ارائونڊ دي ورلڊ

سنڌ سلامت پاران

سنڌ سلامت ڪتاب گهر پاران نامياري سفرنامانگار ۽ مئرين انجنيئر الطاف شيخ جو مصر، ڊينمارڪ، ڪئناڊا، آمريڪا، جپان، ناروي، سريلنڪا ۽ ٻين ملڪن بابت لکيل سفرنامو ”ارائونڊ دي ورلڊ“ اوهان اڳيان پيش آهي.
الطاف شيخ جو هي ڪِتاب سندس شروع جي ڪجهه ڊگهن سامونڊي سفرن جو آهي جيڪي هن ڪراچيءَ کان ڊئنمارڪ ۽ ناروي تائين ۽ عربي سمنڊ، هندي وڏو سمنڊ، ائٽلانٽڪ سمنڊ ۽ ڪئريبئن سمنڊ لتاڙي آمريڪا جي بندرگاهن بالٽيمور، نيويارڪ ۽ ويسٽ انڊيز جي ٻيٽن تي پھتو. ۽ ٻئي طرف خليج بنگال، ڏکڻ چيني سمنڊ ۽ پئسفڪ سمنڊ لتاڙي جپان جي بندرگاهن ۾ پھتو. ان کان علاوه بحر احمر (ڳاڙهو سمنڊ) لتاڙي مصر ۽ سئيز ڪئنال ۽ ميڊيٽرينين سمنڊ لتاڙي لنڊن ۽ لورپول، راسٽڪ (ايسٽ جرمني) جھڙن بندرگاهن ۾ جھاز کي لنگر انداز ڪيو ٿي. ان کان علاوه هن ڪِتاب ۾ ڪولمبو (سري لنڪا) ۽ چين جي بندرگاهن جو پڻ احوال آهي.
هن ڪِتاب جو مُهاڳ هِدايت بلوچ ۽ حميد سنڌيءَ لکيو آهي ۽ هن ڪِتاب جون هيستائين چار ايڊيشن نڪري چڪيون آهن. حميد سنڌي هي سفرنامو پڙهڻ بعد الطاف کي ڪولمبس سڏي ٿو. ”هي سفرنامو ننڍين ڪھاڻين جي ڪڙين کي ملائيندي هڪ تحقيقي تاثر ڇڏي ٿو. پوري ڄاڻ حاصل ڪرڻ ۽ ان کي ڀرپور انداز سان پڙهڻ تائين پھچائڻ هڪ وڏو فن آهي جنھن ۾ الطاف ڀڙ ٿو ڏسجي. جيتوڻيڪ سندس پھريان سفرناما حياتيءَ جي ڪن رخن کان خالي ٿا ڏسجن. پر هن سفرنامي ۾ سندس نظر چوڌاري ۽ گَھِري آهي.“
هن ڪتاب جو پهريون ايڊيشن 1979ع ۾ سنڌي اڪيڊمي طرفان،
ٻيو ايڊيشن 1982ع ۾ سِيگل پبليڪيشن طرفان، ٽيون ايڊيشن نومبر 1992ع ۾ ۽ چوٿون ايڊيشن 2000ع ۾ نيو فيلڊس پبليڪيشنس، حيدرآباد طرفان شايع ڪيو ويو. ٿورائتا آھيون سائين الطاف شيخ جا جنھن ھن ڪتاب جي نئين سر ڪمپوزنگ ڪرائي ڪاپي سنڌ سلامت ڪتاب گهر ۾ اپلوڊ ڪرڻ لاءِ موڪلي.


محمد سليمان وساڻ
مينيجنگ ايڊيٽر ( اعزازي )
سنڌ سلامت ڊاٽ ڪام
sulemanwassan@gmail.com
www.sindhsalamat.com
books.sindhsalamat.com ڪتاب جو مطالعو ڪريو