1995
ڪنڌڪوٽ
1995 – 1 – 12
مڪرمي و محترم دادا سنڌي صاحب!
اسلام عليڪم!
عرض تہ اوهان جو عنايت نامون پھتو. جواب ۾ تاخير ٿي وئي. ان لاءِ معزت خواھہ آهيان.
اوهان حافظ الملت ڪانفرنس ۾ پڙهيل مقالہ اشاعت لاءِ ماهنامہ السند اسلام آباد کي رسال ڪندا. انشاءَﷲ شايع ٿي ويندو. مان بہ محترم عبدالمجيد ابڙي صاحب کي خط ذريعي عرض ڪندس.
اوهان سان تفصيلي ملاقات جو بيحد اشتياق آهي. ان لاءِ انشاءَﷲ اٻاوڙي حاضر ٿبو ۽ حال احوال ڪبا.
اميد تہ اوهان خيريت سان هوندا.
والسلام
خاڪسار
عبدالخالق سھرياڻي
ڪنڌڪوٽ
157
سچل سرمست يادگار ڪميٽي خيرپور
خيرپور ميرس
1995 – 1 – 22
محترم سائين دادا سنڌي صاحب!
اسلام عليڪم! گذريل سالن جي روايت موجب هن سال بہ حضرت سچل سرمست جي عرس جي موقعي تي هڪ ادبي ڪانفرنس جو پروگرام رٿيو ويو آهي.
اوهان ۾ وڏي اميد ڀائيندي عرض آهي تہ پنھنجي علمي ونڊ مان اسان کي ڪجهہ پرائڻ جو موقعو ڏيو.
اوهان پنھنجو مقالو / شعر پاڻ سان ضرور آڻيندا تہ جيئن اوهان جي ان شاهڪار کي ” سرمست “ سلسلي جي ايندڙ اشاعت ۾ ڇپرائي سگهون.
ادبي ڪانفرنس جو سٽاءُ هن ريت آهي.
تاريخ : 15 رمضان المبارڪ
هنڌ : سچل آڊيٽوريم خيرپور
مقالا : 2 بجہ منجهند
مشاعرو : 8 بجہ رات
اوهان طرفان شرڪت وارو اطلاع، اسان کي اوهان جي رهائش لاءِ مناسب انتظام ڪرڻ ۾ سھوليت ڏيندو.
هاڪاري جواب جو منتظر
محمد علي حداد
حداد منزل پنج هٽي خيرپور ميرس
158
حيدرآباد
1995 – 03 – 20
ادا سائين
سداسلامت. خط پھتو،يادگيري لاءِ مھرباني. تاريخ بابت ڪتاب ڇپڻ وارا روز بروز گهٽبا پيا وڃن. ان ڪري ڪتاب ڪھڙا لکي ڪھڙا لکجن؟ ناز وٽ چئن سالن کان سنڌي ادب پيل آهي. سال کان پوءِ اهو پريس ۾ آيو. چئي نہ ٿو سگهجي تہ اهو ڪڏهن شايع ٿيندو ۽ ڪيئن ڇپبو؟ اوهان جو ڪتاب بہ بلڪل تيار آهي. ڇپجي تہ ٻن ڏينھن ۾ تيار ٿي سگهي ٿو. بھر حال سنيھو اکين سان پھچائبو.
ناشاد صاحب وٽ اوهان لاءِ گهڻي عزت آهي. خاص ڪري سکر ۾ اوهان هن جي تائيد ۾ جيڪو ٺھراءُ پاس ڪرايو هو. ان بعد اوهان جي گهڻي اون رکي ٿو. آڳاٽو بہ اوهان جي ڪتاب لاءِ تبصري لاءِ کيس چيم تہ ها ڪئي هئائين. پر اوهان دلچسپي نہ ورتي. اوهين کيس مقالو موڪلي ڏيو. آءُ بہ هن کي چوندس. دلجاءِ ڪندا.
سنڌ جي معدنيات بابت ڪتاب مون کي نہ ٿو سونھي. البتہ مھراڻ يونيورسٽي ۾ ڪو پروفيسر هو، سال ڏيڍ ٿيو تہ سنڌ جي ايڪسپورٽ ٿيندڙ شين تي انگريزي ۾ ڪتابڙو لکيو هو. ان جي مھورت خورشيد شاھہ ڪئي هئي. مون ڪافي ڪوشش ڪئي، پر مون کي ڪتاب هٿ نہ اچي سگهيو. اهو همراه واقعي هاڻي سنڌ سرڪار ۾ وڏو آفيسر آهي.
ڪلھوڙن وارو سيمينار نومبر تائين ملتوي ٿي ويو آهي. آءُ انگريزي وارو شرط ڪڍرائيندس. ان بابت ڌڻين سان جهيڙو ڪبو. اوهين دلي تياري ڪيو.
مھراڻ جي ايندڙ پرچي ۾ ” اروڙ “ بابت منھنجو ليک اچي پيو. وري بہ گذارش آهي تہ نفيس صاحب کي اوهان بلاڌڙڪ ليک موڪليو. اوهان لاءِ کيس گهڻيون نيڪ تمنائون آهن. بلڪل تسلى ڪندا.
والسلام
هر صاحب کي سلام چوندا.
اوهان جو مخلص
غلام محمد لاکو
159
سنڌ نيشنل اڪيڊمي ٽرسٽ
پوسٽ باڪس نمبر 258 حيدرآباد ( سنڌ )
حيدرآباد
1995 – 7 – 3
برادرم محترم دادا سنڌي صاحب
اسلام عليڪم!
خدا ڪري اوهان ڏانھن خيريت هجي. اوهان کي هڪڙي زحمت ڏئي رهيو آهيان. اميد تہ نيڪي جي هن ڪم ۾ تعاون ڪرڻ فرمائيندا. هڪ اداري جي تعاون سان اسين سنڌي ۾ تبليغي نصاب ترجمو ڪري ڪمپيوٽر تي ڪمپوز ڪرائي شايع ڪري رهيا آهيون. مختلف حصا مختلف دوست ترجما ڪري رهيا آهن. ٽي حصا ترجمو ٿي چڪا آهن. ڪمپوز بہ ٿي چڪا آهن. هڪ حصو رهيل آهي. ڪتاب جو هرهڪ حصو ڌار ڪتاب وانگر شمار ٿيندو. جنھن ۾ منصف ۽ مترجم جو نالو پڻ ايندو. هن حصي جي ترجمي لاءِ ڊوڙي ڦري اوهان ڏانھن وڃي رهي آهي. ماشاءَﷲ اوهان جي يارن تعاون جي پيشڪش پڻ ڪئي آهي. ارجنٽ ڊاڪ ذريعي مواد رسال خدمت ڪري رهيو آهيان.
جيئن تہ ڪافي جلدي آهي، ان ڪري توقع آهي تہ اوهان وقت ڪم شروع ڪرڻ فرمائيندا. اميد تہ صورتحال واقف ڪرڻ فرمائيندا. ڪتاب جو هي حصو فضائل ذڪر تي مشتمل آهي.
خدا ڪري اوهان ڏانھن خيريت هجي.
والسلام
اوهان جو پنھنجو
محمد موسى ڀٽو
160
SEMINAR
“KALHORA GOVERNANCE ON SINDH”
1995
ORGANISING COMMITTEE
Karachi
04 – 07 – 1996
Mr. Kareem Bakhsh Soomro
( Dada Sindhi )
Subject Specialist
Govt. Higher Sec. School,
Ubauro.
Sub:- SEMINAR ON “ KALHORA RULE IN SINDH.
Ref:- Our last letter dated 16.1.1995 adressed to you in reference to you letter dated: 7. 1 . 1995.
The seminar will be inaugurated on 15th sept. 1996 and concluded on 16th sept , 96 in local hotel at Karachi. The exact venue of the seminar is under consideration and most probably it will be organized in one of the five star hotel at Karachi.
You are requested to you to kindly prepare your research paper and send its copy for scrutiny by the subject committee. You may also send you bio-data alongwith three pass port size photographs at an early date.
An early response will be highly appreciated.
Yakoob Ali Zardari
Secretory
Seminar Organizing Committee
161
سنڌ نيشنل اڪيڊمي ٽرسٽ
پوسٽ باڪس نمبر 258 حيدرآباد ( سنڌ )
حيدرآباد
1995 – 7 – 10
برادرم محترم دادا سنڌي صاحب
اسلام عليڪم! خدا ڪري اوهان ڏانھن خيريت هجي.
اوهان جو جون جو ڪتاب نامو مليو. اوهان جي ڪتاب لاءِ پڻ ياد دهاني ڪرڻ فرمائي آهي. چار پنج ڏينھن اڳ هڪ ڪتاب ارسال ڪري چڪو آهيان. جيئن تہ اسڪولن کي موڪل آهي. ان ڪري خطرو هو تہ شايد رجسٽري اوهان کي نہ ملي سگهي. ان ڪري برادرم عبدالقدير ڪاڃون کي خط لکي ڇڏيو هيم تہ اوهان کي معلومات ڪرڻ فرمائي.
اميد تہ مواد ملي چڪو هوندو. جيئن تہ اهو هڪ مڪمل ڪتاب آهي ۽ جلدي آڻڻ جو پروگرام آهي. ان ڪري اميد تہ ترجمي لاءِ جلد وقت ڪڍڻ فرمائيندا.
خط جي سلسلي ۾ عرض هي آهي تہ ٻن شمارن جا خط ڪافي گڏ ٿي ويا آهن. هن شماري ۾ اهي خط ڏيڻ ضروري آهن. ڪوشش ڪجي تہ توهان جو خط جو خلاصو اچي وڃي. اميد تہ ناراض نہ ٿيندا. تفصيلي خط ۽ ان جي جواب ۾ اهو بہ حجاب آهيان تہ قارئين هڪ کي ئي دوست هن رسالي ۾ ايڏي ڊگهي خط وڪتابت کي شايد پسند نہ ڪن.
اصل ۾ ئي پنھنجي جوابي خط ۾ جيڪي ڳالھيون لکيون آهن. اهي اوهان کي خطاب ڪندي نہ لکيون آهن. بلڪہ هن عاجز ضرورت محسوس ڪئي تہ ان موضوع تي ضرور لکيو وڃي. اوهان جي خط ان جو بھانو فراهم ڪيو . اسان جا ڪيترائي دوست ان موضوع تي منجهيل آهن. سندس توانايون غلط سمت ۾ مصروف رهيون آهن. انھن جي وضاحت لاءِ اهي نڪتا اڃان تفصيل سان اچڻ گهرجن. ترجمي جي باري ۾ اوهان جي جواب جو انتظار رهندو.
خدا ڪري اوهان خيريت سان هجو.
والسلام
اوهان جو
محمد موسى ڀٽو
162
سنڌ نيشنل اڪيڊمي ٽرسٽ
پوسٽ باڪس نمبر 258 حيدرآباد ( سنڌ )
حيدرآباد
1995 –09– 20
برادرم محترم دادا سنڌي صاحب
اسلام عليڪم! خدا ڪري اوهان ڏانھن خيريت هجي.
اوهان جو عنايت نامو ۽ مولانا امروٽي جي تحريڪن تي مشتمل مضمون مليو. مضمون نھايت معلوماتي ۽ تحقيقي آهي. اهڙو مضمون آهي جيڪو ڇپجڻ وٽان آهي. پر بيداري جيئن تہ تحقيق بيداري جو مقصد ناهي. پر ان جو دائروڪار جديد رخ ۾ نوجوانن جي رهنمائي ۽ ملت اسلاميہ جي باري ۾ ذهن سازي ۽ مذهبي طبقي کي دور جديد جي سکن ۽ خطرن کان واقف ڪرڻ آهي. هي اهي مقاصد آهن، جيڪي بيداري جي پيش نظر آهن. وقت نہ هجڻ سبب ان سلسلي ۾ وڌيڪ تفصيل لکڻ کان معذوري آهي. ڪوشش ڪبي گنجائش ٿي سگهي تہ مضمون شامل ڪبو. ٻي صورت ۾ پيشگي معذرت قبول ڪرڻ فرمائيندا.
مولانا عبدالقدوس صاحب ڏانھن رسالا موڪلجن ٿا ۽ مستقل طور اشاعتي رسالو موڪليو ويندو. محمد بن قاسم ۽ راجا ڏاهر وارو ڪتاب موڪلجي ٿو.
والسلام
اوهان جو
محمد موسى ڀٽو
163
دعوہ اڪيڊمي بين الاقوامي يونيورسٽي اسلام آباد
اسلام آباد
1995- 9 – 24
مڪرمي و محترمي جناب دادا صاحب
اسلام عليڪم!
اوهان جا ٽي خط منھنجي ذمي پيل آهن. جواب ڏيڻ ۾ ڪن اڻ ٽر مجبورين جي ڪري دير ٿي آهي. ان لاءِ معافي جو طلب گار آهيان. توهان جھڙي اديب ۽ علمي ۽ باغ بھار شخصيت کي بہ وقت سر جواب نہ لکڻ جو بھرحال منھنجي دل تي بہ بار آهي. ان لاءِ وري بہ گذارش آهي تہ درگزر فرمائيندا ۽ معافي ڏيندا.
دراصل منھنجي حوالي تربيت اٿم، ڪورس جو ڪم ڪيو ويو آهي. ٻئي طرف عبدالوهاب مڱريو هتان ڇڏي ڪيڊٽ ڪاليج لاڙڪاڻي ۾ ليڪچرار ٿي ويو آهي. ان ڪري سنڌي شعبي ۾ جھڙوڪ ڪوبہ نہ آهي. ڏسجي تہ ڪڏهن ٿو جوڳو بندوبست ٿئي.
توهان جو ترجمو ( المرتضى ) ڪجهہ پڙهيم. الحمدﷲ بھترين ترجمو آهي. ان ۾ رواني، سلاست ۽ شيريني پڻ موجود آهي. هاڻي دعا ڪريو تہ ڇپجڻ جو وارو اچي وڃي.
هڪ ٻيو اهم ڪتاب ترجمي لاءِ ڊي جي منظور ڪيو آهي. اهو سگهو ئي موڪليندس. اميد تہ ترجمو ڪندا. شايد اهو ڪتاب المرتضى کان بہ اڳ ۾ ڇپجي وڃي.
ڪي نوان سنڌي ڪتاب ڇپجي آيا آهن. ڪوشش ڪندس تہ اهي ذخيم هديو ڪري موڪليان.
سائين اڪيلي سر آهيان. تربيت اٿم ڪورس جي ذميواري، پڙهائڻ ۽ سنڌي جو ڪم سڀ اڪيلي سر ڪرڻا پون ٿا. ان ڪري بروقت ڪم نہ ٿو ٿئي.
احباب کي سلام ۽ دعائون.
والسلام
اوهان جو
اميرالدين مھر
164
چڪ
1995 – 12 – 5
اسلام علڪيم!
سائين حق موجود
عرض تہ مان ۽ غلام محمد غازي جو توهان وٽ اچڻ ٿيو. پر بدقسمتي سان توهان موجود نہ هئا. هن کان اڳ اوهان ڏانھن خط لکيو هو.
بھرحال سائين عرض هي آهي تہ اسان ” غلام محمد غازي ۽ گوهر سنڌي “ جن سان 1995 – 12 – 14 تي هاءِ اسڪول چڪ ۾ شام ملھائي رهيا آهيون. اوهان کي مقالن جي صدارت ڪرڻي آهي. ڪارڊ اوهان کي پوسٽ جي ذريعي ملي ويندو. پيشگي اطلاع اوهان کي ڏجي ٿو. اميد اٿم تہ مايوس نہ ڪندا ۽ غازي جي شاعري تي مقالو لکڻ جي ڪوشش ڪندا. سرڪش سنڌي، وسيم سومرو، ادل ۽ ٻيا ڪافي دوست ايندا.
مھرباني
خادم
رحيم داد راهي سومرو
165
سکر
1995 – 12 – 11
مانوارا سائين دادا سنڌي
اسلام عليڪم!
سنڌ جي سرتاج شاعر سنڌي ٻولي جي محسن حضرت شاھہ عبداللطيف ڀٽائي جا سنڌ تي لک لائق ۽ احسان آهن، جو سڄي سنڌ جو دورو ڪري اسان کي پنھنجو رسالو پيغام جي حيثيت سان ڏنو آهي.
حضرت شاھہ عبداللطيف ڀٽائي جي اتر ۾ سير وسفر بابت هڪ ڪتاب ” اتر ۾ ڀٽائي جا تڪيا “ جي عنوان سان لکڻ جي ڪوشش ڪئي اٿم، اميد تہ پروردگار ڪاميابي نصيب ڪندو.
جيئن تہ اوهان سڃاڻ، اديب، شاعر ۽ دانشور آهيو، ان ڪري ان سلسلي ۾ اوهان کي نماڻي گذارش آهي تہ جيڪڏهن اوهان جي ڳوٺ، وانڍ، شھر يا تعلقي جي اندر ڪٿي ڪو ” ڀٽائي جو تڪيو “، ” ڀٽائي جو لوڙهو “ يا ” ڀٽائي جو اوتارو “ هجي يا توهان کي ڪابہ معلومات هجي تہ ان متعلق اوهان قرب ڪري اهڙو ڏس ڏيندا تہ جيئن اتي پھچي اوهان جي مدد سان بنيادي معلومات حاصل ڪري سگهجي. فوٽو ڪڍرائي سگهجن ۽ بزرگن جا انٽرويو رڪارڊ ڪري سگهجن.
هن ادبي ڪم ۾ اوهان جي سھڪار لاءِ مان اوهان جو ٿورائتو رهندس.
دعاگو
ابڙو نصرت حسين پيراڻي
ڊائريڪٽر انفارميشن
سکر ڊويزن، ايٽ سکر