1976
پوسٽ ٻيرڙي وايا گهوٽڪي
1976 – 4 – 7
برادرم دادا سنڌي
وعليڪم سلام ورحمتہ ﷲ وبرڪاتہ!!
اوهان جو ڳوٺائي رشيد جونيئر پيارو نوجوان آهي. اوهان جا سلام ۽ رشيد جو ڪلام ٻڌي ڏاڍي خوشي ٿي. مدت کان پوءِ سلام مليا آهن. اميد تہ اهو سلسلو مسلسل رهندو.
يار! اسان تقريباً ادبي دنيا کان ڪٽجي چُڪا آهيون. اوهان انھي ماحول سان مربوط آهيو. ڇا حال آهي؟ لکو ٿا يا لکڻ بند ڪيو اٿئو. ڀلا ڪو ڪتاب ٻتاب تصنيف يا تاليف ٿئي ٿو يا نہ ؟ مان سمجهان ٿو تہ ڪو نہ ڪو ڪتاب لکي رهيا هوندا. قادربخش هڪ ڏينھن گهوٽڪي ۾ مليو هو. ان کي سلام ڏنا هئم. خبر ناهي ان اوهان کي پيغام ڏنو يا نہ. جيڪڏهن اوهان کي سلام ڏئي ها تہ اوهان مون کي جواب ضرور لکو ها. پر هن مھانگائي ۽ ذهني انتشار جي دور ۾ 20 پئسن ۽ وقت جو ذيان ڏاڍو مشڪل آهي. مون ٻڌو آهي تہ توهان پڪا سوشلسٽ ٿي ويا آهيو. نيشلسٽ سوشلسٽ. ڇا ائين آهي؟ جيڪڏهن ائين آهي تہ وڏو افسوس آهي. اوهان جھڙو باشعور ۽ بھترين اديب اها آئوٽ آف ڊيٽ لائين اختيار ڪري. هن وقت سڀئي سوشلسٽ ، بشمول ڪميونسٽ دانشور اسلام متعلق سوچي رهيا آهن ۽ سمجهي رهيا آهن تہ اسلام کان سواءِ ٻيو ڪو نظريہ ۽ نظام امن عالم جي خواب کي پورو نہ ٿو ڪري سگهي. اسان کي ڇا ٿي ويو آهي جو ٻيو رخ اختيار ڪري رهيا آهيون. خدا ڪري جو ڪجهہ مون ٻڌو آهي غلط هجي. اسلام اهو ضابطه حيات آهي. جنھن کان ٻين نظامن چند اصول ورتا آهن. انھن نظامن ۾ انھن اصولن کان سواءِ ٻيو جو ڪجهہ آهي سو سارو ناڪام ٿي چڪو آهي. اسان جي ڪاميابي اسلام سان متعلق هجڻ سان آهي. سوشلزم، ڪميونزم، نيشنلزم اهي سڀ ختم ٿي ويا. براءِ ڪرم اوهان مون کي جماعت اسلامي جي ايجنٽ جو طعنو ڏيندا، ڇو تہ اسلام جي نالي وٺندڙ کي پھريون طعنو اهو ڏنو ويندو آهي. اسان جي بدقسمتي آهي جو اسان هميشہ اُٻھرا فيصلا ڪندا آهيون ۽ نا اميد ٿي ويندا آهيون. اوهان ۾ وڏيون اميدون آهن. اوهان پنھنجي ذهن ۽ قلم سان ” ٽين دنيا “ جي نظريہ اسلام جي تبليغ ڪندا. اوهان جو اهو ڪم اوهان لاءِ ٻنھي جهانن ۾ سرخرو جو باعث بڻبو.
والسلام ، مخلص
امير بخاري
33
تاريخ : 1976 – 9 – 18
ممتاز الاطبا حڪيم محمد بخش چغتائي
آر – يو – ايم – پي ڪلاس
عزيز محترم جناب ڪريم بخش صاحب
اسلام عليڪم! عرصہ دراز کان اوهان جي خيريت جي خبر کان بي خبر آهيان.
نہ اوهان خود پاڻ تشريف وٺي آيا ۽ نہ سلام نہ پيام موڪليو. خدا معلوم ڪھڙو سبب؟
هن دفعي ڌڻي تعالى جي رحمت جي سخت سخا ڪئي ويئي ۽ بارشون ڏاڍيون پيون. هن بارش نہ رحمت جو ڪو اثر ڏيکاريو تہ وري ڪائي زحمت جو ثبوت ڏنو. اهو ڇو ٿيو؟
اوهان جي زيارت لاءِ اکيون اداس آهن. هاڻي ٻڌائيندا تہ ڪڏهن هن سڪايل اکين جي سڪ لھندي؟ اميد تہ اوهان پنھنجي خاندان سان خيريت هوندا ۽ خيريت جي خبر کان آگاھہ ڪري شڪريہ جو موقعو ڏيندا.
چڱو خدا حافظ
خير طلب
حڪيم محمد بخش چغتائي
ڏهرڪي
34
تاريخ : 1976 – 10– 13
ممتاز الاطبا حڪيم محمد بخش چغتائي
آر – يو – ايم – پي ڪلاس
عزيز محترم جناب ڪريم بخش صاحب
سلام و رحمت!
خيريت طرفين مطلوب مدام. ڪتاب حڪايت شيرين ۾ ، اوهان جو هڪ ڪارڊ پيل هو. اهو خط خدمت ۾ پيش ڪريان ها. پر اوهان فرمايو هو تہ جلد ايندس. انھيءَ دلاسي ڪارڊ اوهان جي خدمت ۾ ڪونہ موڪليو ويو.
هاڻي جڏهن اوهان جي آمد عدم تي تڏهن خط کي ضروري اوهان جي خدمت ۾ پيش ڪجي ٿو. عرض خدمت آهي تہ هاڻي ڪڏهن پنھنجي واعدي کي وفا ڪندا يعني هن فقير جي جهوپڙي ۾ قدم فرمائي زيارت ۽ ملاقات جو شرف بخشيندا.
خير طلب
حڪيم محمد بخش چغتائي، ڏهرڪي
35
فون – 3493
رشيد ڀٽي
بئريج روڊ ، سکر ( سنڌ )
تاريخ 1976 – 10 – 22
ڀاءُ دادا سنڌي
تنھنجو خط ڪالھہ ان مھل پھتو اٿم، جنھن مھل حميد سنڌي مون وٽ ويٺو هيو. مون کيس تنھنجو خط پڙهايو، هن چيو تہ ڪم سندس وس ۾ نہ آهي. پر نظاماڻي کي چئي سگهي ٿو. يا ڪنھن بہ ٻئي صورت مدد ڪري سگهي ٿو. وڌيڪ چيائين تہ دادا سنڌي مون سان 23 آڪٽوبر کان پوءِ حيدرآباد ۾ ملي تہ مان سندس پوري پوري مدد ڪندس.
سو تون حيدرآباد وڃي پنھنجو ڪم ڪرائي اچ. وڌيڪ ڪا مدد وغيرہ درڪار هجي تہ مون ملج يا خط لکج.
وڌيڪ سڀ خير ۽ عافيت
تنھنجو، رشيد ڀٽي
36
تاريخ : 1976 –11–24
ممتاز الاطبا حڪيم محمد بخش چغتائي
آر – يو – ايم – پي ڪلاس
عزيز محترم جناب ڪريم بخش صاحب
محبت نواز جي خدمت ۾ اسلام و رحمت.
هڪ عرض ڪارڊ جي صورت ۾ پيش ڪيو ويو. مگر خط جي جواب کي بغير ڪنھن شاهدن جي گرفتار ڪري قيد ڪيو. معلوم نہ آهي تہ ڇو؟ هاڻي فرمائيندا تہ منھنجي خط جي جواب کي اوهان جي سرڪار جي عاليه عدالت مان ڪڏهن معافي ملندي. اميد تہ اوهان خير و عافيت سان هوندا.
چڱو خدا حافظ
خير طلب
حڪيم محمد بخش چغتائي
ڏهرڪي
37
1976 – 12 – 16
مانوارا ڀاءُ
دادا سنڌي
راھہ ويندي، ننڍڙي ٽڪري تي ٻہ اکر لکان پيو، ڪچھري تہ ڪڏهن منھن سامھون ڪبي. مھرباني ڪري ادي سيف هٿ ” منھنجي دنيا “ لاءِ فوٽو موڪلي ڏيندا.
ننڍڙي ٽُڪر تي چٺي ، اميد تہ پنھنجي گهٽتائي نہ سمجهندا. وڌيڪ قرب
پاران
اياز گل
38
Phone : 220418 ESTABLISHED 1948
2 – SARNAGATI BUILDING , WEEKLY AZAD ( SINDHI)
PAKISTAN CHOWK
KARACHI – 1
1976 – 12 – 27
عزيز محترم سلامت هجو
وعليڪم سلام!خط پھتو ۽ احوال معلوم ٿيو. اوهان جي همٿ ۽ حوصلي افزائي جو شڪريو.
توهان جيڪي خط ۾ لکيو آهي، سو بلڪل درست آهي. ڪنھن کي ڏوھہ ڏيئي ڪنھن کي ڏجي، اسان پنھنجي طرفان ايمانداري ۽ ديانتداري سان ڪم ڪرڻ جي ڪوشش ڪندا سين، ڪاميابي ۽ ناڪامي منھنجي مالڪ جي هٿ وس آهي. هن وقت جماعت جي شروعات آهي، اڳتي هلي اوهان جھڙن اديبن، علم نواز ۽ ادب پرورن جي دستگيري رهنمائي جي ضرورت پوندي.
اميد تہ اوهان بفضل تعالي خوش خورم هوندا. دعاءِ خير سان ياد ڪندا رهندا.
والسلام
فقير علي نواز وفائي