1987
روشني
سنڌ اسلامڪ سينٽر سکر
( تنظيم فڪر ونظر سنڌ جو ترجمان، ديني، علمي ۽ ادبي ڪتابي سلسلو )
تاريخ : 1987ع – 1 – 8
پيارا دادا!
اوهان جو نوازشنامو مضمون سان گڏ، يا مضمون نواشنامي سان گڏ مليو، مھرباني. رسيد حاضر آهي، روشني جي پاليسي روشني آهي. سچ، سونھن، سرت، ساڃاھہ سان لاڳاپو ۽ ان جو ابلاغ. پڪ اٿم تہ سمجهي ويا هوندا.
سڄي دنيا پنھنجي آهي.سنڌ تہ اڃان وڌيڪ، ان کان اڃان وڌيڪ، پنھنجو اتر، سکر، ميرپور ماٿيلو، اٻاوڙو، داد لغاري.جنھن جي ادبي، علمي، ديني سماجي ثقافتي، تاريخ جاگرافي لکي موڪليو تہ روشني ۾ شايع ٿيندي، پر شرط هي آهي تہ اوهان جي شان وٽان هجي.
اوهان جو هي مضمون، انشاءَﷲ پھرين شماري ۾ آڻي رهيو آهيان. اوهان جي ساٿ سان اڳتي وڌبو رهبو. هدايتون ڏيندا رهندا ۽ پنھنجي دوستن کي بہ تعاون لاءِ چوندا.
والسلام
اوهان جو
امير بخاري
99
رحيم داد راهي
پي او چڪ ضلعو شڪارپور
تاريخ : 1987ع – 2 – 5
محترم دادا سنڌي
اسلام عليڪم!
طرفين خيريت مطلوب
عرض تہ سائين توهان سان چڱو وقت اڳ توهان جي ڳوٺ ۾ ملاقات ڪرڻ کان پوءِ وري نہ مليا آهيون. دل ڏاڍي ٿي چوي تہ وري اوهان سان ملجي ۽ ڪي ڪچھريون ڪجن. ليڪن رات ڏينھن مصروفيت منجهائي وڌو آهي. توهان چيو هو تہ مولانا عزيزﷲ ٻوهيي سان ملاقات ڪرايو. مان توهان جو ذڪر مولانا سان ڪيو هو. ليڪن پروگرام سکر، چڪ، شڪارپور ۽ گهوٽڪي ۾ ٿيا آهن. پر اوچتو ٿيا آهن. جنھن ڪري جلدي ۾ اوهان کي نہ ٻڌائي سگهيو آهيان.
عرض تہ سائين مان توهان سان ذڪر ڪيو هيم تہ مان مولانا سنڌي جو ڪتاب ” تعليمات زندگي اور سياسي افڪار“ ترجمو ڪري رهيو آهيان، اهو هاڻي پورو ڪري ويو آهيان. هاڻي فيبروري 1987ع ۾ ڇپائڻ جو ارادو آهي. ڪتاب تي ڪجهہ وڏن اديين جا تعارف بہ لکرائيندس، تنھن ۾ اوهان کي بہ عرض ڪندس تہ مولانا جي فڪر تي ۽ منھنجي ترجمي تي هڪ تعارف لکي ڏيو. لکي ڏيڻ جي ورندي هن خط جي جواب ۾ لکي موڪليو تہ مان توهان ڏانھن ڪتاب جي هڪ ڪاپي موڪليان. مون کي اميد آهي تہ اوهان مايوس نہ ڪندا.
ٻيو عرض تہ جيڪڏهن ٿي سگهي تہ هن نيڪ مقصد ۾ مالي مدد ٿي تہ اها بہ لکجو. اها ڳالھہ ڪرڻ وسري وئي تہ وچ ۾ مان ڪتاب ياسر عرفات ماڊرن بوڪ اسٽور واري هٿان اوهان ڏانھن موڪليو هيم. مليو الائي نہ، دلجاءِ ڏيندا. خدا حافظ.
اوهان جو
رحيم داد راهي
100
ڪل سنڌ ٻالڪ سنگت - سنڌ
خيرپور ميرس
1987ع – 02 – 14
مانوارا سائين دادا سنڌي
اميد تہ سدائين سنڌي ٻارڙن کي تاريخ جي حقيقتن کان آگاھہ ڪرڻ جو فرض نڀائيندا رهندئو.
توهان جو ڪارڊ بلڪل هينئر مليو آهي. عرض تہ اسان توهان کي ڪڏهن ناهي وساريو، ۽ نہ ئي وري وساري سگهون ٿا، اوهان جي خدمتن کي جي ڪوئي وسارڻ چاهي تہ بہ وساري نہ سگهندو.
ڪارڊ موڪلڻ لاءِ لکي اوهان مون کي شرمندو ڪيو آهي. ڀلا اوهان کي اسين ڪارڊ نہ موڪليون ۽ ٻارن جو ميلو ڪيون، ائين ٿي سگهي ٿو؟
توهان مھرباني ڪري پنھنجي ڪتاب جي ڪاپي ۽ پنھنجو مختصر تعارف اسان ڏانھن اهڙي ريت اماڻيو جو اهو 17 فيبروري تائين ڪنھن طرح پھچي وڃي. پوسٽ رستي متان پھچڻ ۾ دير ڪري. بھتر ٿيندو تہ هٿو هٿ اماڻيو، ڇو تہ 17 فيبروري شام جو ايوارڊ ڪميٽي جي گڏجاڻي آهي، تہ جيئن اتي توهان جو نالو تجويز ڪجي، فيصلو تہ ڪميٽي جي هٿ وس آهي. بھرحال آءُ توهان جو ٿورائتو آهيان جو اوهان اسان جي سڏ کي مان ڏنو.
توهان سان ملڻ جي اڪير بہ ڪافي عرصي کان هيم، هي ميلو منھنجي ان خواهش جو پورائو پڻ ڪندو. وڌيڪ ڪچھري روبرو ڪنداسون.
اوهان جو پنھنجو
نديم گل عباسي
سيڪريٽري
ميلہ آرگنائزنگ ڪاميٽي
ميلہ آفيس مال روڊ خيرپور ميرس
101
NATIONAL SEMINAR
ON
Mian Noor Mohammad Kalhoro Wall – e – Sindh
CONVENER MALIK ASRAR HUSSAIN
Assistant Commisioner Moro Nawabshah Phone No. 435. 201
Date : Feb, 24, 1987
Dear Sir, Dada Sindhi
With reference to our letter dated 10th February 1987, we are to inform you that the National Seminar on Mian Noor Muhammad Kalhoro, the great Ruler of Sindh, will now be held in the first week of April, 1987.
We shall feel great pleasure and appreciate, if you may kindly favor Us a research article on the given topic by 20th March, 1987, on the following address:
Dr. Muhammad Liaq Zardari,
c/o Sikandar Medical Store,
Moro, District , Nawabshah
P.O Moro.
Kindly intimate your willingness as participant in the seminar. The exact time schedule of the seminar will be communicated later on.
DR.MUHAMMAD LIAQ ZARDARI
SECRETORY, NATIONAL SEMINAR
MIAN NOOR MOHAMMAD KALHORO
102
ڊائريڪٽر
انسٽيٽيوٽ آف سنڌ الاجي
تاريخ : 1987ع – 3 – 1
محترم دادا سنڌي
موضوع : ادبي انعام سال 1985ع جو چيڪ ۽ ” مڃوتي سرٽيفڪيٽ “ موڪلڻ جي باري ۾.
اسلام عليڪم!
اوهان کي ٻڌي نھايت خوشي ٿيندي تہ انسٽيٽيوٽ آف سنڌ الاجي طرفان ادبي انعام جي سلسلي ۾ سال 1985ع لاءِ اوهان جي ڪتاب ” سنڌ جون تاريخي ڪھاڻيون“ کي ٻاراڻي ادب بھترين ڪتاب قرار ڏيئي پھريون نمبر انعام ڏنو ويو آهي ۽ اهڙو اعلان اخبار ذريعي پڻ ڪري چڪا آهيون.
ان سلسلي ۾ هن خط سان شامل انعام جي رقم مبلغ 2000 روپيا ( اکرين ٻہ هزار روپيا ) جو چيڪ نمبر 849333 مورخ 1987ع – 1 – 19 ۽ ان سان شامل ” مڃوتي سرٽيفڪيٽ “ موڪلجي ٿو. چيڪ وصول ڪري اهڙي رسيد هن اداري کي موڪليندا تہ مھرباني.
مخلص
مھتاب اڪبر راشدي
ڊائريڪٽر انچارج
اسٽيٽيوٽ آف سنڌالاجي ڄام شورو
103
عبدالقادر منگي
اسٽنٽ ڪمشنر اينڊ
سب ڊويزنل ميجيسٽريٽ
سجاول، ضلع ٺٽو
1987ع – 6 – 14
محترم دادا
اسلام عليڪم! اميد تہ خوش هوندا، توهان جو خط مليو. اڳيون خط مليل آهي. بدنصيبي سان خط لکڻ جي معاملي ۾ ڏاڍو جڏو ثابت ٿيو آهيان. ڪوتاهي درگزر ڪندا.
منھنجي لاءِ جن جذبات جو اظھار ڪيو آهي، ان لاءِ ٿورائتو آهيان.
هي سيمينار ڪينجهر تي آءُ نہ بلڪہ محترم بھاول خان انڙ ڪرائي رهيو آهي. ان سان لھہ وچڙ ۾ ايندا.
وتائي فقير جا ڪتاب بہ ڇپايا هئا سي. جيڪي اي سي آفيس ٽنڊو الھيار ۾ ڇڏي آيو آهيان. انھن سان رابطي ۾ ايندا.
ڀنڀور ۽ ديبل هٿ ڪري موڪلي ڏيندس. توهان جيڪي حوالا ڏنا آهن. اهي معتبر آهن ۽ مون کي چڱي طر ح ياد آهي . توهان جي ادبي سرگرمين جي پرچار ملندي رهندي آهي. اڃان بہ اڳڀرا ٿيو شل.
نيڪ تمنائن سان
توهان جو پنھنجو
عبدالقادر منگي
104
سکر
1987ع – 09 – 19
جيئي سنڌ !
اسان جو 11 تاريخ تي بلڪل پڪو پروگرام هيو، اسين گهوٽڪي بہ آياسون. اتان صبح جو سويري نڪري ميرپور ماٿيلي آياسين. جتي اسان کي 12 وڳي تائين ڪابہ سواري ڪين ملي. مايوس تمام گهڻا هئاسين. رات بہ رهڻو ڪين هو. موٽي بہ اچڻو هو سوچيوسون ۽ صلاح ڪئي سون. اگر هينئر هلبو تہ موٽي ڪين سگهبو. ان لاءِ پروگرام کي ڪينسل ڪيو سون. وري ميرپور ۾ سنڌي ادبي سنگت جي مينٽنگ ۾ حاضر رهي شام جو مان سکر پھتس.
ادا ادو عبدالرشيد اوٽي ڪاليج ۾ چونڊجي آيو آهي. کيس چيو تہ هڪ ڏينھن اچي ڀٽه روڊ سکر تي پنھنجي جڳھہ تي مون سان اچي ملي وڃي. سائين اگر سڄي سنگت ٻاراڻي کاتي ۾ آهي تہ اسان جي تنظيم بہ تہ ٻارڙن لاءِ ئي آهي نہ . سائين اهڙي ڳالھہ ناهي سکن کي حاصل ڪرڻ لاءِ ڏک گهڻا ڏسڻا پوندا آهن. هن ڌرتي ۽ ان جي ٻولي لاءِ اسان سڀني کي ڪم ڪرڻو آهي. جيڪو اسان کي فرض آهي. جيڪڏهن اسان پنھنجو فرض ڪين ادا ڪندا سين تہ ڏينھن قيام جي هي ڌرتي اسان کان پنھنجو حساب ڪتاب وٺندي. پوءِ اسين ڪھڙو جواب ڏينداسين. خير اهڙي ڪچھري روبرو ڪبي.
مون اوهان جي مضمون لاءِ اياز گل کي چيو آهي. اهو سمجهو تہ مون کي ملي ويو .باقي مشتاق لاشاري اوهان جي ڪھاڻي ڪين ڏني آهي ۽ نہ آءُ ڪاليج وڃان ٿو .کيس چوندا تہ گهر پھچائي وڃي يا پوسٽ وسيلي موڪليو.
چڱو موڪلاڻي ڪانھي. وڌيڪ احوال روبرو ڪبو. عھديدارن جي لسٽ تمام جلد موڪلجو.
اميد تہ منشور نئون پرچو اوهان پڙهيو ۽ ڪارڪن کي پڙهايو هوندو.
فقط اوهان جو ساٿي
خادم سنڌي
ڀٽا روڊ سکر
105
ميرپور ماٿيلو
1987ع – 11 – 18
سدا خوش هجو شال
هوءَ جا پائين پير ۾، تنھن جتي نہ جيھي
وساري ويھي تن ڪيچين کي ڪيئن رهان؟
پيارن کان پيارا قلم جا بي تاج بادشاھہ .سنھري سنڌڙي سٻاجهڙي جي ادب جي افق چمڪندڙ حسين ۽ روشن ستارا. برک اديب ۽ منھنجا محترم ۽ عزيز استاد جناب ڪريم بخش دادا سنڌي صاحب
اسلام عليڪم!
اميد تہ اوهان نوشگفتہ گلڙن وانگر شاخ حيات تي تاحيات مرڪندا ۽ مھڪندا رهندا ۽ پنھنجي علم ۽ ادب جي خوشبوءِ بھار جي حسين بھاري ۾ بہ ۽ فضان جي خطراتن جهوڪن ۾بہ مھڪائيندا ۽ پکڙيندا رهندا.
تمام گهڻا ڏينھن گذر ٿيا. هنن نماڻن نيڻن اوهان پيارن جو ديدار ڪونھي پسيو ۽ نہ ئي ويجهڙائي ۾ اوهان سان رهاڻين جو موقعو مليو.
اٺون درجو اوهان پيارن جي سرپرستي هيٺ رهي تمام گهڻو ڪجهہ پرايوسين. ۽ علم ادب جي روشني مان بہ روشناس ٿيا سين. سچ پڇو تہ علم ۽ ادب جي اهميت جو حقيقي قدر هاڻي ٿيو آهي.
ادب جي ڪتابن پڙهڻ جو شوقڙو اڳ ۾ بہ هو، پر هاڻي مان سمجهان ٿو تہ ڪتابن سان ڪجهہ وڌيڪ لئون لڳي ويئي آهي. سنڌ جي تاريخ جي ڪتابن جو مطالعو ڪجهہ ڪيو آهي. ڪجهہ ڪران ٿو. هر وقت ڪونہ ڪو سنڌ جي تاريخ جو ڪتاب ضرور ورق گرداني ۾ بہ هوندو آهي. ڪجهہ لکڻ جي ڪوشش ڪران ٿو. ڪجهہ وري لکيو آهي. چون ٿا تہ ڪجهہ ڪرڻ لاءِ ڪجهہ سکڻو بہ پوندو آهي. علم ادب، سوز گذار شايد ماءُ پيءُ جي ورثي ۾ ملڻ واريون شيون ڪونہ ٿيو ٿين. ۽ نہ ئي وري ملڻ ۽ مذهب تي مدار رهي ٿو. مان سمجهان ٿو تہ اهو خدا تعالى جو خاص انعام هوندو آهي. جنھن کي وڻندو آهي عطا فرمائي اهو رب العالمين آهي. ان جي رحيمي ۽ ڪريمي جي ڪرت جو ادنا ڪرشمو آهي. جڏهن نوازڻ تي اچي تہ هو اهو خيال ڪونہ ڪري تہ ڪنھن کي نوازي رهيو آهي. جي ان جي مھرباني جا مينھن وسن ٿا تہ باغ ۽ بر ۾ فرق ڪونہ ڪن.
مطلب تہ قصو مختصر اوهان جي ڪتاب ” ڏيساور سان اڳوڻن سنڌين جو واپار “ جو ڪجهہ مطالعو ڪيو سين. جيڪو تمام سٺو ۽ سنڌ جي تاريخ جي تحقيق جا تمام خوبصورت ورڻ سمايل اٿس. جنھن مان اوهان جي سنڌي زبان سان بي پناھہ محبت ۽ عشق جي پروڙ پوي ٿي. اوهان جيڪا هن ڪتاب جي مواد تي حقيق، محنت ۽ دماغ سوزي ڪئي آهي. تنھن جو مان سمجهان ٿو تہ هت ڪو مثال ملڻ مشڪل آهي. گهٽ ۾ گهٽ منھنجي نظرن ۾ هت اهڙو شخص ڪين ٿو نظر اچي ٿو، جنھن مان ان علمي خوبي جي خبر پوي. اڳي بہ اوهان جا سُٺا مقالا ۽ ڪتاب ” ڏيئي ڏنڀ ڏڏن “ وغيرہ شايع ٿيا آهن. انھن جي مطالعي جي سعادت نصيب ٿي نہ سگهي آهي. جنھن جي مطالعي جي آس اندر ۾ آهي. ۽ ﷲ تعالى ۾ اميد رکان ٿو تہ ڪڏهن نہ ڪڏهن اُهي ڪتاب ۽ مقالا نظرن آڏو اچي هن ناچيز بندي جي علم ۾ واڌارو ڪندا. اوهان جو ڪتاب ” ڏيساور سان اڳوڻن سنڌين جو واپار“ سنڌي ادب، تاريخ
۽ علمي فن پاري جو شاندار نمونو آهي. جنھن ۾ سنڌي تاريخ تي تمام سٺي ۽ مستند معلومات جي پروڙ پوي ٿي. منھنجي نظرن ۾ اها اوهان جي تصنيف تمام اهم آهي. ۽ مستقبل جي مورخين لاءِ هڪ شاندار تحفو ثابت ٿيندو. ۽ انھن جي علمي و ادبي خوبين جو بہ باعث بڻبو.
اوهان جيڪا خاموشي سان سنڌي ادب جي خدمت ڪري رهيا آهيو، سا مان سمجهان ٿو تہ ڪنھن کان بہ ڳجهي نہ آهي. پڙهندڙ پاڻ هن هيرن جي هار کي پوئي پنھنجي هيئني جو سينگار بڻائيندا.
آخر ۾ عرض ڪرڻ چاهيان ٿو تہ پنھنجن ڪتابن جي وقت آهر وري وري ايڊيشن شايع ڪرائيندا رهندا تہ جيئن اوهان جا اهي ناياب ۽ زندھہ قيمتي ڪتاب هميشہ منظرعام رهندا اچن. تہ جيئن نئي نسل هنن ڪتابن جي مطالعي کان محروم نہ رهي ۽ هو هنن کي غور ۽ چاھہ سان مطالعو ڪري پنھنجي پياري پاڪيزه ۽ مٺڙي ٻولي جا ماهر ۽ ان جي تاريخ مان بہ روشناس ٿين.
ٻيو سڀ خير منھنجي ۽ منھنجي عزيز دوست جناب دين محمد وسير جي طرفان تمام گهڻي کان گهڻا سلام قبول ڪندا ۽ آخر ۾ هن نايات ڪتاب لکڻ تي تمام گهڻيون مبارڪون بہ قبول ڪرڻ فرمائيندا.
جيڪڏهن هن ساري خط ۾ ڪٿي بہ ڪا غلطي آهي تہ هن ناچيز بندي ڪنڀار کي معاف فرمائيندا. يا ڪٿي بہ ڪو کٿو لفظ لکجي ويو آهي تہ معذرت سان گڏ هي مسڪين، ناچيز بندو، هميشہ اوهان جي ترقي ۽ خوشحالي لاءِ
دعاگو ۽ اوهان جو پيارو شاگرد!
ڪريم بخش ڪنڀر، ولد غلام حيدر ڪنڀر
ڪنڀار محلہ، ميرپور ماٿيلو
106
ڊائريڪٽر
انسٽيٽيوٽ آف سنڌ الاجي
1987- 11 – 19
سائين دادا سنڌي
اميد تہ خوش هوندا. عرض تہ انسٽيٽيوٽ آف سنڌ الاجي 1987ع ۾ پنھنجي قيام ۽ ڪاڪردگي جا پنجويھہ سال پورا ڪري رهي آهي. انھي عرصي دوران سنڌي ثقافت، تاريخ ۽ ٻولي جي جيڪا خدمت ڪئي آهي. اها اسان جي اڳيان آهي.
اوهان ڄاتل سڃاتل ليکڪ جي حيثيت ۾ عرصي کان وٺي هن اداري کي پنھنجي محبت ۽ خدمت جا موتي ڏيندا رهيا آهيو. هاڻي مناسب وقت اچي ويو آهي تہ اوهان جي اهڙين عنايتن مان ” سلور جوبلي“ جي موقعي تي مستفيض ٿيون.
اداري طرفان ” سلور جوبلي “ جي موقعي تي ” جوبلي نمبر “ شايع ڪرڻ جو فيصلو ڪيو ويو آهي. تاريخي اهيمت واري انھي دستاويز ۾ اسان اوهان جي گرانقدر قلمي پورهئي کي بہ شامل ڪرڻ گهرون ٿا، ان ڪري اوهان کي عرض ڪجي ٿو تہ هيٺ ڄاڻيل موضوع تي 15 ڊسمبر 1987ع تائين مقالو / مضمون / شعر لکي موڪليندا.
موضوع : سنڌي الاجي ۽ سنڌ جا ٻيا علمي، ادبي ۽ ثقافتي ادارا
اوهان جي ٿورائتي
مھتاب اڪبر راشدي
ڊائريڪٽر انچارج
107
ڊائريڪٽر
انسٽيٽيوٽ آف سنڌ الاجي
1987- 12 –03
محترم سائين دادا سنڌي
ڪارج :- سلور جوبلي نمبر بابت
حوالو:- اوهان جو خط مورخ 29 نومبر 1987ع
اميد تہ خوش هوندا. اوهان جي خط جي موٽ ۾ لکجي ٿو تہ اوهان کي سنڌ الاجي ۽ سنڌ جي نيم سرڪاري ۽ غير سرڪاري ادارن جو تقابلي مطالعو پيش ڪرڻو آهي ۽ انھي روشني ۾ هن اداري جي اهميت ۽ حيثيت کي واضع ڪرڻو آهي. مثال طور اسان وٽ جيڪي بہ ادارا آهن. انھن مان ڪي ثقافتي آهن تہ ڪي اشاعتي. مگرهي ادارو هڪ ئي وقت تي علمي، ادبي، ثقافتي ۽ تحقيقي ادارو آهي. ان ڪري ادارن جي حيثيت باقي ٻين ادارن کان منفرد ۽ اهم آهي. اوهان مضمون لکڻ وقت ٻين ادارن جو تعارف ۽ ڪارڪردگي تي بہ روشني وجهندا .
اوهان اسان جي سڄاڻ ليکڪن مان آهيو. انھيءَ موضوع سان ڀرپور انصاف ڪري سگهو ٿا. ان ڪري وڌيڪ وضاحت جي گنجائش محسوس نہ ٿي ڪجي. مھرباني ڪري مقابلو هن مھيني جي آخر تائين لکي مڪمل ڪندا. مقالي لکڻ لاءِ اوهان وٽ هڪ مھينو آهي ۽ اسان جي خيال ۾ اوهان جھڙي ليکڪ لاءِ اهو عرصو ڪافي آهي.
اوهان جي ٿورائتي
مھتاب اڪبر راشدي
ڊائريڪٽر انچارج
انسٽيٽيوٽ آف سنڌ الاجي ڄام شورو
108
ڊائريڪٽر
انسٽيٽيوٽ آف سنڌ الاجي
1987- 12 –14
محترم سائين دادا سنڌي
اميد تہ خوش هوندا. اوهان کي اطلاع ڏيندي فخر ۽ خوشي محسوس ڪري رهيا آهيون تہ جڳ مشهور ادارو سنڌي ٻولي، علم ادب، تاريخ ۽ ثقافت جو گهوارو انسٽيٽيوٽ آف سنڌ الاجي پنھنجي خدمتن جا پنجويھہ سال پورا پيو ڪري. هن مھيني جي 27 ۽ 28 تاريخ تي سلور جوبلي ملھائي رهيو آهي .
اداري جي سلور جوبلي جو فنڪشن ۽ مھورتي تقريب، مقالن جي نشت ۽ موسيقي جي محفل تي مشتمل آهي.
انھي خوشي ۽ تاريخي نوعيت واري جشن ۽ اوهان جي موجودگي اسان لاءِ همت افزائي ۽ عزت افزائي جو باعث ٿيندي. ان ڪري گذارش ذريعي اوهان کي اڳواٽ اطلاع ٿو ڏجي تہ مٿي ڄاڻايل تاريخون اوهان پنھنجون مصروفيتون معتل ڪري، جشن لاءِ وقت ڪڍڻ فرمائيندا. جشن جو تفصيلي پروگرام دعوت نامو ستت ئي اوهان جي خدمت ۾ پيش ڪيو ويندو.
اوهان جي ٿورائتي
مھتاب اڪبر راشدي
ڊائريڪٽر انچارج
انسٽيٽيوٽ آف سنڌ الاجي ڄام شورو