1971
1971- 1 – 8
ادا سائين
اسلام عليڪم! نوازش نامو مليو، مھرباني.
اوهان ناچيز لاءِ جن جذبات ۽ احساسات جو اظھار ڪيو آهي. انھيءَ لاءِ ٿورائتو آهيان.
عوام پنھنجو قيمتي ووٽ ڏيئي مون تي جيڪي جوابداريون ۽ ذمينداريون وڌيون آهن، انھي کان منھن موڙيان تہ خدا کان ڦران.
اوهان بہ دعا ڪندا تہ زندگي جي هر شعبي ۾ نئين ۽ تعميري فڪر کي عملي صورت ۾ رائج ڪرڻ واري قومي جدوجھد ۽ ڀرپور حصي وٺڻ جي طاقت خدا سائين ڏئي ۽ انھي سان گڏو گڏ پنھنجن نيڪ مشورن کان بہ وساريندا تہ مھرباني.
نياز مند
عبدالڪريم
26
Phone : 220418 ESTABLISHED 1948
2 – SARNAGATI BUILDING , WEEKLY AZAD ( SINDHI)
PAKISTAN CHOWK
KARACHI – 1
1971 – 4 – 24
عزيز محترم
اسلام عليڪم! اوهان جو خط پھتو ۽ احوال معلوم ٿيو. اوهان جي همت ۽ حوصلا افزائي جو شڪريہ.
مضمون نھايت ئي عالمانہ ۽ تحقيقي آهي. اميد تہ جلد شايع ڪبو. اميد تہ توهان ڏانھن خيريت هوندي.
ٻيو سڀ خير. دعا ڪندا رهندا.
والسلام
فقير علي نواز وفائي
27
نيٺ تہ ڦٽندو سچ جو سورج
نيٺ تہ کٽندي رات
پرڀات پبليڪيشن حيدرآباد سنڌ
تاريخ – 1971 – 7 – 18
ادل – جيئي سنڌ
اميد تہ خوش هوندين. دنوي مصروفيتن جي ڪري وڌيڪ احوال ۽ حال نہ لکي سگهيا آهيون ۽ نہ ئي اوهان ورڪيو. هي دوست منھنجو شاگرد بہ آهي. سندس هر طرح جي مدد ڪندا ڇو تہ انھي علائقي ۾ نئون آهي.
اوهان جو ڀاءُ
سيد نثار حيسيني
28
حيدرآباد
1971- 12 – 2
اسلام عليڪم! اوهان جو قرب ڀريو خط ڪجهہ ڏينھن پھريون مليو اٿم. اوهان جي مھرباني ، جو وري بہ اوهان ياد ڪيو. مون کي بيحد افسوس آهي ، جو ڊپٽي ڊئريڪٽري جي ڏينھن ۾ اوهان جو خط مون ڏانھن آيو، پر مون ان جو اوهان کي جواب ڪونہ ڏنو. سچ پچ تہ ڪا يادگيري ڪانہ اٿم. پر اوهان جو موڪليل خط ضرور مليو هوندم. اوهان کي جيڪا نراسائي ٿي ، ان لاءِ معافي ٿو گهران. اميد تہ درگز ڪندا.
مھرباني ڪري پنھنجي ادبي ڪاوشن جو تفصيلي احوال لکي موڪليندا.
ايڏانھن اوهان ڏانھن اچڻ ٿيو تہ اميد تہ اوهان سان ملاقات جي ضرور ڪا صورت نڪري ايندي.
منھنجو گهڻو ڪري هتي خيرپور ۾ رهڻ ايتري قدر ٿئي ٿو، جو هڪ ٻہ ڏينھن رهي وري ٻاهر ڪنھن پاسي گشت تي وڃڻو پوي ٿو. هن مھيني جي آخري هفتي ۾ هتي خيرپور ۾ ئي رهڻ جو پروگرام آهي. پر اوهان خاص مون سان ملڻ لاءِ هيڏانھن اچڻ جي تڪليف نہ ڪندا، ڇو تہ خاطري سان نٿو ملي سگهجي تہ ان هفتي ۾ بہ ڪھڙي ڏينھن ڪنھن پاسي ڪنھن ڪم سانگي نڪري وڃڻو پوي. ڪوشش ڪري آئون پاڻ اوهان جي پاسي ڪنھن ويجهي موقعي تي اچڻ ۾ اوهان سان ملڻ جي ڪوشش ڪندس.
اميد تہ هر طرح خيريت سان هوندا.
وڌيڪ خير. والسلام
اوهان جو
محمد ابراهيم جويو