آمريڪا ۾ رستي پڇڻ جي ضرورت ڪونهي
آمريڪا ۾ هن دفعي جيڪا اهم ۽ نئين ڳالهه ڏسي رهيو آهيان، اُها هِتي جي شهر شهر ۽ ڳوٺ ڳوٺ جا ڪمپيوٽرائيزڊ نقشا آهن. اڳ ۾ هڪ شهر کان ٻئي ڏي نڪربو هو ته دڪان تان نقشو خريد ڪري، ان مطابق هلبو هو. ڪيترن شهرن يا رستن جا ته نقشا ئي موجود نه هئا. وري ان شهر ۾ پهچي جنهن هنڌ وڃڻو هوندو هو ان روڊ جو واٽهڙو کان پڇبو وتبو هو ته فلاڻو روڊ ڪٿي آهي ۽ اتي ڪيئن پهچجي ۽ ڪهڙو رستو ون وي آهي ڪهڙو ٽُو وي ۽ مثال طور ڪو ٻڌائي به ٿو ته ڳولا واري هنڌ تي پهچڻ لاءِ هنن هنن رستن ۽ گهٽين مان ٿي وڃو ته اها ڪهڙي خبر ته شاهراهِه فيصل تان ڪيترا ميل هلجي ۽ پوءِ زيب النساءِ اسٽريٽ تي ڪيترو اڳيان وڌجي، جو ان بعد ايم اي جناح روڊ ايندو ۽ پوءِ ايم اي جناح روڊ تي ڪيترا ميل اڳتي وڃجي، جو بولٽن مارڪيـٽ ۾ اهو دڪان اچي ويندو جِتي وڃڻو آهي.
هاڻ آمريڪا جي هڪ هڪ رياست، هڪ هڪ شهر ۽ ڳوٺ ۽ انهن کي ڳنڍيندڙ ايڪسپريس وي، هاءِ وي، روڊ ۽ گهٽين جا نقشا مختلف ويب سائيٽن تي ٺهيا پيا آهن. توهان ڪا به پنهنجي پسند جي ويب سائيٽ کولي ان شهر، ڳوٺ، ڳوٺ جي مارڪيٽ ۽ مارڪيٽ جي ان دڪان يا آفيس کي نقشي ۾ ڏسي سگهو ٿا. نه فقط ايترو پر توهان آمريڪا ۾ هڪ هنڌ کان ٻئي هنڌ تائين پهچڻ لاءِ واٽ (Direction) معلوم ڪري سگهو ٿا، پوءِ ڀلي توهان جي سفر جي شروعات (Starting Point) ۽ منزل (End) هڪ ئي علائقي ۾ هجي، هڪ ئي شهر ۾ هجي، هڪ ئي رياست ۾ هجي يا مختلف رياستن ۾. توهان ان ويب سائيٽ ذريعي سڄو نقشو ڏسي به سگهو ٿا ته ڇاپي به سگهو ٿا. نيويارڪ کان لاس اينجلس ائين آهي جيئن ڪراچي کان ڪوالالمپور پر توهان چاهيو ته انهن Websites ذريعي نيويارڪ کان وٺي لاس اينجلس تائين راهه معلوم ڪري سگهو ٿا ته توهان کي نيويارڪ مان نڪرڻ لاءِ ڪهڙا ڪهڙا رستا وٺڻا پوندا ۽ پوءِ هڪ رياست کان ٻي تائين ۽ ٻيءَ کان ٽين تائين ۽ آخرڪار ڪئليفورنيا تائين ڪهڙا ڪهڙا رستا ۽ انٽر اسٽيٽ هاءِ وي وٺڻا پوندا پوءِ ڪئليفورنيا پهچي ان جي شهر لاس اينجلس ۾ ڪيئن پهچبو. ويب سائيٽ توهان کي اهو به ٻڌائي سگهي ٿي ته فلاڻي رستي تي ڪيترا ميل هلڻو آهي ۽ فلاڻي تي ڪيترا ۽ رستي تي ڪٿي ڪٿي پيٽرول پمپ، آرام جون جايون، پارڪ، ريسٽورنٽون ۽ ٻيون شيون آهن.
جيئن ڪمپيوٽر تي سڀ کان مشهور سرچ مشين Google (گوگل) آهي تيئن نقشن جي ويب سائيٽن ۾ سڀ کان مشهور ’مئپ ڪُئيسٽ‘ (MAP QUEST) آهي جيڪا هن ريت آهي: http://www.mapquest.com
ان ڏينهن واشنگٽن ۾ آئون پنهنجي پيٽارو جي هڪ ساٿي ڪرنل سهيل قريشيءَ سان گڏ هِتي جي هڪ مشهور چؤواٽي ’اسڪاٽ سرڪل‘ وٽ بيٺو هوس ته سنڌ جي ڳوٺ قاضي احمد جي سميع جادران جو فون آيو. سميع مون سان گڏ پنج سال پيٽارو ۾ ڪلاس ميٽ رهيو. ڪراچي يونيورسٽيءَ مان ايم اي ڪرڻ بعد ڪجهه سال حبيب بئنڪ ۾ نوڪري ڪيائين. ان بعد واشنگٽن جي ڀر واري رياست يعني پوٽو مئڪ نديءَ جي ٻي پار ورجينيا رياست ۾ اچي رهائش اختيار ڪيائين. سندس ٻار ٻچا به هِتان ئي پڙهيا، هِتي ئي نوڪريون ڪن ٿا ۽ هِتان ئي شادي ڪئي اٿن. سميع جو اڄ پروگرام واشنگٽن اچي، مون کي پاڻ سان بالٽيمور وٺي وڃڻ جو هو. پر ڪنهن ضروري ڪم ڪري هن کي مئريلئنڊ رياست جي شهر سلور اسپرنگ وڃڻو پئجي ويو ۽ صبح جو ئي مون کي فون تي، گڏ هلڻ جي پروگرام ڪئنسل ڪرڻ جو، اطلاع ڪيو ۽ آئون ڪرنل سهيل سان گڏ شهر (واشنگٽن) جو چڪر هڻڻ نڪري پيس.
”منهنجو ڪم پورو ٿي ويو آهي ۽ هاڻ آئون واندو آهيان،“ سميع هاڻ ٻڌايو، ”تون ڪنهن ريسٽورنٽ ۾ انتظار ڪر ته اچي ٿو کڻانءِ“.
مون ڪرنل سهيل سان ڳالهه ڪئي، تنهن سميع کي واشنگٽن اچڻ کان جھليو. ”سلور اسپرنگ شهر ۾ تون ڪهڙي هنڌ آهين؟“ ڪرنل سهيل سميع کان پڇيو.
”آئون الطاف کي تو وٽ وٺي ٿو اچان جيئن تنهنجو پنڌ ۽ وقت بچي ۽ توسان منهنجي به ملاقات ٿي وڃي.“
منهنجي خيال ۾ اهو بهتر هو. سميع سلور اسپرنگ شهر کان واشنگٽن اچي وري پويان پير ڪري سلور اسپرنگ مان ٿيندو بالٽيمور مون کي وٺي هلي ان کان اهو سٺو هو جو ڪرنل سهيل مون کي سلور اسپرنگ تائين وٺي ٿي هليو.
ڪرنل سهيل ۽ آئون ان وقت واشنگٽن جي هڪ چوراهي اسڪاٽ سرڪل وٽ هئاسين جِتي واشنگٽن جا ٻه اهم روڊ: مئساچوسيٽس ايوينيو ۽ روڍي (Rhode) آئلنڊ ايونيو، ۽ ٻه رستا N اسٽريٽ ۽ 16 اسٽريٽ آرپار گذري ڪُل اٺ رستا ٺاهين ٿا. اسان سورهين گهٽيءَ مان واڪ ڪري O (او) اسٽريٽ تي آياسين، جِتان ساڄي پاسي سترهين گهٽيءَ ۾ آياسين جِتي سوشي تارو (Sushi Taro) نالي هڪ جپاني ريسٽورنٽ وٽ سهيل پنهنجي گاڏي پارڪ ڪئي هئي. ڪار کڻڻ کان اڳ ۾ سهيل سوشي تارو ريسٽورنٽ کان اڳيان سائبر ٽاپ ڪيفي ۾ گهڙي ويو جِتان ڪمپيوٽر تي ان هنڌ يعني Sushi Taro – 1503, 17 Street NW کان وٺي سلور اسپرنگ شهر جي ان هنڌ تائين جِتي اسان کي وڃڻو هو يعني Silver Spring MD 20905 15000 Good Hope Rd; تائين، رستي جو پرنٽ آئوٽ ڪڍي آيو. جيئن رستي تي ڪنهن کان پڇڻ بدران سڌو گڊ هوپ روڊ تائين هلي پهچجي جِتي مسجد بيت الرحمان وٽ سميع اسان جو انتظار ڪري رهيو هو.
ڪرنل سهيل جو ڪڍيل هي پرنٽ آئوٽ، مون پاڻ وٽ رکي ڇڏيو ۽ هينئر جيئن ئي منهنجي نظر ان تي پئي آهي ته پڙهندڙن لاءِ هي لکڻ ويٺو آهيان ته سڄي جهان جو تڏي جيڏو نقشو کڻي هلڻ بدران فقط اهو کڻجي جنهن ۾ سفر جي شروعات واري جاءِ کان اختتام (End) واري هنڌ جو نقشو ۽ Directions هجن. نموني خاطر هِتي اهي رهنمائي جا ڊئريڪشن لکي رهيو آهيان:
1. Start out going south on 17 street NW towards Church street NW (0.1 mile).
2. Turn left on to P street NW. (0.1 mile)
3. Turn left on to 16 street NW (crossing Maryland) (5.7 miles).
4. Turn slight right on Colesville road/MD 384. continue to follow Colesville Rd. (3.2 miles).
5. Colesville Rd becomes Columbia Pike/US-29N (1.2 miles).
6. Merge onto MD-650N/ New Hampshire Ave.
7. Turn right on to Cape May Road. (0.3 mile)
8. Turn right onto Good Hope Road (0.9) miles.
9. End at 15000 Good Hope Road Silver spring, MD 20905, USA.