هوا تي لکيم ڪهاڻي هڪ،
توکي پائڻ جي خواهش،
هُئي يار! نماڻي هڪ.
هوا تي لکيم ڪهاڻي هڪ.
خوشبو ٿي نه مهڪي سگهي،
اهڙي رات جي راڻي هڪ.
هوا تي لکيم ڪهاڻي هڪ.
تحرير منهنجي ٿي نه سگهي،
ڪنهن جي اک جو پاڻي هڪ.
هوا تي لکيم ڪهاڻي هڪ.
مون پاڻ اڙائي هئي توسان!
دل ڄاڻي واڻي هڪ.
هوا تي لکيم ڪهاڻي هڪ.
پابندين جا پهاڙ ڪريا،
نياڻي هئي ساماڻي هڪ.
هوا تي لکيم ڪهاڻي هڪ.
ذهن جي گهاٽي وڻ مان،
ياد اٿم ڇاڻي هڪ.
هوا تي لکيم ڪهاڻي هڪ.
الاءِ ته ڪهڙي ڪاڪ تي،
مومل اٿم ماڻي هڪ.
هوا تي لکيم ڪهاڻي هڪ.