اڄ آئون سڄو ڏينھن تنھنجو ئي انتظار ڪندس...
اڄ آئون سڄو ڏينھن تنھنجو ئي انتظار ڪندس
سج جي لھي وڃڻ کان وٺي
سج جي اڀري اچڻ تائين
سمنڊ ۾ غرق ٿيل ٻيڙن کان وٺي
اميد جي آخري ڳولا تائين
مونکي صرف تنھنجو ئي انتظار ڪرڻو آهي
آسمان مان پٽ تي ڪرندڙ ستارن کان وٺي
ڌرتيءَ کي ڌوڏي ڇڏيندڙ زلزلن تائين
پکين جي اکين ۾ آيل ڳوڙهن کان وٺي
وڍجي ويل وڻن جي واڪن تائين
مونکي صرف تنھنجو ئي انتظار ڪرڻو آهي
هڪ درياھ جي سُڪي وڃڻ کان وٺي
ٻي درياھ جي وهي اچڻ تائين
هڪ ڇوڪري جي جوان ٿيڻ کان وٺي
هڪ عورت جي پرڻجي وڃڻ تائين
هڪ ٻار جي ڄمڻ کان وٺي
هڪ مرد جي مري وڃڻ تائين
مونکي مسلسل تنھنجو ئي انتظار ڪرڻو آهي
آئون پنھنجي اداسين جو اڪيلو وارث هوندي به
تنھنجي انتظار ۾ ڪڏهن به اداس ناهيان ٿيو
منھنجي لاءِ
ضرورت جو پھريون ضد تون ئي ته آهين
دل کي دلاسا ڏئي زندگي گذارڻ جو فن
صرف مونکي ئي اچي ٿو
تون منھنجي پيار جي پھرين تاريخ جو چنڊ آهين
جنھن کي صرف آئون ئي ڏسڻ ٿو چاهيان
هي منھنجو انتظار تنھنجي اچڻ تائين
اوجاڳيل ئي رهندو
ڇو ته هاڻ مونکي صرف تنھنجو ئي انتظار ڪرڻو آهي
برسات جي بھي رهڻ کان وٺي
بادلن جي موٽي وڃڻ تائين
هن دنيا جي ٺھڻ ۽ ڊهڻ کان وٺي
خدا ۽ ماڻھو جو هڪ ٻي سان ملي وڃڻ تائين
آئون تنھنجي ئي انتظار ۾ رهندس
انتظار جيڪو مونکي اکيون به پورڻ نٿو ڏي
رات ۽ ڏينھن
منھنجي حالتن اڳيان هڪ جھڙا ئي آهن
مرڻ ۽ جيئڻ
مون تنھنجي انتظار جي اڳيان بھاري ڇڏيو آهي
هاڻ آئون تنھنجي انتظار کي
ڪڏهن به اڪيلو نه ڇڏيندس
انتظار جنھن اڄ ڏينھن تائين اک به ناهي ڇنڀي
انتظار جيڪو ھوبھو تو جھڙو ئي آهي
هاڻ آئون صرف تنھنجي لاءِ ئي جيئندو رهندس
هاڻ آئون صرف تنھنجي لاءِ ئي مرندو رهندس.