12 آگسٽ 2011ع
• سنڌ بچايو ڪاميٽي وفد جي جلال شاهه جي اڳواڻي ۾ پاڳاري سان ملاقات. قومپرستن جي موقف سان متفق آهيون، هڙتال جي حمايت نه ٿو ڪريان، ناظمن جو نظام ناڪام ثابت ٿيو، قومپرستن جا هم خيال آهيون هم حال نه. پ پ جي سنڌ ڪارڊ ۾ سوراخ ٿي ويو آهي، اهي قلابازين جي پيداوار آهن. مهاجر صاحب بهادر ٿي بعد وڏي شيءَ حاصل ڪري پئي سگهيا، پر ننڍو ذهن وڏي ڳالهه نه سوچيندو. پاڳارو. سنڌ جي وحدت کي ڪوبه نقصان ٿيو ته سڀ گڏ هونداسين: جلال شاهه. سنڌ تي قبضي جي سوچ رکندڙ پنهنجي دماغ مان هوا ڪڍي ڇڏين: بشير قريشي. (روزاني ڪاوش)
• قومپرستن جي موقف جي حمايت ڪريان ٿو پر هڙتال جي حمايت نه ڪندس، ان سان قوم جو نقصان ٿئي ٿو (ف ليگ سربراهه پاڳارو) سنڌ پاڳارو آهي پاڳارو سنڌ آهي: بشير قريشي. اين پي پي ۽ سني تحريڪ طرفان به هڙتال جي حمايت، پ پ جي سنڌ ڪارڊ ۾ سوراخ ٿي ويو: پاڳارو. ”بزرگن قربانيون ڏنيون، هاڻي مان قربانيون وٺندس، مفادپرست آهيان“ موقف تبديل ڪرڻ واري سوال تي پير پاڳاري جو جواب. پيپلزپارٽي کان رات پيٽ ۾ فيصلو تبديل ڪرائڻ تي حيرت ٿي آهي (ابراهيم جتوئي)، ليبر پارٽي طرفان 13 آگسٽ تي صنعتي علائقن ۾ هڙتال ڪرائڻ جو اعلان. سنڌ جي وحدانيت خلاف هر فيصلي جي مزاحمت ڪنداسين، ڪراچي پنجن ضلعن ۾ ورهائي، حيدرآباد جي اڳوڻي حيثيت بحال ڪئي وڃي: جلال شاهه.
• پ پ طرفان قومپرستن جي احتجاج کي منهن ٽوڙ جواب ڏيڻ جو فيصلو، ضلعي هيڊڪوارٽرن ۾ مظاهرن ۽ ريلين جو اعلان. قومپرستن سنڌ کي نقصان رسايو، غلطي ناهي ڪئي ته معافي ڇو وٺون؟ قائم علي شاهه. مون ڪراچي الڳ لکي ناهي ڏني، اهو الزام بي بنياد آهي، سنڌ ۾ ڪا به بغاوت ناهي، باقي تاثر اهڙو ڏنو پيو وڃي، سڄي صوبي ۾ هڪ نظام لاڳو ڪيو آهي. اسان حق جو فيصلو ڪيو، پ پ جو موقف آهي ته اهڙو نظام آڻجي جيڪو گهڻن ماڻهن کي قبول هجي، قومپرست شڪست کاڌل آهن ۽ اسان حڪومت ۾ ڄميا ويٺا آهيون. مشرف دور ۾ قومپرستن تحريڪ ڇو نه هلائي هئي، بيان به نه ڏنا ويا هئا، ان وقت اهي ڪٿي هئا، قانون انسان ٺاهيندا آهن، ترميم ڇو نٿي ڪري سگهجي: پريس ڪانفرنس. پ پ سنڌ ڪائونسل جي اجلاس ۾ هڪ به ميمبر سنڌ کي ٻن نظامن ۾ ورهائڻ جي مخالفت نه ڪئي، مڪاني نظام بابت ٿيل فيصلن بابت بريفنگ، احتجاج لاءِ هدايتون جاري.
• سنڌ جي انتظامي ورهاڱي خلاف عوام جو شاندار ردعمل آيو. ورلڊ سنڌي ڪانگريس. حڪمران پارٽي جو عوامي احتجاج کي صرف قومپرستن جو عمل سڏڻ غلط آهي. پ پ به انتظامي ورهاڱي خلاف ٿيندڙ عوامي احتجاج جو حصو رهي آهي، ڀٽو / لوهاڻو.
• سنڌ جا فيصلا مقامي قيادت ڪندي، اسلام آباد مان هاڻي ڪو به ماڻهو نه ايندو: آصف زرداري. صدر قومپرستن جو مطالبو رد ڪري ڇڏيو، ناظمي نظام سنڌ اسيمبلي مان پاس ڪرائڻ جو فيصلو. مڪاني ادارن وارو موجوده نظام قبول نه هوندو. ڪمشنري نظام بحال ڪيو وڃي: پ پ سنڌ جا وفاقي وزير. سنڌ کي نقصان پهچائيندڙ ڪوبه فيصلو نه ڪيو ويندو، جڏهن ته مسئلن جو حل ڪڍيو ويندو: صدر جون اجلاس ۾ ڳالهيون.
• عوامي تحريڪ سڀاڻي واري هڙتال ڪامياب ڪرڻ لاءِ سرگرم. ڪارڪن قومپرستن جي سڏ کي پنهنجو سمجهي ڪامياب ڪن: اياز لطيف. نواز ليگ پنهنجن ميمبرن کي سنڌ جي ورهاڱي بابت بيان بازي ڪرڻ کان روڪي ڇڏيو 12 مئي جي دهشتگردي ۽ سنڌ ورهائڻ جي ڳالهه ڪندڙ پنجاب جي مفاد پرست ٽولي خلاف به احتجاج ڪرڻ جي صلاح.
• سنڌ جي ورهاڱي ۽ مڪاني نظام خلاف هڙتال جي ڪاميابي لاءِ دردر مهم، گڏجاڻيون. لاڙڪاڻي ۾ ماڻهن سان ملاقاتون ڪري هڙتال ڪامياب ڪرڻ جي اپيل، گهوٽڪيءَ ۾ قومپرستن جي گڏجاڻي. سکر ۾ هڙتال جي ڪاميابيءَ لاءِ حڪمت عملي جوڙِي وئي، جيڪب آباد ۾ ڪاميٽيون قائم. سنڌ جي ورهاڱي ۽ قومي وحدت کي خطرن خلاف جيئي سنڌ محاذ جون ريليون، مظاهرا. جسم جي مرڪزي سڏ تي حيدرآباد ۾ پارٽي چيئرمين ڊاڪٽر برڪت جتوئي جي اڳواڻي ۾ ريلي ڪڍي وئي. (روزاني عوامي آواز)