1994
دادو
1994 – 4 – 16
محترم دادا سنڌي صاحب
اسلام عليڪم!
سائين نوازش ڀريو خط مليو. تنھن لاءِ مھرباني . سائين ڪتاب موڪلجي ٿو. ڪتاب جي قيمت 60 روپيہ ۽ وي پي جو خرچ 14 روپيا . ٽوٽل 74 روپيا.
سائين اوهان بزرگ دعائون ڪندا تہ انشاءَ ﷲ ٻيو ڪتاب سياست جي پھلو سان يا ادبي پھلو سان آڻيندس. مواد کي سھيڙي رهيو آهيان. صرف اوهان صاحبن جي دعائن جي ضرورت آهي.
انھي طرف ڪڏهن اچڻ ٿيو تہ انشاءَﷲ ملاقات ڪرڻ ايندس. اوهان جي ملاقات جو ڏاڍو شوق آهي. ساٿ رهيو تہ ملاقات ٿيندي.
سلام سڀني دوستن احبابن کي چوندا.
والسلام
اوهان جو مخلص ڀاءُ
ڊاڪٽر لياقت علي مگسي
بي، 42 مکي گهٽي پراڻي چوڪ دادو
154
دعوہ اڪيڊمي بين الاقوامي يونيورسٽي اسلام آباد
اسلام آباد
1994- 8 – 9
مڪرمي و محترمي جناب دادا صاحب
اسلام عليڪم!
خيريت سدائين مطلوب. گرامي نامون لکيل 3 جولائي 94 ع تي وصول ٿيو. ڪتاب المرتضى جو ترجمو ڪرڻ تي آمادگي سان خوشي ٿي. اڪيڊمي لاءِ اهو سٺو علمي سرمايو ٿيندو.
توهان سان ملاقات لاءِ دل تہ منھنجي بہ گهري ٿي. بس جو ڪو موقعو نڪري اچي. پر هاڻي اڪيڊمي وارن پروگرام هڪ تہ محدود ڪري ڇڏيا آهن، ٻيو علاقائي پروگرام بدران ملڪي سطح جا ڪيا آهن. ٽيون وري عمر جو شرط بہ لڳايل آهي. انھن مجبورين لاءِ توهان لاءِ ڏکيائي آهي. تنھن هوندي آئندہ ڪوشش ڪبي.
في الحال ” اسلام کي عروج و زوال کا عالمي دنيا پر اثر“ ترجمي جي اسڪيم ۾ رکيل نہ آهي. آئندہ اسڪيم ۾ شامل ٿيو تہ توهان کي ترجيح ڏبي. سيرت صحابہ سيد علي مير شاھہ موڪلڻ جي ڪوشش ڪندس.
اسلامي بيداري ڪمپوزنگ لاءِ ڏنو ويو آهي. اڪيڊمي جا ڪم بہ سرڪاري ادارن وارا آهن. ان ڪري بعض وقت هڪ ڪتاب جي ڇپجڻ تي ورهيہ لڳي وڃن ٿا.
اميد تہ توهان خير و عافيت سان هوندا ۽ اصلاح ذات ۽ اصلاح ملت جي ڪم ۾ مصروف هوندا. برادر عبدالرزاق ڊکڻ کي سلام.
نوٽ : توهان لاءِ ترجمي جو نمونو موڪلڻ جي ضرورت ناهي. بس ترجمو مڪمل هڪ ڀيرو پڙهي مسودو موڪليو.
سلام
اوهان جو
اميرالدين مھر
155
دعوہ اڪيڊمي بين الاقوامي يونيورسٽي اسلام آباد
اسلام آباد
1994- 9 – 24
مڪرمي و محترمي جناب دادا صاحب
اسلام عليڪم!
خيريت سدائين مطلوب. گرامي نامون لکيل 20 سيپٽمبر 94 ع تي وصول ٿيو.
اوهان جي خيريت ۽ مصروفيت جو پڙهي خوشي ٿي ۽ اطمينان ٿيو. المرتضى جو ترجمو جاري رکندا. اهو سنڌي ادب ۾ سٺو واڌارو ٿيندو.
ايگريمينٽ جو فارم اصولي طرح اسان وٽ ئي رهندو ۽ اڳتي دفتري ريڪارڊ جي ضرورت پوري ڪرڻ ۾ ڪم ڏيندو.
اڄڪلھہ مون وٽ دعوہ لٽريچر جي تياري ۾ ئي مصروف آهيان ۽ ٻي ڪا ذميواري حوالي نہ آهي. هن وقت ڇپيل، ڪمپوز ٿيل، ڪمپوزنگ لاءِ ويل ۽ تيار ڪتاب گڏائي سوکن ٿي ويندا. وڌيڪ ڪم هلي پيو. دعا ڪندا تہ جيڪو وقت مليو آهي، سو ڪارآمد نموني ڪتب اچي ۽ ڪو ديني ڪم ٿي پوي.
السنڌ پڙهندا آهيو يا نہ؟ ان لاءِ ڪجهہ لکو ۽ ڪو تبصرو موڪليو.
احباب کي سلام خاص طرح عبدالرزاق ڊکڻ صاحب کي تمام گهڻا سلام.
و السلام
اوهان جو
اميرالدين مھر