1988
شڪارپور ڊسٽرڪٽ هسٽاريڪل سوسائٽي شڪارپور ( سنڌ )
1988- 09 – 18
محترمي دادا سنڌي
اسلام عليڪم!
جيئن تہ اوهان ان ڳالھہ کان بخوبي واقف آهيو تہ سنڌي زبان ۾ ڪوبہ اهڙو رسالو يا ڪتابي سلسلو نہ آهي. جنھن ۾ سنڌ جي عالمن ۽ محققن جا سنڌ جي تاريخ ۽ ان سان واسطو رکندڙ موضوعن تي لکيل تحقيقي مقالا ۽ مضمون شايع ٿي سگهن. جنھن جي ڪري نہ صرف عالمن ۽ اديبن کي وڏي محنت سان لکيل شهپارن کي ڇپائڻ ۾ دشواري ٿئي ٿي، بلڪہ اڄ جو نوجوان، جيڪو پنھنجي تاريخ کي پڙهڻ ۾ دلچسپي رکي ٿو، ان کي پڻ اهڙو مواد دستياب ٿي نہ ٿو سگهي، جنھن مان هو سنڌ جي تاريخ جي ڄاڻ حاصل ڪري سگهي.
انھي کي پوري ڪرڻ لاءِ شڪارپور ڊسٽرڪٽ هيسٽاريڪل سوسائٽي پاران پنھنجي اشاعتي پروگرام پٽاندر هڪ ڪتابي سلسلو ” سنڌ هسٽاريڪل ريسرچ سيريز“ شايع ڪرڻ جو فيصلو ڪيو آهي. جنھن ۾ سنڌ جي تاريخ، آثار قديمه، سنڌي ٻولي ۽ ادب جي تاريخ ۽ سنڌ جي تاريخ ساز شخصيتن تي ملڪي ۽ غير ملڪي عالمن ۽ محققن جا لکيل تحقيقي مقالا ۽ مضمون شايع ڪيا ويندا.
انھي سلسلي ۾ اوهان کي گذارش ڪجي ٿي تہ مٿي ڏنل موضوعن مان ڪنھن تي بہ تحقيقي مقالو يا مضمون لکي ڏياري موڪليندا تہ جيئن رسالي کي پيش بھا مواد سان سينگاري ۽ سنواري پڙهندڙن آڏو جلد پيش ڪري سگهون.
اسان کي اميد آهي تہ اوهان اسان جي اداري سان قلمي سھڪار ڪري ٿورائتو ڪندا.
خليل مورياڻي
مورياڻي محلو
شڪارپور ( سنڌ )
110
شڪارپور
1988ع – 9 – 21
خوش هجو شال
جناب محترم دادا سنڌي صاحب
اسلام عليڪم!
گذارش هيءَ آهي تہ مان هن خط ۾ توهان کي ٻہ خوشخبريون ٻڌائڻ چاهيان ٿو، جيڪي هن طرح آهن.
پھرين: سنڌي ساهت سوسائٽي شڪارپور وارن جو ريشمي رومال تحريڪ ۾ سنڌ جو حصو متعلق هڪ ڪتاب ڇپجي تيار ٿيڻ وارو آهي، ان ۾ توهان جو اهو مقالو شامل آهي. جيڪو ماهوار ” پيغام “ ڪراچي ۾ ڇپيو هو. اهو مقالو مذڪوره بالا ڪتاب ۾ توهان جي نالي سان آهي.
ٻي : اها تہ سنڌي ساهت سوسائٽي وارا هڪ ٻيو ڪتاب بعنوان ” هجرت تحريڪ ۾ سنڌ جو حصو “ شايع ڪرائڻ گهرن ٿا. انھن جي اها خواهش آهي تہ ان ڪتاب ۾ توهان جو مقالو هجڻ گهرجي. ان ڪري توهان کي گذارش ٿي ڪجي تہ توهان مھرباني ڪري پنھنجو قيمتي مقالو ” هجرت تحريڪ ۾ سنڌ جو حصو “ 30 آڪٽوبر 1988ع تائين هيٺ ڄاڻايل ائڊريس تي ڪري موڪلي ڏيندا تہ جيئن ان ڪتاب ۾ اهو شامل ڪيو وڃي. اميد تہ توهان اثبات ۾ جواب ڏيندا. زيادہ خير والسلام.
نوٽ: هن خط جو جلد جواب ڏيندا، جوابي لفافو بہ موڪلجي ٿو.
خيرانديش
پروفيسر عبدالرحمن جتوئي
ڀٽي محلو، صدر شڪارپور سنڌ
111
شڪارپور ڊسٽرڪٽ هسٽاريڪل سوسائٽي شڪارپور ( سنڌ )
1988 – 10 – 25
محترم دادا سنڌي صاحب!
اسلام عليڪم!
گذارش تہ اوهان جو موڪليل مضمون بعنوان ” ڏيٿري “ مليو. انھيءَ لاءِ اسان اوهان جا بيحد ٿورائتا آهيون. مضمون گهڻي محنت سان لکيل آهي ۽ اوهان انھيءَ مضمون تي وقتائتو قلم کنيو آهي. جنھن مان تاريخ ۽ آثار قديمه سان دلچسپي رکندڙن کي لاڀ ملندو. جيئن تہ اوهان ان ڳالھہ کان بخوبي واقف آهيو تہ اسان جي سوسائٽي طرفان شايع ٿيندڙ هسٽاريڪل جرنل، جديد ۽ سائنسي بنياد تي تحقيق ٿيندڙ مواد تي مشتمل هوندو، انھيءَ ڪري اسان جي ڪوشش آهي تہ اهڙو مواد شايع ڪريون جيڪو بلڪل ٺوس هجي.
انھيءَ سلسلي ۾ عرض آهي تہ اوهان جو لکيل مضمون هيئنر بہ قابل اشاعت آهي، مگر اوهان انھيءَ مضمون کي وڌيڪ جامع ڪري وڌايو تہ بھتر ٿيندو، جيئن انھيءَ مان تاريخ جي پڙهندڙن کي اڃان وڌيڪ ڄاڻ ملي سگهي. ٻيو عرض آهي تہ اوهان مضمون جي صفحي 11 تي مسٽر لوئس فليم جو حوالو ڏنو آهي. مگر اهو ڪونہ ڄاڻايو آهي تہ اها لکت مسٽر فليم جي ڪٿي ڇپيل آهي. ( فليم انگريز نہ بلڪہ آمريڪي آهي )۽ ساڳئي طرح مرحوم لطف ﷲ بدوي صاحب جي حوالي بابت بہ ڪونہ لکيل آهي تہ بدوي صاحب اهو ڪٿي لکيو آهي ۽ ماخڊن ۾ بہ بدوي صاحب جو ذڪر ڪيل ڪونہ آهي. جيڪڏهن اوهان کي تڪليف نہ ٿئي تہ مضمون ۾ اهڙي قسم جا واڌارا ۽ سڌارا ڪري موڪليو تہ اوهان جي مھرباني ٿيندي ۽ مھرباني کان علاوہ ماخذن کي بہ ترتيبوار حوالي سان لکو تہ بھتر ٿيندو.
اسان اوهان جا وري بہ ٿورائتا آهيون جو اوهان اسان سان قلمي سھڪار ڪري ادب دوستي ۽ تاريخ دوستي جو ثبوت ڏنو آهي ۽ اهڙي اميد آئيندہ لاءِ پڻ رکون ٿا.
اوهان جو
خليل مورياڻي