سال جي آخر ۾ مطالعي جو جائزو!
هن سال مضمونن جا مختلف ڪتاب به پڙهيم. جن جو موضوع تاريخ، فلسفو، ٽيڪنالاجي ۽ گلوبلائيزيشن سميت ٻيا موضوع به شامل هُئا. انهن ڪتابن ۾ سڀ کان بهترين سائين حيدر علي لغاري صاحب جا ٻه ڪتاب ”اندر ملهه املهه ۽ ڪُڇان ڪڄاڙو“ شاندار هُئا. ان کان سواءِ ول ڊيورانٽ جو فلسفي تي لکيل ڪتاب ”فلسفي جي ڪهاڻي“ به سُٺو ڪتاب لڳو. پر انهي جي سنڌي ترجمي ۾ مسئلا هُئا، سو بهتر آهي ته جيڪو ڪتاب جنهن ٻولي ۾ هجي، اُن ۾ ئي پڙهجي يا وري انهيءَ جو اردو ترجمو پڙهجي. سنڌي ترجمي ۾ مئڪسم گورڪي جي آتم ڪهاڻي جا ٽي ڀاڱا به هن سال پڙهيم. سي به بهتر لڳا.
ڊاڪٽر مظهر علي ڏوٽيو ۽ نور احمد جنجهي صاحب جا گلوبلائيزيشن جي موضوع تي انتهائي ڪارائتا ۽ وقتائتا ڪتاب آهن. انهيءَ دوران اِهي به پڙهڻ لاءِ مليا.
اردو ۾ ابوبڪر شيخ صاحب جو بلاگز تي مشتمل ڪتاب ”تاريخ کے مسافر“ پڙهيم. جيڪو هڪ منفرد قسم جو ڪتاب آهي. جنهن ۾ ليکڪ پنڌ ڪري تاريخ کي ڦلهورڻ جي ڪوشش ڪئي آهي. انهن بلاگز ۾ انهن گمنام هيرن جو به ذڪر ملي ٿو، جيڪي ڏکين حالتن ۾ رهندي جيئڻ لاءِ جتن ڪن پيا. انهن بلاگز ۾ ماحوليات اهم موضوع آهي. ماحولياتي تباهي بابت مختلف ماڻهن جون درد ڪٿائون هن ڪتاب ۾ شامل آهن. هي بلاگز پڙهندي سفرنامن وارو تاثر به اچي ٿو.
هن سال ئي محترم عبدالرحمان پيرزادي صاحب جي بلاگز جا ٻه ڪتاب ”ڳالهيون پيٽ ورن ۾“ ۽ ”گامون جا گفتا“ به پڙهڻ لاءِ مليا، جن ۾ پيرزادي صاحب صحت، تعليم، سياست، زراعت سميت ٻين اهم معاملن تي بلاگز لکيا آهن. هي سوشل ميڊيا تي لکيل بلاگز جا مجموعا آهن.
هي سمورا ڪتاب منهنجي ڄاڻ ۾ واڌاري ۽ مختلف معاملن تي سوچڻ جو سبب بڻيا.