اداري پاران: نُور سائينءَ جون ڪهاڻيون
سائين نُور گهلو هڪڙو عام نه پر پختو ۽ سينئر ڪهاڻيڪار آهي، هُن کي خوب خبر آهي ته پڙهندڙ جي ذهن جي چيچ کي ڪيئن پنهنجي ڪهاڻيءَ جي هٿ ۾ سوگهو ڪبو ۽ کيس پاڻ سان گڏ ڪهاڻيءَ جو ڳوٺڙو يا شهر ڪيئن گهمائبو.
اسان جي سائين نُور گهلو وٽ ڪهاڻيءَ جو اسلوب ئي پنهنجو ۽ الڳ آهي. پهرين ڳالهه ته هُن تي ڪنهن ٻئي ڪهاڻيڪار جي ڇاپ ڪانهي، هُو ڇاپن کان آجو ڪهاڻيڪار آهي. جنهن وٽ ٻولي توڙي پلاٽ ۽ ڪهاڻيءَ جي اُڻتڪاريءَ جو پنهنجو منفرد ۽ نجو رنگ آهي ۽ ٻيو اُن کان علاوه اعليٰ ڳالهه اها ته هُن جو اسلوب عام فهم ۽ سادو آهي، توڙي جو هُن جي ڪهاڻيءَ ۾ انگريزي لفظن جو استعمال به ملي ٿو پر سي به اهڙا جيڪي اڄڪلهه اسان جي معاشري ۾ عام آهن. انهن ئي ڳالهين جي ڪري نُور سائينءَ جي ڪهاڻيءَ ۾ ڪيل ڳالهه يا پيغام کي ڪنسِيوِ ڪرڻ سولو آهي. ماڻهو ڪوبه ڪم ڪري ٿو ته ڪوشش هوندي آهي ته نتيجي تي ضرور پهچي ۽ اسان جي نُور سائينءَ جي ڪهاڻين جي اها خاص خوبي آهي ته هُو پنهنجي پڙهندڙ کي ڪهاڻيءَ جي ان نتيجي تائين ضرور پهچائي ٿو، جيڪو هُو ڪهاڻيءَ جي صورت ۾ ڏيڻ چاهي ٿو يا وٽس ڪهاڻيءَ ۾ جيڪو پيغام يا مقصد آهي، اُهو بخوبي پڙهندڙن جي دلين ۽ ذهنن جي درن جون چانئٺون ٽپي ٿو. اها سندس قلم جي ڪمال سگهه آهي.
’امرتا پبليڪيشن‘ پاران سائين نُور گهلوءَ جو هي ڪهاڻي ڪتاب به اوهان کي يقينن پسند ايندو، ڇو ته هي امرتا جي پسند آهي. اوهان جي دعائن جا طلبگار آهيون ۽ توهان سڀني لاءِ دعاگو آهيون ته جتي هجو سُکيا ۽ آسودا هجو، جُڙيا ۽ سلامت هجو.
نيازمند
فقير محمد ڍول