شادي:-
پروفيسر محبوب علي چنا جي شادي، سيوهڻ مان عبدالله ڪوريجو جي گهر مان 5 مئي 1941ع تي ”زرينه“ سان ٿي. ان وقت پاڻ اڃا انٽر جي تعليم حاصل ڪري رهيا هئا. سندن گهر واري پنج درجا سنڌيءَ جا پڙهيل هئي،هوءَ هنرمند ۽ بااخلاق عورت هئي. هن پنهنجي وَرَ، محبوب جي دل و جان سان خدمت ڪئي، ڇاڪاڻ ته کيس احساس هو ته هن با عمل ۽ تعليمي ماهر جون مصروفيتون زياده آهن جنهن ڪري سندن لباس، کاڌي پيتي ۽ صحت جي حوالي سان کيس سموريون سهولتون ميسر ڪري ڏيندي هئي. سندن گهر واري هر ڏک سک جي دوران ساڻس ڀرپور ساٿ ڏنو، محبوب علي چنا ۽ سندس گهر واريءَ جي والدانه شفقت ۽ تربيت جو اثر، سندس اولاد تي پڻ پيو، پنهنجي گهر واريءَ کي پيار مان ڪڏهن ڪنوار جي نالي سان به سڏيندا هئا ۽ سندس گهر واري کين کي ”محبوب سائين“ جي نالي سان پڪاريندي هئي، سندس گهرواري 1985ع ۾، حيدرآباد لطيف آباد ڇهين نمبر گهر ۾ وفات ڪئي، کين لطيف آباد واري ڪينٽومينٽ قبرستان ۾ دفنايو ويو. (1)