سوچون ۽ خيال: ”حقيقت/ سچ جو سفر ۽ عباس سارنگ“

ذهن ۾ سوال اڀريو ته حساس ۽ حساسيت ڇا آهي؟ حساس ماڻهو ان کي چئجي ٿو جيڪو طبيعت ۾ نفيس ۽ نازڪ هجي. الائي ڇو ان جواب تي پاڻ کي مطمئين نه پيو ڀانيان ۽ سوال جي جواب جي ڳولا ۾ ذهن مان پنهنجي رت کي ڊوڙائيندي آخر هن خيال سان مطمئين ٿيو آهيان ته حساسيت اها آهي ته جيڪڏهن ڪو ماڻهو حساس آهي ۽ جلدي پنهنجي احساسن سان گڏ ٻين جا به احساس ۽ محسوسات کي سمجهي ۽ ان تي سوچڻ لڳي ۽ ان جي ترجماني ڪرڻ جي ڪوشش ڪري ته اها ئي حساسيت آهي. شعور جي دڳ تي پنڌ سکڻ جي ڪوشش ۾ منهنجي هٿڙن کي اڪثر حساس ماڻهن جون ئي آڱريون مليون آهن ۽ اڄ به جن جون آڱريون جهلي پنڌ ڪرڻ جي ڪوشش ۾ آهيان. انهن مان هڪ آڱر عباس سارنگ جي آهي. جنهن ڪڏهن به ڪٿي به منهنجو هٿ نه ڇڏيو آهي، هن منهنجي طبعيت کي جيترو سمجهيو آهي شايد ئي ڪنهن ٻئي سمجهيو هجي. هو چڱي ريت ڄاڻيندو آهي ته مان هڪ شاعر آهيان ۽ عباس سارنگ هڪ سٺو ڪهاڻيڪار آهي ۽ کيس اها به ڄاڻ آهي ته آئون ڪهاڻي جي ڪاف مان به نه ڄاڻان پوءِ به جڏهن ڪا نئين ڪهاڻي لکندو آهي ته پهريان مون کي ئي پڙهڻ لاءِ ڏيندو آهي ۽ عباس جي ڪهاڻي پڙهندي هر ڀيري سان پنهنجي ذهن ۾ زلزلو ئي محسوس ڪيو اٿم. ايڏو ڪڙو سچ ۽ ايڏي تلخ حقيقت نگاري، ڇا اسان جا ترقي پذير ماڻهو ان کي قبوليندا؟ اهو سوچيندي هڪدم ڪنهن دوست جا چيل لفظ ياد اچي ويندا آهن ”هميشه سچ لکندو رهه ڇو ته سچ پاڻ مڃائڻ جو هنر ڄاڻيندو آهي.“
هڪ ڀيري عباس سارنگ جي ڪهاڻي ”فرشتو“ پڙهي ڪري اهو سوچڻ لڳس ته ڇا ايڏي ڪڙي سچائي اسان جو معاشرو ڪهاڻي جي ويس ۾ قبوليندو؟ اڄ ان سوال جو جواب مون کي ملي رهيو آهي جڏهن عباس جي نئين ڪتاب ۾ اها ڪهاڻي شامل ڏٺي اٿم. ڪهاڻي اثرائتي ۽ ڪارائتي اها هوندي آهي جنهن ۾ معاشري جي خامين تي طنز ٿيل هجي ۽ هن جي ڪهاڻين ۾ اهي گڻ ملن ٿا. عباس سارنگ پنهنجي ڪهاڻين ۾ سچ ئي اوتيو آهي. جنهن جي سچائي جو وڏو دليل اهو آهي ته ان جي ڪهاڻين جا ڊائيلاگ ڪڙا ۽ تلخ آهن. مان عباس جي لاءِ ايترو چوندس ته هن اسان جي معاشري جي لڪل حقيقتن کي پنهنجي ڪهاڻين ۾ ننگو ڪري اهو محسوس ڪرائڻ چاهيو آهي ته اسان ڪيترائي سچ ڍڪي ڪري لاشعور جي اونداهي ۾ اڇلائي ڇڏيا آهن.
سنڌي ادبي سنگت جيڪب آباد، نوجوان ڪهاڻيڪار عباس سارنگ جو ٻيو ڪهاڻي ڪتاب ”مقدس مٽي“ ڇپرائي کيس مڃتا ڏني آهي ۽ سنگت جيڪب آباد انهي دڳ تي هلي رهي آهي، جيڪو هن جي وڏڙن ورتو. سنگت جيڪب آباد هميشه پبليڪيشن کي خاص اهميت ڏيندي رهي آهي. ان جو ثبوت عباس سارنگ جو هي ڪهاڻي ڪتاب آهي. اميد جنهن سچائي ۽ نفاست سان عباس سارنگ محنت ڪئي آهي اها مڃتا ضرور ماڻيندي.

عمران جمالي
3444877-0313

ڪھاڻيون

مقدس مٽي