1991
تنظيم فڪر و نظر سنڌ
سنڌ اسلامڪ سينٽر، راشد پارڪ، سکر
تاريخ: 1991- 1 – 17
محترم مقڪرم جناب دادا سنڌي صاحب!
اسلام عليڪم!
گذارش تہ تنظيم فڪر و نظر سنڌ جي زير احتمام ” پنجين ڪل پاڪستان شاھہ لطيف ڪانفرنس“ 6، 7،8 مارچ1991ع تي سکر ۾ منعقد ٿي رهي آهي.
اوهان کي درخواست آهي تہ 16 مارچ جي تقريري مقابلي واري اجلاس ۾ بطور مھمان خصوصي شرڪت ڪرڻ فرمائيندا. اجلاس انشاءَ ﷲ 3 بجه منجهند جو منعقد ٿيندو.
اوهان جي شرڪت اسان لاءِ حوصله افزائي جو ڪارڻ ٿيندو.
والسلام
پروفيسر اسدﷲ ڀٽو
128
پنوعاقل
1991 – 02 – 12
مانوارا سائين دادا سنڌي صاحب!
سنڌي ادبي سوسائٽي پنوعاقل پاران سنڌ ڌرتيءَ جي عظيم شاعر شاھہ عبداللطيف ڀٽائي رح جو ڏهاڙو ڄاڻايل سٽاءُ موجب ملھايو پيو وڃي. جنھن ۾ اتر سنڌ جا ناميارا ليکڪ اڄوڪين حالتن جي حوالي سان شاھہ جي سر ڪيڏاري ( ۽ ٻين مختلف موضوعن ) تي پنھنجا مقالا پڙهندا. اوهان کي ان منفرد ميڙاڪي ۾ شڪرت جي نينڍ ڏجي ٿي.
ساٿ سدائين سلامت
پريل دايو
س – ا – سوسائٽي پنوعاقل
سٽاءُ
صدارت : دادا سنڌي
مھمان خاص : نصرت حسين ابڙو
اعزازي مھمان : نظير شھزاد ۽ مقصود گل
مقالا پڙهندڙ : ڪيلاش، امير بخاري، منظر حيات، زاهد شيخ، منظور بيدار، شڪيل پريالوي، عاصم کوسو، شبير بيدار، سرور سيف ۽ ٻيا.
تاريخ : 15 فيبروري 1991
ڏينھن: جمعو
وقت : 3 وڳا ( شام )
جڳھہ : ٽائون هال ٽائون ڪاميٽي پنوعاقل
129
سنڌي ادبي سنگت سنڌ شاخ سکر
1991 – 2 – 26
مانوارا سائين! دادا سنڌي صاحب
سنڌي ادبي سنگت سکر پاران، سنڌي ٻولي جي برک ڪھاڻيڪار ۽ دانشور محترم رشيد ڀٽيءَ جي ٽين ورسي جي موقعي تي هڪ ادبي ميڙ 15 مارچ 1991ع تي جمعي ڏينھن، صبح جو ڏهين وڳي، جاگيراڻي پاڙي سکر ۾ ڪوٺايو ويو آهي.
اوهان سنڌي ٻوليءَ جا ناميارا ليکڪ، دانشور ۽ مرحوم جا ويجها ساٿي آهيو. اوهان کي گذارش آهي تہ ان موقعي تي ادبي ميڙ ۾ شريڪ ٿي ٿورائتو ڪندا ۽ رشيد ڀٽي صاحب جي فن، فڪر ۽ شخصيت جي حوالي سان پنھنجو مقالو پيش ڪندا. پروگرام جو دعتونامو اوهان کي جلد اماڻيو ويندو.
مھرباني، ٻيا سک
اياز گل
سيڪريٽري سنڌي ادبي سنگت سکر
130
تنظيم فڪر و نظر سنڌ، سنڌ اسلامڪ سينٽر، راشد پارڪ، سکر
تاريخ : 1991 – 2 – 27
محترمي و مڪرمي جناب دادا سنڌي صاحب!
اسلام عليڪم! مودبانہ گذارش آهي تہ تنظيم فڪر و نظر سنڌ جي مرڪزي مجلس عامله ( سي اي سي ) اوهان جي علمي و ادبي خدمتن جي اعتراف ۾ ” فڪر و نظر ايوارڊ “ ڏيڻ جو فيصلو ڪيو آهي.
پنجين ” ڪل پاڪستان شاھہ عبداللطيف ڀٽائي رح ڪانفرنس جي موقعي تي عالمن ۽ اديبن جي پروقار تقريب ۾ وزيراعظم پاڪستان جناب ميان محمد نواز شريف، اهي ايوارڊ ڏيڻ فرمائيندو. اوهان کي درخواست آهي تہ اوهان ايوارڊ وصول ڪرڻ فرمائيندا.
مھرباني فرمائي 6 مارچ 1991ع تائين سکر پھچي ويندا. اوهان جي قيام ۽ طعام جو بندوبست تنظيم جي ذمي هوندو.
اوهان جو مخلص
پروفيسر اسدﷲ ڀٽو
131
سنڌ تحقيقي بورڊ
پوسٽ باڪس نمبر 19، جنرل پوسٽ آفيس حيدرآباد ( سنڌ )
تاريخ : 1991 – 3 – 31
پيارا دادا!
شال خوش هجين. تنھنجو خط مليو، مھرباني.
آءُ تنھنجو ٿورائتو آهيان، جو مون سان صلاح ڪئي اٿئي. ادا پنھنجي ترقي پسند يارن واري لڏي کان شڪايتون نہ رڳو توکي آهن. پر اسان سمورن کي آهن. مورڳو پنھنجي انا جي تسڪين ۾ پورا آهن. سڀ ادارا، سڀ تنظيمون ذاتيات کي زور وٺائڻ ۾ پوريون آهن.
تنھنجون شڪوہ شڪايتون بہ بجا پر دادا، تون جيڪو ڪم پيو ڪرين، ان جي پنھنجي حيثيت آهي. ڪير ليکي يا نہ ليکي يقينن ڄاڻ تہ اڳتي هلي هيءَ قوم توکي قدر جي نگاھہ سان ڏسندي ۽ اڄ بہ سٺا پر پڙهيل لکيل ماڻھو تنھنجو قدر ٿا ڪن تہ دادا لاڳيتو سنڌ جي تاريخ لاءِ چڱو ڪم ڪري رهيو آهي.
ادا جيتريقدر تنظيم فڪر و نظر وارن جو تعلق آهي تہ انھن جو سنڌ جي تاريخ ۽ پاڻ جھڙن ماڻھن سان ڪو چڱو رويو نہ رهيو آهي ۽ هنن سدائين، اسان جي ابتڙ سوچيو آهي، ان ڪري انھن کي عزت يا چڱائي حاصل ناهي.
جيڪڏهن هنن تنھنجو قدر ڪري توکي پنھنجي تنظيم جو انتخاب بڻايو آهي تہ ان سان ٻيو ڪجهہ ڪونھي، هو فقط اهو تاثر ڏيئي سگهندا تہ دادا اسان جي لڏي جو ماڻھو آهي ۽ اها ڳالھہ ڏاڍي خراب آهي. دادا ايوارڊ پيا ملندا، قدر پيا ٿيندا.
جيتري قدر منھنجو خيال آهي تہ اهو ايوارڊ ۽ شرڪت توکي گهڻو ڇيھو رسائينديون ۽ توکي هڪ تاريخ نويس سان جيڪا حيثيت ملڻ گهرجي اها نہ ملي سگهندي ۽ تنھنجو پڙهندڙ توکي پڙهندو ئي ڪونہ. ڇو تہ هو تنھنجي ۽ پنھنجي وچ ۾ وڏي خلا محسوس ڪندو. ڀلي تون پنھنجا خيال نہ بدلاءِ، فڪر نہ بدلاءِ، پر تنھنجو اهو عمل توکي ريزا ريزا ڪري ڇڏيندو.
وڌيڪ تنھنجي مرضي آهي، هاڻي ڏسجي تہ تون پنھنجو پاڻ کي ۽ پنھنجي پورهئي کي بچائڻ ٿو چاهين يا وڃائڻ. پر هڪ ڳالھہ تہ مون کي خود ڏک ٿيندو، شايد آئون روئي وجهان.
تنھنجو ڪتاب بہ آڻبو ضرور. پر هڪ ٻہ ڪتاب پريس ۾ آهن، اهي نڪري اچن.
عالمن جا ڪارناما ڪافي ڇپيل آهي. 500 کن ڪايپون. توکي شايد عيد کان پوءِ موڪلي سگهان.
منھنجو بابا سائين بہ ڏاڍو بيمار آهي، ان ڪري ڏاڍو منجهيل آهيان، ڪو ڪم بہ نہ ٿو ڪري سگهان.
تو ڏانھن باقي 1500 رهيل آهن. جي اڄ ئي ڊرافٽ يو بي ايل ڪورٽ روڊ برانچ حيدرآباد جي نالي، منصور پبليڪيشن ايجنسي جي کاتي موڪلي ڏين تہ قرب ٿيندو.
ننڍڙا منھنجا خوش آهن. منصور ۽ سرمد. منصور پيارو خوش تہ آهي پر اڪثر جلد جلد بيماري جي ضد ۾ اچي ويندو آهي. آءُ بہ ٺيڪ ناهيان. گهڻي سفر ۽ ڊڪ ڊوڙ جي ڪري بواسير جي تڪليف ۾ آهيان. ڌڪو بہ کاڌو اٿم، ان ڪري چنبو بہ نڪري پيو آهي. بس دادا وقت پيو گذري.
سمورن لاءِ سلام. ٻچڙن ۽ ڀائٽن لاءِ قرب.
تنھنجو ڀاءُ
ناز سنائي
132
حيدرآباد سنڌ
1991 – 5 – 1
پيارا دادا سنڌي
اسلام عليڪم!
اوهان جو خط پھتو، مون کي خود حيراني ٿي آهي تہ اوهان کي منھنجا خط ڇو نہ مليا آهن، حالانڪ آءُ مخالفين کي بہ سندس خطن جي جوابن موڪلڻ ۾ ڪوتاهي ڪونہ ڪندو آهيان.
پيارا! ڊاڪٽر عباسي صاحب طرفان مون کي ڪابہ دعوت ڪانہ آئي آهي. هو هاڻ شايد سچل جي سجاده نشين جي برابر آهي، ان ڪري ڪانفرنس واري ڏينھن کان هڪ ڏينھن اڳ مون کي سندس خليفن مان هڪ مسٽر حداد ٽيليفون تي پڇيو تہ اوهين هوائي جھاز ۾ ايندو يا ريل گاڏي ۾؟ مون چيو مانس تہ پيارا، اڄ اخبار ۾ وضاحت طور خبر آئي آهي تہ ادبي ڪانفرنس ٿي رهي آهي. جنھن ۾ مشاعري جي صدارت مون کي ڪرڻي آهي. اها بہ خبر ڪانھي تہ اها ڪانفرنس درازان ۾ ٿيندي يا سچل جي نئين گادي واري هنڌ يعني خيرپور ۾ . ان ڪري مون معذرت جو اظھار ڪيو ۽ چيو مانس تہ آءُ لنگو نہ آهيان جو راڳ وٺڻ لاءِ بنا دعوت جي هليو اچان ۽ ان ڪري نہ آيس.
رهيو سوال اوهان کي سڏائڻ جو، سو ڳالھہ ظاهر پئي آهي. تنوير صاحب پاڻ لسٽ ناهي ٺاهيندو. خليفا ٺاهيندا آهن. اهي آهن خادم عباسي، مختيار ملڪ، اياز گل ۽ محمد علي حداد. ڪنھن زماني ۾ اڃا سچل چيئر جو وجود ڪونہ هو، تڏهن خيرپور يا درزان واري ڪانفرنس ۾ شاھہ لطيف ڪئمپس جي استادن جھڙوڪ ملڪ نديم، الطاف آثِيم کي بہ دعوت ڪانہ ملندي هئي، فقط محترم نيلوفر شيخ کي دعوت ڏني ويندي هئي. جيڪڏهن اسان ۾ فراخدلي، رواداري، هڪ ٻئي لاءِ عزت ۽ احترام جو جذبو هجي ها تہ پوءِ ائين ڇو ٿئي ها. اڄ ائين پيو لڳي تہ سچل اتر وارن جو آهي. بيدل اتر وارن جو ۽ شاھہ ڪريم، گرهوڙي، مخدوم نوح ۽ لطيف لاڙ وارن جو. هر هنڌ گروھہ بنديون ۽ دوست نوازي.
منھنجا سائين! اوهان پي ايڇ ڊي جو ذڪر ڪيو آهي. مون کي بہ خبر آهي تہ ڪي دوست ٿيسز لکڻ لاءِ آفيسون کولي ويٺا آهن، البت ڊاڪٽر جوجيڻو محنت ڪرائيندو آهي. ان ڏس ۾ هڪ شاگرد مون کي بہ ٺڳي ويو آهي.
اوهان کي ڏک ضرور ٿيئڻ گهرجي. اوهان کي دعوت ڏيڻ گهربي هئي. پر تنوير صاحب کي ڪير سمجهائي. اڄڪلھہ طبيعت ضدي اٿس ۽ پئسي جي لالچ بہ ان کان سواءِ.
اوهان جي گرامر وارو ڪتابڙو هاڻ ڪڍي رکيو اٿم. جلدي ڏسي اوهان کي موڪلي ڏيندس. دير لاءِ معافي جو طلبگار آهيان. جيڪڏهن ڪتاب تي مون کان لکائڻ چاهيو ٿا تہ پوءِ ڪتاب منھنجي نالي منسوب ڪرڻ مناسب ڪونہ ٿيندو. رايو آءُ لکي موڪليندس.
آءُ هن وقت ” سنڌي ٻولي جي ارتقائي تاريخ “ تي ڪتاب لکي رهيو آهيان. تمام گهڻو مواد مليو اٿم. ڪجهہ تہ منھنجن ٽڙيل پکڙيل مقالن ۾ آهي. جڏهن اهي مقالا گڏ ڪيا اٿم تڏهن حيران ٿي ويو آهيان تہ ان موضوع تي اڳ ڇو نہ لکيم، پر اسلام آباد ۾ ڏاڍو مشغول رهڻو پيم.
اوهان سنڌالاجي کي وري سنڀالڻ واري ڳالھہ ڪري مون ڇيڙي ڇڏيو آهي. صدر پاڪستان منھنجي گذارش منھنجي ريپارٽيشن جو آرڊر سنڌالاجي لاءِ جاري ڪيو پر قادر جوڻيجي صاحب ميڙ وٺي، جويي صاحب، رباني صاحب، قمر شھباز جي معرفت غلام مصطفى شاھہ تي زور آندو تہ مون کي سنڌ الاجي ۾ نہ رکيو وڃي. قادر صاحب وري خادم حسين شاھہ ۽ ڪاڇيلي جي مدد سان ٻين ماڻھن کي بہ مجبور ڪيو. جنھن ڪري مون پنھنجو ڀلو ان ۾ چاهيو تہ پاسيرو ٿي وڃان. سنڌالاجي کي مون پنھنجي ٻار وانگر پاليو ۽ تاتيو آهي. آءُ ڪابہ سياسي پٺ نہ ٿو رکان. اوپن يونيورسٽي ۾ بہ پنھنجي ڪم جي مڃتا طور ڊاڪٽر افضل ۽ ڊاڪٽر رضي الدين صديقي جي سفارش تي گهرايو ويس. آءُ غريب ماڻھو آهيان. هاريءَ جو پٽ آهيان. منھنجي ڪابہ سفارش نہ آهي. مخدومن سان نيازمندي ضرور آهي پر انھن ۾ آسرو هجي پر شل ڪم نہ پوي.
دعاڪريو تہ جنھن حال ۾ آهيان، اتي خوش هجان.
اوهان جو مخلص
غلام علي الانا
133
حيدرآباد ( سنڌ )
1991 – 5 – 19
پيارا دادا سنڌي
اسلام عليڪم!
اوهان جو 1991 – 5 – 9 وارو خط پھتو. اوهان منھنجي لاءِ جيڪي جذبا ۽ احساس رکو ٿا. تنھن لاءِ اوهان جو شڪرگذار آهيان. اوهان ماضيءَ جو ڳالھيون ياد ڪرايون آهن. سنڌ الاجي سان واقعي منھنجو عشق آهي. اوپن يونيورسٽي ۾ منھنجا احباب چوندا هئا تہ ” الانا جو پھريون عشق سنڌالاجي سان هو ۽ نئون عشق اوپن يونيورسٽي سان آهي“. مون هر هنڌ خلوص، جذبي، لڳاءُ ۽ محنت سان ڪم ڪيو آهي. اصول ۽ قانون پھرين پاڻ سان لڳائيندو آهيان ۽ پوءِ ڪارڪنن سان ادارا ٺاهڻ ڏاڍو ڏکيو ڪم آهي. بلڪل ائين جيئن معمار ۽ رازا جايون ۽ محل ٺاهيندا آهن. محل ۽ ماڙيون تعمير ڪرڻ لاءِ ڪيتري نہ پلاننگ ۽ عملي قدم جي ضرورت ٿيندي آهي. ادبي بورڊ جو حال ڇا آهي. تنھن جي بہ اوهان کي خبر هوندي. آءُ بہ ميمبر هئس، مگر اداري کي تباهي طرف ويندي ڏسي، ميڙو متل ڇڏڻ مناسب سمجهيم ۽ استعيفا ڏيئي ڇڏيم. هاڻ تہ استعيفا منظور بہ ٿي وئي آهي.
اوهان جي گرامر تي پنھنجو رايو ۽ ٻہ لفظ موڪلي رهيو آهيان. رايو ذاتي نوعيت جو گهٽ ۽ فني نوعيت جو وڌيڪ آهي، جيڪڏهن پسند اچيو تہ شامل ڪجو. ادب جي ارتقائي تاريخ تي آءُ لکڻ جو ارادو رکان ٿو، ليڪن هر ڪم نھايت ئي وڏو ۽ محنت طلب آهي. وري ڇپائڻ لاءِ ٻين جي طرف ڏسڻو پوي ٿو. هن وقت مون وٽ
ڪتاب تيار آهن.
1. Paper on Sindhi Linguage and Linguistics
2. Paper on Sindhi Litrature
3. ثقافتي ورثو
ٽيون نمبر ڪتاب ڪلچر ڊپارٽمينٽ طرفان شايد ڇپايو وڃي. حميد آخوند صاحب چيو آهي. اهڙي طرح پھريون ڪتاب بہ اهم آهي. سوچيو هئم تہ سنڌي ادبي بورڊ کي گذارش ڪريان. پر هاڻ تہ ميمبر بہ ڪونہ رهيو آهيان ۽ ميمبرن جي اڪثريت منھنجي خلاف آهي. تنھنڪري آسرو نہ ڄاڻي، بورڊ کي چوڻ مناسب نہ ٿو سمجهان.
اوهان شريعت رسالي جو ذڪر ڪيو آهي،جنھن ۾ مولوي عبدالوهاب چاچڙ جي مضمون جو حوالو ڏنو اٿو. ڇا انھيءَ رسالي جي ڪاپي مون کي موڪلي سگهندئو؟
اوهان جي گرامر جا جيڪي ڀاڱا ڇپجي چڪا آهن. انھن تي رايو ڇو ٿا گهرايو. جيڪڏهن اوهين چاهيو ٿا تہ آءُ ڪا راءِ ڏيان تہ مون کي هڪ هڪ ڪاپي وري موڪليو، ڇو تہ اڳي موڪليل ڪاپيون مون کي ڳولڻيون پونديون.
مون اوهان جو ڪتاب ” سومرن جي دور جا سورما “ بہ پڙهيو آهي. مڪمل تبصري لاءِ مون کي سڀ ڪم روڪي تبصري لاءِ وقت ڪڍڻو پوندو. مون کي ڪتاب ڏاڍو وڻيو هو. معلوماتي ڪتاب هو. ان ڏس ۾ ڊاڪٽر مھر عبدالحق وڏي جاکوڙ ڪري رهيو آهي. کيس مواد جي لوڙ بہ آهي. ڇا اوهين سندس مدد ڪري سگهندئو.
پيارا! وساري ڇڏيو قادر يا تنوير کي. اسين پنھنجي مستي ۾ مگن آهيون. سنڌ يونيورسٽي ۾ منھنجي لاءِ خاص چيئر قائم ڪري شاھہ صاحب ( وي سي ) مون تي احسان ڪيو آهي. ان چيئر جو نالو آهي.
Non Formal & Distance Education Chair
ان چيئر لاءِ جيڪي ليف ليٽ لکيا اٿم. سي حاضر آهن. في الحال انھن پروگرامن طرف سڄو توجھہ آهي.
دادا سائين ڪم ڪريو. سنڌ جي بقا ۽ بچاءُ لاءِ محنت ڪريو. ادارا بہ ڪم ڪندا رهندا. اهي دور ايندا رهندا آهن. مون وڌ کان وڌ عھدا ماڻيا. ﷲ تعالي جو اهو ڪرم گهٽ آهي؟ مون کي خبر آهي تہ اوهان جھڙا پيارا هند ۽ سنڌ ۾ موجود آهن. جيڪي مون جھڙي ادني انسان لاءِ محبت رکن ٿا. ڇا اهو رب جو احسان نہ آهي مون تي. اوهان تہ مون کي تڪبر ڪرڻ تي مجبور ڪري رهيا آهيو جو لکيو اٿئو تہ
” سنڌ ۾ اهڙا بہ اديب آهن، جيڪي اوهان جي تحقيق ۽ ڪاوش کي نہ صرف قدر جي نگاھہ سان ڏسن ٿاپر اوهان کي مجازي خدا سمجهي سجدو بہ ڪن ٿا. انھن مان هڪ گنگهار هي بندو بہ آهي.“
داداسائين! ڇو ٿا مون کي گناهگار ڪريو، ڇو ٿا مون کي ڦونڊ ۾ ڀرجڻ تي اُڪسايو. ڇو ٿا مون کي تڪبر ڪرڻ تي اُڀاريو؟ آءُ اڃا طفل مڪتب آهيان. سکڻ جي تمنا ۽ خواهش رکان ٿو. تحقيق هڪ تمام تمام وڏو ۽ وڏو لفظ آهي. آءُ جڏهن محققن جا ڪتاب پڙهندو آهيان تہ پھريون لفظ پڙهي ان لفظ جي معني سمجهڻ لاءِ هفتا لڳائي ڇڏيندو آهيان. خداوند ڪريم اوهان کي خوش رکي.
اوهان جو مخلص
غلام علي الانا
134
حيدرآباد
1991 – 05 – 20
اڄ اوهان جو تازو خط مليو. ياد لاءِ مھرباني. عوامي آواز اڄوڪيءَ ۾ ايوارڊ بابت اوهان جو بيان بہ نظر مان گذريو آهي. چڱو ٿيو جو هڪ پاسي ٿيا. ميرپور خاص بابت ٻن گزيٽرن مان اقتباس موڪلجن ٿا. اصل ۾ ايڊ بہ فوٽو ڪاپيءَ تان ورتل آهي. وڌيڪ قديم سنڌ بہ ڏسڻ گهرجي.
ناز کي خط بہ لکيو ۽ روبرو بہ مليو هو. هن چند مھينن ۾ واعدو ڪيو آهي تہ اوهان جو ڪتاب شايع ڪندو. وڌيڪ ڏسجي تہ ڇا ٿو ٿئي.
قلعن بابت ڪتاب جي آءُ سنڌ الاجي مان ڳولھا ڪندس. ملي ويو تہ ڪاپي اوهان لاءِ ٺھرائبي ۽ پاڻ لاءِ به. پيسا اوهان کان نہ وٺبا.
اتر سنڌ ڏسڻ جو ارادو ورهين کان آهي. جڏهن بہ پروگرام ٺھيو، تڏهن اچي حاضر ٿيندا سين. وڌيڪ خير . ادا نيٺ وري حيدرآباد ۾ فساد ٿيا.
مخلص
غلام علي الانا
135
Non – Formal and Distance Educational Chair
University of Sindh
ڄام شورو
1991 – 05 – 20
پيارا دادا صاحب!
اسلام عليڪم!
ڌڻي ڪري خوش ۽ آباد هجو.
اچو تہ ٻين جي چنتا کي ڇڏي ڪجهہ پنھنجي ڪريون. ٻين جو خير. ڇا ٿا ڪن، اسان سان سٺو رتاءُ اٿن يا نہ؟ شل خوش هجن. انھن ڳالھين تي ڌيان ڏبو تہ دماغ مان ڪي سٺيون ڳالھيون نڪري وينديون. شيطان تہ اهڙا موقعا پيو ڳولھي.
پيش لفظ نئين سر لکي موڪلي رهيو آهيان. يونيورسٽي جي گاڏي ڪانہ آئي، ان ڪري سڄو ڏينھن اوهان جي کاتي لڳايم.
سرمست رسالي لاءِ عرض ڪيو هئم. ڊاڪٽر مھر عبدالحق جي ائڊريس تي موڪليان ٿو. خط اردو ۾ يا سرائڪي ۾ لکجوس. وڏو عالم آهي. احبابن کي سلام.
والسلام
اوهان جو دعاگو
غلام علي الانا
136
حيدرآباد
1991 – 6 – 6
اسلام عليڪم!
اڳ ۾ رجسٽرڊ ٽپال ۾ ميرپورخاص بابت مواد موڪليو اٿم. اميد تہ پھتو هوندو. اوهان جنھن ڪتاب لاءِ لکيو هو ان جي ” سنڌ الاجي “ ۾ ڳولا ڪئي وئي. ليڪن اهڙو ڪو بہ ڪتاب اتي موجود ڪونھي. منھنجو خيال آهي تہ ان عنوان سان ڪو مقالو لکيو ويو هوندو.
پنھنجا ٻہ تازا ترين مطلوبات موڪلي رهيو آهيان. اميد تہ پڙهي مفصل راءِ کان آگاھہ ڪندا. وڌيڪ خير. پھچ ترت ڏيندا. هڪ وڌيڪ ناياب تحفو بہ حاضر آهي.
مخلص
غلام علي الانا
137
ناظم آباد ڪراچي
1991 – 8 – 11
محترم جناب دادا سنڌي صاحب!
اسلام عليڪم!
خيريت، خواهان بخيريت
اسين اوهان ڏانھن نئين سوچ جي هر پرچي کي اماڻي پنھنجو فرض ادا ڪري رهيا آهيون. اوهان مان بہ موچاري موٽ جي اميد رکي اٿئون.
هيل ” نئين سوچ “ کي ٻيو سال پورو ٿيڻ تي خاص نمبر ڪڍڻ جو ارادو رکون ٿا. اوهان جي تبصري لاءِ منتظر آهيون. اگر اوهين خط پھچڻ شرط ئي چند لمحا نئين سوچ جي حوالي ڪري تبصري جون چند سٽون لکي موڪلي ڏيو تہ هوند اسان جو حوصلو وڌي وڃي.
اوهان جي ساٿ جو منتظر
عبدالخالق شيخ
ايڊيٽر نئين سوچ ڪراچي.
138
خانپو مھر
1991 – 10 – 12
محترم و مڪرمي جناب دادا سنڌي صاحب
جيئن تہ مستانہ ادبي سنگت خانپو مھر جي زير اهتمام هڪ روزه ادبي محفل جو پروگرام پرائمري اسڪول خانپور مھر ۾ رکيو ويو آهي. مذڪورہ پروگرام ۾ پھرين نشت ۾ اوهان بزرگن جي صدارت بااميد رٿي وئي آهي. براڪرم ٻيا سڀ پروگرام ڪينسل ڪري هن ادبي سنگت جي پروگرام ۾ شريڪ ٿي بندہ کي رونق بخشيندا.
تازو عرض تہ مون مسڪين جي رٿ تي اوهان بزرگن جي صدارت جو پروگرام ڪيو ويو آهي. اميد تہ نراس نہ ڪندا. اهو پروگرام ويڊيو بہ ڪيو ويندو.
زيادہ آداب و السلام
اوهان جو نيازمند ۽ دعاگو
حاجي عيدن ناز ميراڻي
پروگرام
پھرين نشت : اسڪولن جي ٻارن درميان سيرت النبي صه جو تقريري مقابلو
صدارت : جناب دادا سنڌي صاحب
مھمان خاص : جباب الحاج چنڊ مھر چئرمين يونين ڪائونسل خانپور مھر
وقت : 8 وڳي کان 10 وڳي صبح
ٻي نشت : غير طرحي مشاعرو
صدارت : جناب اميد خيرپوري
مھمان خاص : جناب الحاج سائينداد خان مھر
وقت : 10 وڳي کان 5 وڳي
تاريخ : 18 آڪٽوب 1991 جمعتہ المبارڪ
نوٽ : طعام جو بندوبست پڻ ڪيو ويندو.