ساجن توکي ساريان ويٺو،
آب اکين مان هاريان ويٺو،
تنهنجا سپنا، تنهنجي محبت،
تنهنجي الفت، تنهنجي چاهت،
ساٿي آءٌ سنڀاريان ويٺو،
ساجن توکي ساريان ويٺو،
تنهنجي هستي دل تي ڇانيل،
پيچ آ پختو توسان پاتل،
ڳڻتي ۾ من ڳاريان ويٺو،
ساجن توکي ساريان ويٺو،
ساٿي آيا هيل سيارا،
ڪين آئين تون مونڏي پيارا،
تنها تنها گھاريان ويٺو،
ساجن توکي ساريان ويٺو،
پُوھ جو پارو مونکي ساڙي،
رت بسنتي ٿي روئاري،
جھولن ۾ ته گذاريان ويٺو،
ساجن توکي ساريان ويٺو،