(صفت رسولي) ڪانگ قاصد
لاٿئين لِکَ ۾ اچي، انتظار منھنجو.
ڪيڏو ڪانگ ڪيو مون تي ٿورو ٿڌو،
آيو خاص کڻي سنيھو سڄڻ سندو،
ڇا بدلو ڏيئي، لاهي بار بندو،
ڪڍي ڪوري ڏيان، هي ڪپار منھنجو،
آيو عرب سندو سو تہ ڏيھہ ڏسي،
پکي پرين کي، آيو پاڻ پسي،
ڪريان ڪانگ مٿان، صدقو ساھہ سسي،
گهوري گهوري ڏيان، هي گهر ٻار منھنجو.
ويجهو وڻ مٿان آيو چوٽ چڙهي،
اوڏو اڱڻ اڳيان، ويٺو لام لڙي.
کولي خوشي منجهان ڏنئين پرزو پڙهي،
وٺندي وهسي ويو، وار وار منھنجو.
چڱي چھنب سدا ”گل“ چوري چيئون،
ڳالھيون ڳارا ڏيئي، قرب واريون ڪيون،
سڻي سرهي ٿيس، اديون اچڻ سنڌيون،
اڄ ايندو سيد سردار منھنجو.