سنڌي لينگويج اٿارٽي
سنڌي لينگويج اٿارٽي جو دفتر هن وقت سنڌ ميوزيم حيدرآباد جي ايراضي ۾ آهي. جو سندس مرڪزي دفتر جي عمارت ٺهي رهي آهي. اسان جڏهن سنڌي لينگويج اٿارٽي جي چئرمين ڊاڪٽر نواز علي شوق جي آفيس ۾ وياسين ته هن وڏي قرب مان اسان کي ڀليڪار چئي. صابر صاحب سان هن جي اڳ به ملاقات هئي حال احوال وٺندي چانهه اچي وئي. ڊاڪٽر علي نواز شوق اسان کي اداري جي ڪم بابت ڄاڻ ڏيندي چيو ته هي ادارو مختلف عنوانن تي پنجويهه ڪتاب ڇاپي چڪو آهي. هڪ رسالو خبرنامو ماهوار جاري ڪيو آهي. سيمينار، ورڪشاپ ۽ سنڌي اديبن، شاعرن يا استادن سان رهاڻيون به ڪرائي ٿو.
ڊاڪٽر صاحب اداري بابت ٻڌايو، سنڌي ٻولي ۽سنڌي رسم الخط جي ترقي لاءِ اڄ کان چار سال اڳ “ سنڌي لينگويج اٿارٽي” جنهن کي سنڌي زبان جو بااختيارادارو جي نالي سان به سڃاتو وڃي ٿو. قائم ڪيو ويو.
هن اداري جو بنيادي مقصد سنڌي زبان کي دفتري زبان بڻائڻ ۽ سنڌي زبان جي واڌاري لاءِ تحقيق ڪرڻ ۽ رسم الخط کي صحيح صورت ڏيڻ سان گڏ سنڌي زبان بابت نئين تحقيقات بابت رسالا ۽ ڪتاب ڇاپڻ کان سواءِ سنڌي زبان پڙهائيندڙ استادن جي تربيت،سنڌي ٽائيپ رائيٽر ۽ ڪمپيوٽر ۾ سنڌي ٻولي کي شامل ڪرڻ آهي. ان سان گڏ سنڌ شناسي بابت هڪ ڊگهي پروگرام تي ڪم ڪري رهيا آهيون.
هن موقعي تي ڊاڪٽر نوا ز علي شوق اسان کي شاهه عبداللطيف ڀٽائي جو رسالو ۽ ڊاڪٽر داد محمد خادم جو نئون ڇپيل ڪتاب “سنڌي براهوئي ٻولين جو تقابلي جائزو” سوکڙي طور ڏنا.
ڪتابن واري سوکڙي کان پوءِ اسان ڊاڪٽر نواز علي شوق کان موڪلائي، حيدرآباد جي بازار گهمڻ وياسين. ان دوران مونکي ياد آيو ته منهنجو ٽي وي جي دور جو دوست ۽ ٽي وي پروڊيوسر اختر ٽالپر حيدرآباد نيوز بيوروو جو انچارج آهي. ماڻهن کان پڇندا نيوز بيورو جي آفيس ۾ پهتاسين. اختر ٽالپور اسان کي ڏٺو ته حيرت ۾ پيو ته حيدرآباد ڪيئن آيا آهيون. ڀليڪار کان پوءِءَ حال احوال ٿيا. اختر ٽالپور منهنجي انهن دوستن مان آهي. جو 1986ع ۾ پاڪستان اڪيڊمي اسلام آباد ۾ چئن مهينن جي ٽريننگ ڪئي. ٽريننگ دوران مان ۽ اختر ٽالپور هڪ ڪمري ۾ رهندا هياسين. ڏاڍو سهڻو وقت گذاريوسين. حال احوال کان پوءِ سندس ٽيليفون تان مون گهر ڪوئٽا فون ڪئي. گهر علائقي جو حال احوال ورتو معلوم ٿيو ته ڪوئٽه ۾ ٿڌ ۽ مينهن سان گڏ ڪجهه برف باري به هلي ٿي. جڏهن ته حيدرآباد ۾ گرمي جي ڪري دل ڏڪي پئي. اختر ٽالپور اسان لاءِ ماني جو بندوبست ڪيو. مزيدار مڇي ترائي. ماني کائڻ کان پوءِ پروگرام ٿيو ته ڀٽ شاهه هلون. ڪلاڪ کان پوءِ اسان ڀٽائي سائين جي درگاهه ۾ پهتاسين.