تاريخ، فلسفو ۽ سياست

شڪارپور تاريخ جي آئيني ۾

ڪتاب ”شڪارپور تاريخ جي آئيني ۾“ اوهان اڳيان پيش ڪجي ٿو جنهن جو ليکڪ نقش ناياب منگي آهي. هن ڪتاب جي تحقيق ۽ سهيڙ نوجوان شاعر ۽ ليکڪ محترم حسيب ناياب منگي ڪئي آهي.
جيتوڻيڪ اڄ به شڪارپور جا تاريخي اهڃاڻ ماضيءَ جي حسين داستانن جي نموني طور موجود آهن.ڪنهن به ليکڪ ۽ باشعور طبقي لاءِ پنهنجي شهر توڙي علائقي جا قديم آثار پنهنجي گهر جيان پيارا ۽ عزيز آهن، سائين نقش ناياب منگي جي به پنهنجي شهر شڪارپور سان محبت ۽ انس جو اندازو سندس هن ڪتاب ۾ شامل تحريرن مان لڳائي سگهجي ٿو. جنهن ۾ شڪارپور جي تاريخي ورقن ۾ موجود خاص طور مختلف دورن ۾ شهر جي عروج ۽ زوال جو مختصر ذڪر پڻ جامع نموني سان بيان ڪرڻ جي ڪوشش ڪئي وئي آهي.
Title Cover of book شڪارپور تاريخ جي آئيني ۾

شڪيل “فائق” هَڪڙو

شڪيل “فائق” هَڪڙو ولد مير محمد هَڪڙو، شڪارپور شهر جي اُسرندڙ ليکڪن مان آهي. صحافت ۽ سياحت سندس محبوب مشغلن مان آهن. شاعري جي عملي ميدان ۾ سندس غزل ۽ نظم پسنديده صنفون آهن. جڏهن به شاعريءَ جي ديوي ساٿ ٿي ڏئيس ته آڱرين جي ڏوڏن تي شعر جي تقطيع ڪري غزل يا نظم چئي خوشي وچان نٿو ماپي. هڪ ڀيري منهنجي ذاتي فرمائش تي “شهر شڪارپور” تي ويٺي ويٺي هڪ سندر ڪويتا کي جنم ڏنائين، انجو روپ ۽ رنگ ملاحظه ٿئي:

ناتو شڪارپور سان نروار آهي سائين،
هڪوار ڇا چوان مان سؤ وار آهي سائين.
ڪهڙي ڪري، ڪيان مان واکاڻ هن شهر جي،
تاريخ ۾ نمايان صد بار آهي سائين.
منهنجو شهر اَباڻو مشهور ڏيهان ڏيهه ٿيو،
ڏيساورن سان ان جو واپار آهي سائين.
دل ۾ دغا نه دوئي ماڻهن ۾ ماڻهپو آ،
قربت جو اُت اول کان وهنوار آهي سائين.
ساراه جي آ لائق منهنجي هي جنم ڀومي،
هر لفظ شاعري ۾ اظهار آهي سائين.
“فائق” لکي قصيدو بس حق ادا ڪري ٿو،
جو وڙ جڙي مثل هي ڪردار آهي سائين.