1993
وائيس چانسلر ڊيسڪ
1993 – 1 – 3
داداسائين
قرب نامو ۽ ڪتاب مليو. اوهان جي مھرباني. سرن تي لکيل ڪتاب ڪلچر وارن وٽ ڊڳن جي تعداد ۾ موجود آهن. شل انھن جو ڪو سنڀاليندڙ پيدا ٿئي تہ ان کي چئجي. مون وٽ خود ڪيترا ڪتاب ذاتي لئبريري ۾ ڪونھن. هن سال ٻہ ڪتاب نڪتا انھن جون محدود ڪاپيون مليون اٿم.
بھرحال ٻئي ڪتاب پنھنجي حصي جا اوهان کي موڪليان پيو.
سڪ سان اوهان جو پنھنجو
حميد سنڌي
149
شڪارپور ( سنڌ )
1993 – 1 – 9
محترم سائين دادا سنڌي صاحب
اسلام عليڪم!
اميد تہ ﷲ تعالى جي فضل و ڪرم سان اوهان پنھنجي سٿ سميت خوش هوندا.
سردار احمد گڏاڻي کان اوهان جا سلام پھتا. اوهان اسان کي ياد ڪيو. جنھن لاءِ اوهان جا ٿورائتا آهيون.
پاڻ تہ جيسين جيئرو آهيان تہ اوهان جو قرب ۽ اوهان جو خلوص ڪين وساري سگهندس. اوهان مان مون کي سچ پچ تہ پنھنجائپ جو احساس ٿيو.
شڪارپور ادبي سٿ جا ساٿي اوهان کي ياد پيا ڪن. سڀني جا سلام قبول ڪندا.
ادبي سٿ وارو پروگرام گذريل خميس يعنى 93- 1 – 7 تي خيرپور تان 10 بجي رات جو خبر جي صورت ۾ نشر ڪيو ويو. ڪاروائي جو مواد مختلف اخبارن ڏانھن اماڻيا آهن. جئين ئي شايع ٿيندو تہ انھي جي ڪاپي انشاءَﷲ آءُ اوهان ڏانھن اماڻيندس.
دعائن ۾ ياد ڪندا.
فقط
خالد سيف ﷲ ڀٽي
150
سنڌي ادبي سنگت سنڌ ( رجسٽرڊ )
سيڪريٽري جنرل
واري تڙ سکر
تاريخ : 1993 – 10 – 13
مانائتا سائين دادا سنڌي صاحب!
اسلام عليڪم!
بابت : ٻالڪ سيمينار
سنڌي ٻارڙن جا تعليمي، سماجي ۽ ادبي مسئلا ۽ حل
سنڌي ادبي سنگت مرڪز پاران نومبر 1993ع جي آخري هفتي ۾ مٿي ڄاڻايل موضوع بابت، شڪارپور ضلعي ۾ هڪ سيمينار ڪوٺائڻ جو پروگرام آهي. جيئن تہ اوهان ناميارا اديب، تعليمي ماهر ۽ ٻارن جي مسئلن جا ڄاڻو آهيو. تنھنڪري اوهان کي ان سيمينار ۾ خاص مھمان طور شريڪ ٿيڻ جي گذارش ڪجي ٿي.
اوهان پنھنجي رضامندي کان واقف ڪندا تہ جيئن پروگرام کي آخري شڪل ڏيئي سگهجي. پروگرام جو تفصيل اوهان کي بعد ۾ موڪليو ويندو.
اميد تہ اوهان خيريت سان هوندا.
نيڪ تمنائن سان
ادل سومرو
سيڪريٽري جنرل
سنڌي ادبي سنگت سنڌ ( رجسٽرڊ )
151
سنڌي ادبي سنگت سنڌ ( رجسٽرڊ )
سيڪريٽري جنرل
واري تڙ سکر
تاريخ : 1993 – 10 – 13
مانائتا سائين دادا سنڌي صاحب!
اسلام عليڪم!
بابت : ٻالڪ سيمينار ۾ شرڪت
سائين!
اوهان اسان جي ڪوٺ قبولي ” سنڌي ٻارن جي تعليمي، سماجي ۽ ادبي مسئلن “ بابت ڪوٺايل سيمينار ۾ اچي شريڪ ٿيا ۽ موضوع بابت پنھنجن ويچارن کان واقف ڪيو، تنھن لاءِ اسين اوهان جا بيحد ٿورائتا آهيون. اميد تہ آئيندہ بہ اوهان جو ان قسم جو تعاون ۽ قرب اسان سان رهندو. اسان اوهان جي احساسن کي مطالبن جي صورت ۾
واسطيدار ڌرين تائين پھچائيندا سين تہ جيئن اسان سڀني جون اهي گڏيل ڪوششون ڪارائتيون ٿي سگهن.
اميد تہ خيريت سان هوندا.
ساٿ سلامت
ادل سومرو
سيڪريٽري جنرل
سنڌي ادبي سنگت سنڌ ( رجسٽرڊ )
152
مھراڻ اڪيڊمي پوسٽ باڪس نمبر 5735، شڪارپور
شڪارپور
1993 – 12 – 12
مانوارا سائين دادا سنڌي صاحب!
اسلام عليڪم!
مھراڻ اڪيڊمي سنڌي ٻولي ۾ ديني، علمي ۽ ادبي ڪتابن جي اشاعت لاءِ سن 1989ع ۾ قائم ٿي. هن وقت تائين ننڍا وڏا 74 ڪتاب شايع ڪيا اٿس. جن ۾ قرآن شريف بابت 3 ڪتاب، حديث پاڪ تي 4 ڪتاب، سيرت النبي ﷺ تي 8 ڪتاب، علمي ۽ ادبي 8 ڪتاب، اسلامي ۽ نظرياتي 9 ڪتاب، شاھہ عبداللطيف جي شاعري تي 6 ڪتاب، شاعري تي 2 ڪتاب، ٻارن لاءِ 26 دلچسپ ڪتاب پڻ ڇاپيا ويا آهن. لسٽ هن خط ۾ شامل آهن.
اهو مختصر ڪم ﷲ پاڪ جي خاص ڀلائي ۽ اوهان دوستن جي ملھاتي ساٿ سان ممڪن ٿي سگهيو آهي. اوهان جي شخصيت سنڌ ۾ اسلامي فڪر جي ڦهلاءُ ۽ فروغ جي حوالي سان هڪ اهم جاءِ والاري ٿي. مھراڻ اڪيڊمي اوهان جو پنھنجو ادارو آهي، هن اداري جي ڪارڪردگي اڃا بہ بھتر بنائڻ، نت نيون صلاحون سوچڻ، اسان جي اوڻاين کان اسان کي آگاھہ ڪرڻ، اهو اسان سڀني جو گڏيل فرض آهي. اسان پنھنجي آئندہ رٿا ٺاهڻ لاءِ اوهان کان رهنمائي وٺڻ گهرون ٿا. اوهان هيٺين موضوعن تي پنھنجا قيمتي رايا لکت ۾ ڏياري موڪليو.
1. اڪيڊمي جي ڪارڪردگي اوهان جي نظر ۾
2. سنڌ جي موجودہ نظرياتي ۽ فڪري صورت حال
3. اڪيڊمي جو آئندہ اشاعتي پروگرام
اوهان جون تجويزون / مقالا وڌ ۾ وڌ 6 جنوري تائين پھچڻ گهرجن.
مون کي اميد آهي تہ اوهان پنھنجي اداري ” مھراڻ اڪيڊمي “ لاءِ ڪجهہ گهڙيون ڪڍندا ۽ پنھنجي قيمتي خيالن کان آگاھہ ڪندا.
اوهان جا وڏا ٿورا.
قمر ميمڻ
سيڪريٽري مھراڻ اڪيڊمي
واڳڻو در شڪارپور