سمنڊ جي ڀريل اکين جھڙا نظم
منھنجي ڪائنات جو محور تون ئي ته آهين تون جيڪا هاڻ منھنجي لاءِ مڪمل منھنجي شاعري ٿي پئي آهين دل ۽ دماغ سان ڳنڍجي وڃڻ جو رشتو صرف ئي صرف منھنجو توساڻ ئي ته آهي پنھنجو پاڻ مان وڃائجي وڃڻ کانپوءِ مون هيل تائين رڳو توکي ئي ڳولھيو آهي دل جي هٿن مان ڪري پيل ماڻھو کي ٻيھر کڻي پاڻ ڏي وٺي اچڻ ڪيڏو نه مشڪل ھوندو آھي اهو صرف آئون ئي ڄاڻي ٿو سگھان مون پنھنجا نظم تنھنجن نيڻن جي حوالي ڪري ڇڏيا آهن هاڻ آئون توکي پنھنجن نظمن ۾ ئي ڏسڻ لڳندو آهيان سچ پڇين ته منھنجا نظم ھوبھو تنھنجي ئي اکين جھڙا آهن جن ۾ مونکي تون صاف نظر ايندين آهين مون ڪڏهن به توکي پنھنجن نظمن مان ٻاهر ناهي ڪڍيو آسمان جو ستارن سان ڀريل ۽ منھنجي نظمن ۾ مڪمل تنھنجو ئي هجڻ مونکي هڪ جھڙا ئي لڳندا آهن
سمنڊ جي ڀريل اکين جھڙا نظم مونکان سواءِ ٻيو ڪير به توتي لکي نٿو سگھي آئون دل جي دعويٰ سان ٿو چوان ته هي منھنجا نظم هر وقت تنھنجو ئي مطالعو ڪندا رهن ٿا
ضرورت زندگيءَ جو پھريون رستو هوندي آهي مون پنھنجي ضرورتن جي پورائي فقط تنھنجي ئي پيار مان ڪئي آهي هيل مون تو مٿان ڪيترائي ڪتاب لاٿا آهن جن جي هر صفحي تي تنھنجو ئي ذڪر آهي توکان سواءِ ڪا هڪ ٻي سٽ به ان سونھن جي صحيفي تي مون ناهي لاٿي منھنجي ارتقا جو سڄو آسمان تون ئي ته آهين هي منھنجو وجود تنھنجي ئي هجڻ جو هڪ احساس آهي وڃائجي وڃڻ جو ڊپ مونکي صرف تو مان ئي ٿيندو آهي مون منجھان تنھنجو وڃائجي وڃڻ منھنجن نظمن لاءِ هڪ اسيريءَ جي گھڙي جي برابر هوندو آئون نٿو چاهيان ته منھنجا نظم توکان سواءِ اسيريءَ جي اُس ۾ اداس ٿين ۽ آئون غم جي غربت ۾ اچي تنھنجي محبت جي ملڪيت منجھان ئي بيدخل ٿي وڃان آئون نٿو چاهيان ته هن عشق جي اثاثن جي اُجڙي وڃڻ جو درد دل جي بادشاهيءَ جي تخت گاھ تائين کڻي وڃان, ڇو ته بربادي ننڍي هجي يا وڏي پر هوندي ته وري به هاڃيڪار ئي آهي
آئون ڪو به ڏک جھڙو ڏُڪار پاڻ مٿان کڻڻ جي لاءِ تيار ناهيان ان ڪري ئي ته مون پنھنجن نظمن جي نيڻن ۾ تنھنجي ئي اکين جھڙا احساس پوکيا آهن جن منجھان رڳو ئي محبتن جا موتيا ئي مھڪي نڪتا آهن
هيل مون مٿان رڳو تون ئي وٺي آهين
هيل منھنجن نظمن توکانسواءِ ڪنھن ٻي ڏي ڏٺو ئي ناهي
هيل منھنجا نظم مڪمل ٿيڻ لڳا آهن
ان ڪري جو منھنجن نظمن ۽ تنھنجن نيڻن جو رنگ هڪ جھڙو ئي آهي ان ڪري مون پنھنجن نظمن کي تنھنجن ئي نيڻن جو نانءُ ڏئي ڇڏيو آهي
سچ پڇين ته هاڻ مونکي ٻنھي ۾ ڪو به فرق محسوس ناهي ٿيندو
اڄ کانپوءِ مون پنھنجن نظمن تي تنھنجو ئي نالو رکي ڇڏيو آهي تنھن ڪري هاڻ توکي منھنجن نظمن سان ئي گڏجي رهڻو پوندو...
هي منھنجو اٺون ڪتاب منھنجا نظم ۽ تنھنجون اکيون مون آس جي اوجاڳن جي هيٺان وهي لکيو آهي منھنجي هن ڪتاب کي منھنجو محبوب ۽ مخلص دوست محمد شريف منڌرو روپا پبليڪيشن مان ڇپرائي مونکي هڪ وڌيڪ محبت ڀريو احساس بخشيو آهي اهي سندس محبتون زندگيءَ جي زبان تي ھميشه ڳائبيون ئي رهبيون.
سنڌ سلامت ساٿ سلامت
اياز امر شيخ
03347091595