڪيترائي ليکڪ آهن جن لکڻ جي شروعات ٻاراڻي ادب کان ڪئي. ان زماني ۾ ٻارن لاءِ ڪافي رسالا ۽ اخبارون جا هفتيوار صفحا شايع ٿيندا هئا. جن ۾ ڪيترائي اديب لکندا هئا. تنهن هوندي به اها شڪايت عام هوندي هئي ته ٻاراڻي ادب تي ڌيان نه ٿو ڏنو وڃي. وڏا اديب ٻارن لاءِ نه ٿا لکن. وقت گذرڻ سان زماني جي ٻين شين ۾ جيئن بدلاءُ آيو تيئن ٻاراڻي ادب تي به اثر پيو. ڇپجندڙ رسالا بند ٿي ويا ته اخبارن به ٻارن لاءِ صفحا ڏيڻ بند ڪري ڇڏيا. ان وقت جا ليکڪ جڏهن پاڻ وڏا ٿيا ته انهن به ٻارن لاءِ ذري گهٽ لکڻ ئي ڇڏي ڏنو آهي. هن مهل ٻاراڻي ادب جي صورتحال ڪا گهڻي بهتر ناهي. نظم واري پاسي اڃان ڪجهه ڪم ٿئي پيو جو وقفي وقفي سان ڪتاب شايع ٿين ٿا. باقي نثر ۽ ان ۾ وري ڪهاڻيءَ واري پاسي ڏي ڪم نه هجڻ برابر آهي. ٻارن لاِءِ لکڻ به هڪ نرالو فن آهي. اهو جيترو بظاهر سولو لڳي ٿو اوترو ئي ڏکيو آهي. ڇاڪاڻ ته ليکڪ کي پڻ ٻار جي سطح تائين لهي اچڻو پوي ٿو. ٻار پنهنجي پتڪڙي دماغ ۾ ڇا ٿو سوچي. ان جي معصوم سوچن ۾ ڪهڙيون ڳالهيون اچن ٿيون. هو ڪهڙي ڳالهه دلچسپيءَ سان پڙهي يا ٻڌي سگهي ٿو. انهن سڀني شين جو ليکڪ کي خيال رکڻو پوي ٿو. اڄوڪي دور ۾ اها چيلينج اڃان وڌي وڃي ٿي. ڇاڪاڻ ته ماضي جي ڀيٽ ۾ اڄ جي ٻار وٽ تفريح جا ٻيا ذريعا اچي ويا آهن. ٽچ موبائيل فون ۽ ڪمپيوٽر جي اچڻ کانپوءِ ٻارن جي وندر جون ترجيحون به بدلجي ويون آهن. موبائيل فونن ۾ موجود ڪارٽون ڏسن سميت بي شمار گيمون ٻار وڏي شوق سان کيڏن ٿا. ايسيتائين جو ٻارن کان جسماني راند روند کيڏڻ به هلي وئي آهي. اهڙي ماحول ۾ ٻار کي ادب پڙهڻ لاءِ مائل ڪرڻ لاءِ لکڻيءَ ۾ به اها ڇڪ پيدا ڪرڻي پوندي جيڪا ٻار کي پاڻ ڏي ڇڪي. حاضر دور ۾ سوشل ۽ اليڪٽرانڪ ميڊيا جي جهجهي استعمال جو اثر ٻاراڻي ادب تي به پيو آهي. اهو ئي وڏو سبب آهي جو ٻاراڻو ادب هاڻي اڳ جيترو تخليق نه ٿو ٿئي. جن ليکڪن ٻاراڻي ادب کان لکڻ شروع ڪيو هيو. انهن مان ڪجهه ئي باقي آهن جيڪي اڃان تائين ٻار لاءِ لکي رهيا آهن. سرمد عباسي به اهڙن ليکڪن مان هڪ آهي. جيڪو ڊگهي وقت کان ٻارن لاءِ مستقل طور تي ڪهاڻيون لکي رهيو آهي. سرمد نه رڳو ڪهاڻيون لکي ٿو پر ان سان گڏ نئون تجربو ڪندي سنڌيءَ ۾ ٻارن لاءِ ”ڪارٽون ڪهاڻيون“ جي سري هيٺ سيريز لکي رهيو آهي. جيڪي دلچسپ هجڻ سان گڏ ٻارن جي اصلاح به ڪن ٿا، هو لکڻين ۾ سولي سادي ٻولي ۽ تشبيهون ڪتب آڻي ٿو جيڪي ٻار سولائي سان سمجهي سگهن ٿا. سرمد جڏهن پنهنجون اهي ٻاراڻيون ڪهاڻيون ۽ ڪارٽون ڪهاڻيون فيس بوڪ تي شيئر ڪندو آهي ته ڪيترائي والدين کيس رايا ڏيندا آهن ته هو پنهنجن ٻارڙن کي سندس اهي ڪهاڻيون پڙهي ٻڌائن ٿا جيڪي اهي وڏي شوق سان ٻڌندا (پڙهندا) آهن. هن موجودهه سوشل ميڊيا جي يلغار سبب ٻارن جي بدليل ذوق ۽ مزاج کي نظر ۾ رکي سنڌيءَ ۾ ڪارٽون ڪهاڻين جو انوکو تجربو ڪيو آهي. سرمد ڪمال ڪاريگريءَ سان مشهور ڪارٽون ڪردارن ٽوم ۽ جيري کي به سنڌي بڻائي ڇڏيو آهي. جيڪا هڪ خوشگوار نواڻ آهي. جيڪڏهن ڪو ادارو انهن ڪارٽون ڪهاڻين کي سنڌيءَ ۾ فلمائي ته هوند ڏاڍو سٺو ٿي پوندو ۽ ٻارن کي پنهنجي ٻوليءَ ۾ ڪارٽون ڏسڻ لاءِ ملي ويندا. سرمد کي هڪ صلاح ته هو اها مشق جاري رکي يقينن سنڌي ٻاراڻي ادب ۾ سندس ان ڪم کي قدر جي نظر سان ياد رکيو ويندو.