شاعري

منھنجا نظم ۽ تنھنجون اکيون

اياز امر اسان جي دور جو ھڪ باڪمال شاعر آھي. ايازامر عالمي سطح جي شاعري ڪندڙ ۽ فطري ڪائناتي شعور جو مالڪ آهي، اياز محبتن جو امين آهي ۽ سندس لکيل لفظ لفظ ۽ سِٽ سِٽ منفرد حُسن جي مالڪ آهي. هو تاريخ جي ڪفن کي کولي حالتن جو حقيقي چھرو ظاهر ڪرڻ جي سگهہ رکي ٿو. ھو لکي ٿو ”آئون ڪو بہ ڏک جھڙو ڏُڪار پاڻ مٿان کڻڻ جي لاءِ تيار ناهيان، ان ڪري ئي تہ مون پنھنجن نظمن جي نيڻن ۾ تنھنجي ئي اکين جھڙا احساس پوکيا آهن، جن منجهان رڳو محبتن جا موتيا ئي مھڪي نڪتا آهن.

Title Cover of book منھنجا نظم ۽ تنھنجون اکيون

ٻرندي وسامي وياسين...!!!

ٻرندي وسامي وياسين...!!!

ڪھڙا وجود پنھنجا ڪھڙيون بقا جون ڳالھيون
ٻرندي وسامي وياسين جھڙيون فنا جون ڳالھيون
غم جو گلاس ڀريل تڪ ساڻ ئي جو پيون ٿا
ڍُڪ ڍُڪ حياتي پنھنجي بس هارجون پيا ٿا
جيءِ ۾ وڏا جُھڙالا ويھي رڳو وٺاسين
خود ۾ مري وڃڻ جا ئي حادثا ڏٺاسين
تاريخ ڀي طلاقيون پنھنجي وفا جون ڳالھيون
ڪھڙا وجود پنھنجا ڪھڙيون بقا جون ڳالھيون

پنھنجي اڌو اڌيءَ سان سڀ ڪجهه ويو آ اڌ ٿي
خود کي ئي پي وڃڻ لئه ماڻھو ويو آ مڌ ٿي
خالي خمار آهي ڪٿ ڀي نبار ناهي
خود کي کڻي هلڻ جو خود تي ئي بار آهي
هر ڳالهه دل منجھان ئي ٿي آرپار آهي
اُس جو ننگو نياپو سج جي اکين جو اولو
پٽ تان کنئيو نه ڪنھن ڀي پيو آ اُتي ڪلھوڪو
ويو ڪانگ ڦُري اڄ ڀي آ ٻار هٿ مان لولو
ڪھڙيون ڪجن پو ويھي خود لئه دعا جون ڳالھيون
ڪھڙا وجود پنھنجا ڪھڙيون بقا جون ڳالھيون

لھرون لُڏيو لُڏن ٿيون اچيو ڪنڌيءَ لڳن ٿيون
هن سمنڊ جي اکين مان طوفان ٿيو اُٿن ٿيون
وڻ ٽڻ وڄائي پوءِ ڀي جبلن ڏانھن رُخ رکن ٿيون
پنھنجي ئي هوڏ جو بس گھوڙو چڙهي گُھمن ٿيون
توکي سُتي صديون ٿيون جيئري نه جاڳ تنھنجي
ڪٿ ڀي ڏٺي نه ويئي واريل ڪا واڳ تنھنجي
راڙو اُهو ئي آهي ڪاڙهو اُهو ئي آهي
خود کي ڪُھي ڇڏڻ جو لاڙو اُهو ئي آهي
ساھ ۾ سبيل رهن ٿيون هر هڪ صدا جون ڳالھيون
ڪھڙا وجود پنھنجا ڪھڙيون بقا جون ڳالھيون

خود کي زندھ رکڻ جو ڀي ذائقو کپي ٿو
اُڀ مان ٽٽو جو تارو آخر ته ڪو جھپي ٿو
هن کي چئي ڇڏيون ۽ هُن ساڻ هلي ملجي
ڪيڏو رُنا ٻئي آهيون هاڻي ته وهي کلجي
پنھنجي مٽيءَ جو ماڻھو پنھنجن هٿن سان گھڙجي
تلوار جي اکين سان تاريخ ويھي پڙهجي
دل جي درياھ تي بيھي ٻي پار هليو هلجي
ڌرتي ڌُٻڻ نه ٿيندي جي سمنڊ ڌڪي ڇڏجي!؟
اڄ ڇو نه ڪجن ويھي پنھنجي انا جون ڳالھيون
ڪھڙا وجود پنھنجا ڪھڙيون بقا جون ڳالھيون
ٻرندي وسامي وياسين جھڙيون فنا جون ڳالھيون.