آمريڪا ڙي آمريڪا

سفرنامي جي لکت جو عروج

’امرتا پبليڪيشنز‘ پاران سائين الطاف شيخ جو پڌرو ٿيندڙ هي ڪتاب ’آمريڪا ڙي آمريڪا‘ چوٿون ڪتاب آهي، ان کان اڳ ۾ سندس ٽي ڪتاب ترتيبوار ’زنجبار جهنگٻار‘، ’نڪري ويا ناکُئا‘ ۽ ’چِين ڪيو بي چَين‘ پڌرا ٿي چڪا آهن. اسان جو ادارو پنهنجي لئه اها خوشبختي جي ڳالهه ٿو سمجهي ته سنڌي ٻوليءَ جي هن نامور ۽ يگاني ليکڪ جنهن جي لکت جو خاص ميدان ’سفرنامو‘ آهي، تنهن جا لاڳيتا ڪتاب ’امرتا پبليڪيشنز‘ جي پاران پڌرا ٿي رهيا آهن. اهو هُنن جو اسان مٿان اعتماد آهي. 

سائين الطاف شيخ، پنهنجي عمر جي 78هين سال ۾ آهن، ڌڻي کين وڏي حياتي ۽ صحت نصيب فرمائي، انهن سالن ۾ هُنن پنجانوَي سنڌي ۽ 13 اردو جا ڪتاب لکيا آهن، جن ۾ سفرنامن کي خاص اهميت حاصل رهي آهي. مطلب ته سائين الطاف شيخ پنهنجي ڪتابن جي سئنچري اسڪور ڪري چڪو آهي، پر سندس لکت واري چاهه کي سندس وڌندڙ عمر به روڪي ڪونهي سگهي ۽ پاڻ اڳي کان اڳرا ثابت ٿي رهيا آهن ۽ شيخ اياز جيان پنهنجي وقت جي هر گهڙي لکڻ پڙهڻ جي عشق ۾ گهاري رهيا آهن.

هيءُ مسلسل چوٿون ڪتاب آهي سائين الطاف شيخ جو، جيڪو مون ڇپجڻ کان پهرين پڙهيو آهي ۽ ڇپجي پڌرو ٿيل ڪتابَ پڙهڻ جو انگُ ته مون کي ياد ڪونهي، پر توهان الطاف شيخ جي ڪتابن يا سندس لکت سان منهنجي موهه جو اندازو ان ڳالهه مان لڳائي سگهو ٿا ته هي واحد ليکڪ آهي، جنهن جا ڪتاب مون پنهنجي اَيٽين ايج ۾ پئسا نه هجڻ جي صورت ۾ اوڌر تي به وٺي پڙهيا ها. هتي ڳالهه آءٌ اها چوڻ جي ڪوشش پيو ڪريان ته مون سائين الطاف شيخ کي مسلسل پڙهيو آهي ۽ اڄ منهنجي هن جي ڪتابن يا لکت بابت اها راءِ اچي بيٺي آهي ته موجوده وقت سائين الطاف شيخ جي ’لکت جي عروج‘ جو آهي، هاڻ هُنن پنهنجي لکت کي اهڙو ته پرفيڪٽ بڻايو آهي، جو هُو عام سفرنامن جيان رواجي سفري ڳالهيون نٿو ڪري، بلڪِ سفرنامن سان سلهاڙيل معلومات، ماضي، حال، مستقبل سان گڏ هڪ ريسرچر يعني محقق جيان تاريخ کي به پنهنجي لکت ۾ ضرور شامل رکي ٿو ۽ اها تاريخ رواجي محققن يا تاريخدانن جيان خشڪ يا نصابي ٻوليءَ واري ڪونهي، بلڪِ هڪ روان ۽ غيرروايتي انداز ۾ هجي ٿي، جيڪا پڙهندڙ کي بور يا بيزار قطعي نٿي ڪري، ساڳئي وقت وٽس سمجهاڻيون ڏيڻ لاءِ به ديسي مثال موجود آهن، مثال هن ڪتاب ۾ ئي هُو آمريڪا جي ندين نالن جي آسپاس موجود شهرن جي ڳالهه پنهنجن شهرن ڄامشورو، ڪوٽڙي، هالا، دادو، مورو جي مثالن سان سمجهائي ٿو، جن سان پڙهندڙن وٽ پڪچر بلڪل چِٽِي ۽ بنهه صاف شفاف ٿي سامهون اچي وڃي ٿي.

هن ڪتاب ’آمريڪا ڙي آمريڪا‘ ۾ سائين الطاف شيخ، آمريڪا ۽ ان جي شهرن، ندين نالن، سمونڊن، ماڻهن جي طبيعتن، سوچ و فڪر سميت هر پهلوءَ تي قلم کنيو آهي ۽ ڪتاب کي هڪ وڻندڙ سفرنامو هئڻ سان گڏ  تحقيق نامو يا تاريخ نامو بڻائڻ ۾ ڪا ڪَسَر ڪونهي ڇڏي. اهڙَي حَسِين ڪم تي ’امرتا پبليڪيشز‘ جو سمورو سَٿُ، سائين الطاف شيخ کي جَسُ ته ڏئي ئي ٿو، پر کيس مبارڪباد به پيش ڪري ٿو.

’امرتا پبليڪيشنز‘ پنهنجي پڙهندڙن جي به تمام گهڻي شڪرگذار آهي، جن هميشه اسان جي ڪتابن کي مانائتي موٽ ڏني آهي، پر سائين الطاف شيخ جي هر ڪتاب کي ته بنهه گهڻو ساراهيو به آهي ۽ دل سان خريد به ڪيو آهي. دعاڳو آهيون ته اوهان جتي به هجو، سُکيا هجو- آمين.

فقير محمد ڍول

آچر 15 مئي 2022ع 
امرتا ڇاپ گهر - حيدرآباد