هڪڙو نقطو
سائين سنڌو ديش ٿو ٺاهي، هن جو هڪڙو نقطو آ
اخبارن کي لکيان ڪونه ڀل لکن هو ڇاجو ڇا
اخبارن مان اردوءَ وارا
غلط لکن سڄا سارا
خالي پلي ڪن مونجھارا
سنڌي تن کان ٿيا خفا
سائين سنڌو ديش...
ڪيئي ڪاميٽيون هت ٺهيون
ڪيئي ڪاميٽيون هت ڊهيون
دنڌو ديش سواءِ نه هريون
ٻيا سڀ نقطا آيا ويا
سائين سنڌو ديش...
هرهڪ چوندو سنڌي سياڻو
سائين ڪڏهن ڪونه وڪاڻو
سنڌ اندر آ پهريون ماڻهو
جنهن ڪئي سنڌڙي ساڻ وفا
سائين سنڌو ديش...
هن وٽ آيا ڪيئي شاھ
پاڪستان جا ڪيئي جناح
پنجابن جا خيرخواھ
چاهي سن اچي ڪو ضياء
سائين سنڌو ديش...
سائين ڪالھ اڪيلو هو
اڄ سنڌڙيءَ جو سرواڻ ٿيو
سنڌين سنڌو ديش چيو
هت ”ارڏن” کان اعلان ٿيا
سائين سنڌو ديش...