اڻپال جي ڇڪ
ادبي دنيا ۾ عالمي ادب جي وڏي اھميت رھي آھي تنھن ڪري ھر قوم ۽ ملڪ جي جا اديب،عالم ۽ ڏاھا ٻين ڌارين ٻولين ۾ لکيل ڪتابن کي تمام گھڻو پڙھن ٿا ۽ انھن جا ترجما پنھنجي ٻولي ۾ ڪن ٿا عالمي جي ادب جي ڪتابن جي ترجمي سان ھڪ تہ پنھنجي ٻولي جي ادب ۾ اضافو ٿئي ٿو ۽ ٻيو تہ پڙھندڙ دنيا جي خيالن، سوچن، حالتن ۽ ثقافت کان واقف ٿئي ٿو . سنڌي ۾ بہ ھن وقت سٺا ڪتاب ترجما ٿي ۽ ڇپجي رھيا آھن جن ۾ ڪي کوٽون ضرور آھن پر اھي سٺي مقدار ۾ ترجمو ٿي رھيا آھن پر اھڙا ترجما گھٽ ھوندا آھن جن کي پڙھندي محسوس ٿيندو آھي تہ ھي ڪتاب لکيل ئي سنڌي ٻولي ۾ آھي تازو ” ريکائون ميگزين “ جي آگسٽ واري شماري ۾ آمريڪي ليکڪ “ جئڪ لنڊن “ جي ناول The call of the wild جو مڪمل ترجمو ڇپيو آھي جنھن کي سليم نور حسين ترجمو ڪيو آھي جنھن جي ٻولي ۾ ڪا بہ اوپرائپ محسوس نہ ٿي ٿئي تنھن ڪتري ھي يقينن ھي شاھڪار ترجمو آھي.
ھي ناول بظاھر ۾ ھڪ ڪتي بڪ جي پنھنجي پاڻ کي زندھ رکڻ لاءِ ڪيل جدوجھد جي ڪھاڻي بيان ڪيل آھي پر لکيڪ جو اصل ۽ اھم نقطو ارتقا کي بيان ڪرڻ آھي ھن ناول کي پڙھندي بلڪل محسوس نٿو ٿئي تہ ليکڪ ڪو ارتقا جا اصول ۽ ان جو پروسيس بيان ڪري رھيو آھي پر جڏھن پڙھندڙ ارتقا جي نظريئي کي اڳيان رکي ھن ناول جي انت کان شروعات تائين سڄي ڪھاڻي تي سوچي ٿو تہ بلڪل ھڪ ڪتي ارتقا جي ڪھاڻي لڳي ٿو، ھن ناول جي شروعات 1897 ع ۾ ساموندي پٽي وارن ملڪن ۾ آيل ھڪ وڏي تبديلي کان ٿئي ٿي جنھن جو اثر ماڻھن سان گڏوگڏ ڪتن تي پوي ٿو ان تبديلي کي ليکڪ ھنن بھترين لفظن ۾ پيش ڪيو آھي ” بڪ (ڪتي جو نالو) اخبار ڪونہ پڙھندو ھو نہ تہ کيس خبر ھجي ھا تہ نہ رڳو ھن تي پر ھر سامونڊي ڪپر واري تر سان لاڳاپيل جانٺين مشڪن ۽ ڊگھن گھاٽن وارن واري ڪتي،پيوجيسٽ سائونڊ کان ڊائيگو تائين مصيبت ڪڙڪڻ واري ھئي ڇاڪاڻ تہ ماڻھن قطبي اونداھ ۾ ھٿوراڙيون ھڻي ھڻي ھڪ ھئڊو ڌاتو ڳولي لڌو ھو ۽ڇاڪاڻ تہ آڳٻوٽن ۽ اچ وڃ واريون ڪمپنيون انھي لڀ مان ڪمائي جي ڪڍ ھيون ۽ ھزارين ماڻھو اتر پار ڏانھن ڌوڪيندا ٿي ويا انھن ماڻھن کي ڪتا کپندا ھئا کين ڳرا ڪتا کپندا ھئا جانٺين مشڪن وارا ڪتا جيڪي جاگوڙي سگھن بشڪن واري کل سان ڪتا تہ جئين پاري جي سٽ سھي سگھن .“ائين ناول جي ابتدا ٿئي ٿي ۽ ھن ناول جو مرڪزي ڪردار ڪتو بڪ ھڪ ماڻھو جج ملر جي گھر ۾ ھڪ پالتو ڪت جيان ي رھي ٿو جتي ھن جي زندگي بلڪل انسان جھڙي ھوندي آھي ۽ ان جو ماحول اڄ جي تھذيب يافتہ دور جو ھوندو آھي جتي ھو جج ملر جي ٻارن سان راند کيڏي ٿو سوئمنگ پول ۾ تري ٿو، پر اچانڪ جج ملر جي گھر جو مالھي بڪ کي ھڪ ڪتن جي واپاري وٽ وڪڻي ڇڏي ٿو جتان بڪ جي ڏکن جي زندگي جي شروعات ٿئي ٿي جتان بڪ برفاني علائقن جي ٻن سرڪاري عملدارن وٽ وڪيو وڃي ٿو جيڪي ڪتن کي برف گاڏي ڇڪڻ لاءِ استعمال ڪندا آھن بڪ جي ھن دور کي ليکڪ ارتقا جو وچ وارو ڏاڪو ڏيکاريو آھن جنھن ۾ انسان جنگھلي علائقن ۽ برفاني علائقن ۾ رھندا ھئا ۽ انھن جانورن کي پنھنجي معاشي ڪمن ۾ استعمال آڻڻ لاءِ ۽ انھن کي پنھنجي طابع رکڻ لاءِ انھن جي تربيت ڪرڻ شروع ڪئي ۽ ھتي بڪ تمام ڏکيا ڪشالا ڪڊيا، ھتي ھي وڏيون بکون ڪاٽي ٿو برفاني علائقن ۾ ھتي ھن زندگي جا وڏا سبق سکي ٿو جيڪي ھن ريت آھن .
جھنگ ۾ اھا جيوت زندھ رھي سگھي ٿو جيڪا طاقتور آھي جنھن ۾ پنھنجي پاڻ کي محفوظ رکڻ جي صلاحيت آھي باقي ڪمزور ۽ صلاحيت کان محروم جيوت زندھ نٿي رھي سگھي جئين ھن ناول ۾ ڪتن جي ويڙھ دوران ڏٻري ۽ ڪمزور ڪتي ڪرلي ھڪ ئي ويڙھ ۾ پورو ٿي ويندي آھي يا بڪ ۽ ھڪ ٻئي جي ڪتي سپٽز جي ويڙھ دوران بڪ سپٽز کي ماري وجھي ٿو ۽ ڪتن جي لوڌ جو اڳواڻ ٿي وڃي ٿو .
زندگي جي ھن سفر دوران بڪ اھو پڻ سکي ٿو تہ ھتي صرف گھوٻاٽي ۽ ڏند جو قانون ھلي ٿو تنھن ڪري جنھن وٽ گھوٻاٽو آھي اھو قانون ٺاھيندڙ حڪمران آھي ۽ جنھن وٽ مضبوط ڏند آھن اھو ئي زندا رھي سگھي ٿو ۽ پنھنجو بچاءِ ڪري سگھي ٿو نہ تہ ان کي ڪرلي جيان ڪنھن نہ ڪنھن جي ھٿان موت اچي ويندو آھي .جئين ھڪ ھنڌ ليکڪ لکي ٿو تہ “بڪ بي رحم ھو ھن گھوٻاٽي ۽ ڏند جو قانون ھئين سان ھنڊايو ھو ۽ نہ ڪنھن سرسي مان فائدو وٺڻ کان ڪيٻائندو ۽ نہ ئي اھڙي دشمن کي ڇڏي پٺتي ھٽندو ھو جنھن کي موت جي واٽ تي پير کڻايو ھئائين ھن سپٽز کان ۽ پوليس ۽ ٽپال وارن جي مکيا ويڙھاڪ ڪتن کان پرايو ھو ۽ خبر ھئس تہ ڪو وچ وارو رستو ڪونھي . ھو پاڻ مٿانھون ٿئي يا پاڻ کان مٿانھون ٿيڻ ڏي جڏھن تہ ڪھل ڪرڻ ڪمزوري ھو.مول جيوت ۾ ڪھل جو وجود ڪونہ ھو،ان کي ڀئو سمجھيو ٿي ويو ۽ اھڙيون غلط فھميون موت آڻينديون آھن، مار يا مارجي وڃ،کاءُ يا کاڄي وڃ،اھو قانون ھو ۽ ھُو وقت جي قانونن جي بجا آوري ڪندو ھو .“
ان کانسواءَ ھن ناول ۾ ليکڪ ان نقطي کي بہ بحث ھيٺ آندو آھي تہ اوائلي زماني ۾ جڏھن ھن ڌرتي تي رھندڙ جيوت تي جڏھن فطرتي مصيبتون، آفتون ۽ تڪليفون آيون ٿي تہ ان پنھنجي پاڻ جو ڪئين بچاءُ ڪيو ٿي ۽ ان جيوت ان دور ۾ ھڪ ٻئي جي تجربن مان ڪئين پرايو ٿي . ھن ناول ۾ ليکڪ ارتقا جي ان نقطي کي پڻ آندو آھي تہ ڪنھن بہ جيوت تي ماحول ڪئين۽ ڪيترو اثر پوي ٿو ۽ اھا جيوت ڪئين حالتن مطابق پاڻ کي تبديل ڪندي ۽ پنھنجي پاڻ کي ماحول ۾ ڪئين ڍالي ٿو ۽ جيڪڏھن ڪنھن جيوت ۾ پنھنجي پاڻ ۾ تبديل ڪرڻ واري خاصيت ناھي تہ اھا فنا ٿي ويندي آھي تنھن ڪري جيوت لاءِ پنھنجي پاڻ ۾ ماحول مطابق ڍالڻ تبديلي لازمي آھي جئين ھن ناول جو مرڪزي ڪردار ڪتو بڪ پنھنجي پاڻ کي ماحول ۾ ڍالي رھي ٿو، اھو ساڳيو ڪتو جڏھن جج ملر جي گھر ۾ ھڪ پالتو ڪتو ھو تڏھن ھن کي کاڌي لاءِ ڪا بہ جفاڪشي نٿي ڪرڻي پئي نہ ئي ھي ڪو ويڙھو ڪتو ھو پر جڏھن بڪ جھنگ ۾ رھڻ لڳي ٿو تہ ھن کي پنھنجي کاڌي لاءِ مالڪن جي کاڌي مان چوري ڪرڻي پوي ٿي تہ پنھنجي بچاءُ لاءِ ويڙھو ٿيڻ پوي ٿو .
فرانس ۽ پرئل کان پوءِ بڪ ھڪ شڪاري جان ٿارنٿن وٽ وڪيو وڃي ٿو ليکڪ بڪ ھن دور کي انسان جي ارتقا دوران آيل شڪار وارو دور ڏيکاري ٿو جنھن ۾ انسان جانورن کي پنھجي پالتو جانور جيان رکڻ لڳو ھو ۽ انھن کي پنھنجي شڪار جي حاصلات لاءِ استعمال ڪرڻ لڳو ھو . ھتي مرڪزي ڪردار بڪ جي زندگي تمام گھڻي سولي گذرڻ لڳي ٿي ھتي ھن کي ٿارنٿن جو پيار ملي ھتي بڪ جي پنھنجي مالڪ سان محبت واري حس جاڳي پوي ٿي ھتي ھن جي انسان سان وفا واري حس جاڳي پوي ٿي ھتي بڪ جي پراڻي سگھ، پراڻي طاقت موٽي اچي ٿو ۽ ھو واڳ گاڏي ڇڪڻ جي ھڪ مقابلي جان ٿارنٿن کي پئسا ڪمائي ڏي ٿو، ھتي بڪ جي پنھنجي اباڻي شڪار ڪرڻ واري حس موٽي اچي ٿو ۽ ھوھاڻي جھنگ پنھنجي مرضي سان جانورن،پکين جي شڪار ڪري سگھي ٿو ھُو جھنگ ۾ پنھنجي آزاد زندگي گذاري سگھي ٿو ھن کي ڪنھن بہ انسان جي ضرورت نٿي پئي جنھن جي سھاري ھو زندا رھي سگھي کاڌو حاصل ڪري سگھي پر ھن کي انسان محبت جي ڇڪ وري بہ ٿئي تنھن ڪري ھُو ڪڏھن ڪڏھن جان ٿارنٿن جي ڊاٻي تي پڻ وڃي ٿو ائين ھي پنھنجي زندگي وڻڻ، ٻيلن ۽ جانورن جي وڃ ۾ گذارڻ لڳي ٿو، بڪ جي ھن زندگي کي ليکڪ ارتقا جو پھريون ڏاڪو ڪري پيش ڪري ٿو ۽ بڪ جيڪو ارتقا جي ھاڻوڪي ڏاڪي تي ھڪ ڪتو آھي جيڪو انسان جي سنڀال ھيٺ رھي پيو اھو وري پنھنجي ارتقا جي پنھنجي ڏاڪي ۾ جھنگ ۾ رھڻ ۽ بگھڙن جي وڄ ۾ رھڻ ڪري ھڪ بگھڙ ٿي بگھڙن واري زندگي گذارڻ لڳي ٿي ائين ناول جي پڄاڻي اچي ٿي ۽ بڪ جي ڪھاڻي پوري ٿئي .جئين تہ ليکڪ ھڪ ناولنگار سان گڏوگڏ سماج وادي ھو تنھن ڪري ھو ھن ارتقا جي ڏکئي موضوع کي ناول جي صورت ۾ تمام دلچسپ انداز سان پيش ڪيو آھي ۽ ھن جو ترجمو بہ لاجواب ڪيو آھي پڙھندڙ کي ھي ناول پنھنجي گرفت ۾ جڪڙي وٺي ٿو . تنھن ڪري ناول ادب ۽ ارتقا سان دلچسپي دوستن کي ھي ناول ضرور پڙھڻ گھرجي.