1977
خضر حيات قاضي
سائيٽ انجنيئر
پاڪ سعودي فرٽيلائيزر
ميرپور ماٿيلو ، ضلع سکر سنڌ.
فيبروري 25 – 1977ع
دائم اقبال
محترم ۽ مربي دادا سائين
و عليڪ سلام
آداب تسليمات
همت افزائي، دلجوئي ۽ خط لکي قدرداني ڪرڻ لاءِ نھايت ئي مشڪور و ممنون آهيان. اها اوهان مھربانن جي حسن اخلاقي ۽ علم و ادب سان لگن جو عملي ثبوت آهي جو ڪٿي هڪ اجنبي جا ڪچا ڦڪا بي ترتيب اکر پڙهيا اٿو تہ ايڏا خوش ٿيا آهيو ۽ خط لکي مشڪور ڪيو اٿو.
اوهان سان ادبي ۽ علمي ميدان ۾ برميچي، پيوندڪاري جي قابل تہ نہ آهيان، پر اها بہ اوهان جي ڪرم نوازي ٿيندي جو پنھنجو وڙ ڪري پنھنجي هم اثري ۾ آڻي سٿ سان ساڻ ڪندا. ٿي سگهي ٿو تہ اوهان جي طفيل ” پٺي لڳي ماڻھو ٿي “ ساڳي منزل جو راهي تہ بنجي نہ ٿو سگهان ، پر ان منزل جو متلاشي ضرور آهيان، جتي اوهان اڳ ئي پھتل آهيو.
علمي ادب ڄاڻ تہ ڪانہ اٿم ، پر ڪجهہ ڪرڻ لاءِ مڙئي پيو مٿو ماريندو آهيان. مصوري جي فن کان ڪورو ڄٽ، پر ان سان ٻالڪپڻ کان شغل ضرور ڪندو ايندو آهيان، جنھن ۾ والد بزرگوار کان ڪافي پرايو اٿم، ڇو تہ پاڻ ريٽائر ڊرائنگ ماسٽر آهن. سندس تربيت تي فخر اٿم. منھنجون ٺھيل تصويرون شايد اوهان ڏٺيون آهن، اهو هڪ معمو آهي، جيڪو روبرو حل ٿيندو. دوستي جي هام واري تہ نہ ٿو سگهان، پر خادمي لاءِ حاضر آهيان.
روبرو اچي شرف ملاقات بخشيندا، تہ احسان ٿيندم، حڪم ڪندا تہ روبرو اچي حاضر ٿيندس. صبح کان شام تائين مل تي هوندو آهيان، آفيس ۾ هليا ايندا. اتي نہ هجان تہ پٽيوالي کي چوندا تہ اهو پاڻھي توهان کي وٺي ايندو. شام جي وقت اچو تہ عارضي غريب خانہ جروار روڊ تي ريلوي ڦاٽڪ کان اڳ ۾ آهي.
بندہ خادم ”خضر “
40
سنڌي ادبي سنگت پنوعاقل
تاريخ : 12 – 6 – 1977ع
سيڪريٽري: غلام سرور ” سيف “
جوائنٽ سيڪريٽري : نعيم احمد ” ناز “
ڪاروباري سيڪريٽري : معصوم ڪلوڙ،
ڪرشن منڌاڻ
پيارا دادا
جيئي سنڌ : توهان جون ڪھاڻيون پڙهي ائين لڳندو آهي، ڄڻ سنڌ جي قومي تاريخ جو مطالعو ٿو ڪريان، ۽ پوءِ توهان جو ادبي کيتر مان يڪدم گم ٿي وڃڻ ٻيلي سونھي ٿو ؟ توسان واقفيت ناهي پر توسان ادبي ڀائپي وارو رشتو آهي. مٺا توسان ملاقات ڪرڻ جي شوق سان ئي ميرپور پھتس. پر رميش وٽان ڪوبہ پتو نہ مليو. سکر ۾ سنگت جي برانچن جي ڇندڇاڻ ڪندي ميرپور ماٿيلو جو فائل مليو. تنھنجا رشيد ۽ تنوير ڏي لکيل خط پڙهيم. ادا هينئر تہ ميرپور ۾ ڪافي دوست پئدا ٿي چڪا آهن. اميد تہ پاڻ ملھائيندين.
تنھنجو پنھنجو
سرور سيف
سنڌي ادبي سنگت پنوعاقل