سنڌيڪا سنڌي گرامر

ٻارو! اوهان پڙهي آيا آهيو ته صفت اهو لفظ آهي جيڪو جملي ۾ اسم جو گڻ، اوگڻ، انداز، مقدار ۽ قسم ڏيکاري. هاڻي اچو ته، صفت جي قسمن کي سمجھون. صفت جا ٽي قسم آهن.

1- صفت وصفي،
2- صفت عددي،
3- صفت ضميري.

1- صفت وصفي:
جملي ۾ اهڙن لفظن جي صفت وصفي ٿيندي، جيڪي اسم ۽ ضمير جو گڻ، اوگڻ، قسم ۽ قد ڏيکارين.

مثال:
بندرو ڇوڪر
سلڇڻو ڇوڪر
کٽو ٻير
ساکرو ماڻھو
مٿين جملن ۾ ‘بندرو’ قد ڏيکاري ٿو، ‘سلڇڻو’ گڻ ڏيکاري ٿو. ‘کَٿو’ اوگڻ ڏيکاري ٿو ۽ ‘ساکرو’ قسم ڏيکاري ٿو. هي لفظ صفت وصفي آهن. هن جا ٻيا لفظ هي آهن. ڊگهو، ڪوجھو، سهڻو، چست، جابلو ، هوشيار، ايراني، موڳو، سرحدي وغيره.

2- صفت عددي:
اهي لفظ جيڪي جملي ۾ اسم ۽ ضمير جو انداز،ڳاڻاٽو يا عدد ظاهر ڪن.

مثال:
پنج پينون، يارهن پٽيون، پندرهن صوف ٻاويهون ڇوڪر، ٽيهون گھوڙو.
پنج-يارهن-پندرهن-ٻاويھون-ٽيھون-صفت عددي آهن. هن جا ٻيا لفظ هي آهن.
ٽي-هزار-ايڪونجاهه-سترهون-پنجويهون وغيره

3- صفت ضميري:
اهڙا ضميري لفظ، جيڪي جملي ۾ صفت ٿي ڪم اچن. هي لفظ هميشه اسم سان گڏ هوندا آهن.

مثال:
ٿورا پئسا کڻ.
ڪهڙو ماڻھو هو.
ڪا ڳالهه ته ٻڌاءِ.
پنهنجو ماڻهو آهي.
هنن جملن ۾ ٿورا، ڪھڙو-ڪا-پنهنجو صفت ضميري آهن. جيڪي پئسا، ماڻهو، ڳالهه، اسمن جي صفت ڪن ٿيون. هن جا ٻيا لفظ هي آهن.
سو- جو-جيڪو-اهڙو-وغيره