1982
هن ڌرتي جا دودا جاڳيا، جاڳيو دريا خان وري
هن ڌرتي جي مٽي لھندي، مرڪي پنھنجو مان وري
(نياز همايوني )
سنڌي ٻارڙن جي علمي ۽ ادبي تنظيم
سنڌي ٻارڙا سنگت سنڌ
مرڪزي آفيس، سينٽرل جيل حيدرآباد
تاريخ : 1982 – 6 - 10
پيارا ڀاءُ!
جيئي سنڌ! گذريل ستن مھينن کان سينٽرل جيل حيدرآباد ۾ آهيان. پيو وقت گذري. اڃا ڪچو آهيان. ڪابہ سزا وغيرہ ڪانہ ملي آهي. ”ڏکيون جان نہ مڙن“ تي ڇاپو هنيائون. اسان جي هڪڙي دوست عين موقعي تي اهو ڪم ڪرايو. جنھن وقت ڪتاب بائنڊ پيو ٿئي. خير پرواھہ ئي ڪانھي. افسوس رڳو پنھنجن ماڻھن تي آهي.
مان هتي بہ لکڻ پڙهڻ جي ڪم کي لڳو پيو آهيان. مون کي مھرباني ڪري هن موضوع تي ڪجهہ معلومات تمام جلد موڪلي ڏيندا تہ هندستان جي ڪھڙن حڪمرانن سنڌ تي حملو ڪيو ۽ انھن جا نالا ۽ تفصيل تمام ترت موڪليندا تہ احسان مند رهندس. اسان مڙئي تاريخ کان گهٽ واقف آهيون.
۽ ٻيو عرض تہ ڪجهہ وقت اڳ مون وڪري لاءِ ڪجهہ رسالا موڪليا هئا، انھن جو نہ معلوم ڇا ٿيو. جيڪڏهن وڪرو ٿيا هجن تہ پئسن جي گهرج آهي. جيڪڏهن نہ تہ ٺھيو. پئسا ڳوٺ موڪلجو. سن ضلع دادو سنڌ ۽ خط پڻ هن ايڊريس تي ، خميسو خان ميمڻ ، سن ضلع دادو سنڌ. جيڪڏهن پئسا نہ هجن تہ تڏهن بہ ضروري ناهن. پر اها ڄاڻ ضروري ۽ تمام ضروري آهي.
سنگت کي سلام
اوهان جو
ناز سنائي
75
سھہ ماهي سنڌ
98 – اي – لطيف آباد نمبر 10 ، حيدرآباد سنڌ
تاريخ : 1982 – 9 – 22
سائين دادا سنڌي صاحب
اسلام عليڪم! اميد تہ خوش هوندا.
اوهان جو مضمون پھتو. پڙهيم، وڏي مھرباني جو قلمي تعاون ڪيو.
مضمون تي منھنجا هيٺيان ريمارڪس گوش گذار ڪندا.
• محنت سٺي آهي.
• گهڻو ڪري اڪتفا گرامي صاحب واري مضمون تي آهي. جيڪو دهرايو ويو آهي.
• ڪاما، فل اسٽاپ، وغيرہ جو صفا خيال نہ رکيو ويو آهي.
• مضمون فيئر ڪندي / لکندي تڪڙ کان ڪم ورتو ويو آهي، جو ڪٿي ڪٿي ڌڪ ٿو لڳي.
• ڪجهہ لفظ ڌاريا آهن. جن جا متبادل سنڌي ۾ هئا.جيئن ( ۽ ڪجهہ صحيح ناهن لکيل )
پوتر = پاڪ
سندر = سھڻو
مورغ = مورخ ( ٿي سگهي ٿو تڪڙ ڪري ٿيو هجي ).
حتاڪ = حتى ڪہ
گواھہ = شاهد
جيالن سپاهين = سورهين
سعودي عرب = عربستان ( انھي ڪري جو جنھن دور جي ڳالھہ ڪندي سعودي عرب جو لفظ استعمال ڪيو ويو آهي. ان وقت سعودي عرب جو وجود نہ هئو. سعودي عرب شاھہ سعود کان پوءِ ٺھيو )
سپرد = حوالي
درياءَ = درياھہ
وه ئي = وهي
هت = هتي
جن مان = جن مان
ناپسندگي = ناپسنديدگي
سنگ ميل = ميل جو پٿر ( وغيرہ )
اجازت هجي تہ مٿين تجويزن جي روشني ۾ صحيح ڪري، مضمون هن ئي پرچي ۾ هلائجي. باقي هونئن مضمون تمام سٺو آهي. قلمي تعاون لاءِ وڏي مھرباني.
اوهان جو
انور جوکيو
58
سھہ ماهي سنڌ
98 – اي – لطيف آباد نمبر 10 ، حيدرآباد سنڌ
تاريخ : 1982 –11 – 07
پيارا جناب دادا سنڌي صاحب.
اسلام عليڪم
اميد تہ خيريت هوندي.
طويل خط مليو. مھرباني جو ڪتاب تي پنھنجي راءِ کان آگاھہ ڪيو. توهان جا مشورا ۽ تجويزون وڻيون. البت ڪي ڪي لفظ اهڙا تصيح ڪرڻ لاءِ تجويزون ڏنيون آهن، جيڪي منھنجا ناهن. بلڪہ انھن ايڊيٽوريل نوٽن منجهان ڪوريل آهن، جيڪي ڪتاب ۾ جاءِ بجاءِ ڏنا ويا آهن. اهي ايڊيٽوريل نوٽ اسان جيئن آهن تئين ڏنا آهن. بلاشبہ انھن ۾ قابل صلاح جڳهون آهن.
اوهان جو مقالو اڄ ڇپجي پورو ٿيو. هڪ مون ٻي گستاخي بہ ڪئي آهي، اها هيءَ آهي تہ مقالي جو عنوان توهان ” حضور صه ۽ سنڌ “ لکيو هو، پر مون ان کي زيادہ جاذب ۽ وڻندڙ ڪرڻ لاءِ ” سرور عالم صه ۽ سنڌ “ ڪري لکيو آهي. اميد تہ هي حجت قبول پوندي.
ٻئي پرچي لاءِ ڪو مقالو تيار ڪندا. پر موضوع اهڙو چونڊجو، جھڙو هن ڀيري آهي. هن ڀيري مقالن جي حصي ۾ اوهان جي مقالي جو ڪر مٿاهون آهي ۽ سنڌ ۾ ڇپيندي فخر ٿو محسوس ٿئي.
زيادہ سلام
نياز مند
انور جوکيو