آمريڪا جون ڪجهه وڌيڪ ڳالهيون...
• آمريڪا جو ٺوڙهو عقاب (Bald Eagle) يو ايس اي جو قومي پکي آهي. اڻاٺ ۾ هجڻ ڪري هن پکيءَ جي جنس کي سرڪار طرفان حفاظت مليل آهي يعني ’Protected Species‘ مان آهي ۽ هن کي مارڻ ڏوهه جو ڪم آهي.
• مَينھِن جھڙو هڪ جانور جيڪو آمريڪا ۾ ئي نظر اچي ٿو. جهنگلن ۽ ميدانن ۾ نه ته توهان کي ويسٽرن فلمن، ٻارن جي ڪھاڻين ۽ ڪارٽُونن جي ڪتابن ۾ ضرور نظر ايندو. اهو آهي ’بائسن‘ (Bison). يورپي، جڏهن هن کنڊ ۾ آيا ته پاڏي جھڙو هي جانور ڌڻن جي صورت ۾ گهمندو نظر آيو ٿَي. هتي جي اصلي رهاڪن ريڊ اِنڊين جو هن جانور تي گذارو رهيو ٿَي، پوءِ يورپ کان آيل ماڻهن هن جي خوب مار مارا ڪئي، ويندي ان خيال کان به ته جيئن ان جو انگ گهٽجي وڃي ۽ ريڊ اِنڊين بکيا مرن. آخرڪار بائسن جو تعداد ختم ٿيڻ واري حد تي وڃي پھتو. ان ڪري هاڻ هن کي پالڻ شروع ڪيو آهي. هاڻ هي جانور سرڪار پاران مقرر زمين يا خانگي وٿاڻن ۾ ئي نظر اچي ٿو.
• 18 سالن کان وڏي عمر جا آمريڪي شھري، ووٽ ذريعي سنئون سڌو ملڪ جو چئن سالن لاءِ صدر ۽ نائب صدر چونڊين ٿا. ملڪ جو صدر آمريڪا جي گاديءَ واري شھر واشنگٽن ڊي سي ۾ ٺھيل ’وائيٽ هائوس‘ نالي گهر ۾ رهي ٿو.
• آمريڪا جي صدر جي رهائش ۽ آفيس ’وائيٽ هائوس‘ نالي جنهن عمارت ۾ آهي، اها واشنگٽن ڊي سي جي پين سلوانيا روڊ تي آهي. هن ۾ جان آدم کان وٺي يعني 1800ع کان ملڪ جا صدر رهندا اچن. جان آدم 1797ع کان 1801ع تائين آمريڪا جو ٻيو صدر هو. ان کان اڳ آمريڪا جي پھرئين صدر جارج واشنگٽن جي رهائش ۽ آفيس فلاڊيليفيا ۾ رهي. ان کان اڳ آمريڪا جي گاديءَ جو شھر ۽ صدر جي رهائش نيويارڪ ۾ به ڪجهه عرصو رهي.
• آمريڪا (USA) جي وفاقي پارليمان کي ’ڪانگريس‘ سڏجي ٿو، جنھن جا ٻه قانون ساز ايوان آهن: ’ايوانِ نمائندگان‘ (House of Representatives) جيئن اسان وٽ قومي اسيمبلي آهي ۽ ٻيو ’ايوانِ بالا‘ جيڪو Senate سڏجي ٿو. نمائندا ۽ سينيٽر اليڪشن ذريعي چونڊيا وڃن ٿا. هر رياست مان ٻه سينيٽر يعني 50 رياستن مان جملي 100 سينيٽر چونڊيا وڃن ٿا، جيڪي 6 سالن جو ٽرم پورو ڪن ٿا ۽ سڄي ملڪ مان 435 نمائندا چونڊيا وڃن ٿا.
• سپريم ڪورٽ کي هلائڻ لاءِ 9 جج ٿين ٿا، جن کي ملڪ جو صدر چونڊي ٿو ۽ جنھن جي اجازت هن کي ڪانگريس کان وٺڻي پوي ٿي.
• آمريڪا جي تاريخ ۾ پھريون دفعو هڪ آفريڪن آمريڪن يعني ڪارو ماڻهو ’باراڪ اوباما‘ 2008ع ۾ صدر چونڊيو ويو. 2012ع ۾ هُو ٻيو دفعو پڻ ملڪ جو صدر ٿيو.