سفرناما

پرديس ٿيو ديس پنھنجو

ھي ڪتاب ٽنڊي الھيار ڀرسان ھڪ ڳوٺڙي ڪاماري شريف جي علمي ادبي گهراڻي جي مانواري شخصيت ۽ آمريڪا جي رياست مِشيگن ۾ رھندڙ ليکڪ، سياحت جو ذوق رکندڙ مانواري پير تاج محمد قريشي جو آمريڪا جي مختلف شھرن بابت آھي. ھي ڪتاب سادي ٻوليءَ ۾ نھايت ئي سلوڻي انداز واري نثر ۾ لکيل آھي ۽ معلومات سان گڏ مزيدار ڳالھين جي مٺاس بہ منجهس شامل آھي. ڪتاب ۾ آمريڪا جي رياست مشيگن ۽ ڪيناڊا جي رياست اونٽاريو ۾ ڪيل مختصر سفرن جو حال أحوال آھي. ڪتاب ۾ خوبصورت منظرن، ماڻھن، تاريخي حوالن، مختلف سياحتي ھنڌن جي حال أحوال ٻيٽن ۽ شھرن جي دلچسپ تاريخ تي مشتمل آھي. 

Title Cover of book پرديس ٿيو ديس پنھنجو

پورٽ هيوران واري بليُو واٽر پل

هتي آمريڪا واري پاسي کان پورٽ هيوران جو شهر ۽ ڪينيڊا واري پاسي کان سارنيا جو شهر آهي. هن جاءِ تي ٻنهي ملڪن جي وچ ۾ سينٽ ڪلئير دريا وهي ٿو جيڪو هتان ٿي ڪري مشيگن ليڪ ڍنڍ سان وڃيو ملي. هن درياءِ تي ٻنهي ملڪن جي شهرن کي ملائڻ لاءِ بليو واٽر برج پل 10 آڪٽوبر 1938ع تي کولي وئي، جنهن جي تعمير آگسٽ 1936ع ۾ شروع ٿي. بليو واٽر واري هي پل ٻنهي ملڪن جي وچ ۾ ايمبيسيڊر برج کان پوءِ ٻيو نمبر پل آهي. دلچسپ ڳالهه اها آهي جو هي ٻئي پلون 1930ع واري ڏهاڪي ۾ ٺهيون ۽ ٻئي پلون ٻن سالن جي مختصر وقت ۾ ٺهي مڪمل ٿيون.
اسان پورٽ هيوران جي شهر ۾ بيهي رستي ۾ سفر لاءِ چپس ڪولڊ ڊرنڪس وغيره وٺي ڪينيڊا جي حد ۾ داخل ٿيڻ لاءِ بليو واٽر پل تي چڙهياسين. پل تي چڙهندي ئي ٽول ٽئڪس جا بوٿ آهن جتي 3.00 ڊالر ڏئي اڳتي وڌياسين. هن پل تي چڙهڻ کان پوءِ اندازو ٿيو ته هن پل تي بليُو واٽربرج (نيري پاڻي واري پل) نالو ڇو پيو. پل تان هيٺ پاڻي تي نظر وجهبي ته هر طرف دريا جو نيرو پاڻي نظر ايندو. انسان کي الله جي قدرت تي مڪمل يقين اچي ويندو آهي جڏهن پل جي هيٺيان وهندڙ پاڻي نيرو نظر ايندو آهي. يقين ڪريو هڪ انتهائي خوبصورت پاڻي جو درياءِ وهي رُهيو هوندو آهي ۽ توهانجي مٿان نيري آسمان جي ڇت هوندي آهي.
ٽول ٽئڪس ڏئي ڪري بليو واٽر برج جي ذريعي ڪري ڪينيڊا جي حدود ۾ داخل ٿي ڪينيڊا جي اميگريشن پوائينٽ تي پهتاسين.
•