محبوب خدا مون کي مديني ۾ گھُرائي، ديدار ڪرائي،
شب روز جُدائي ٿي سندم جان جلائي، ديدار ڪرائي.
هي آس اندر ۾ آهي ٿيان اچي حاضر، اي بندهء پرور،
بدڪار کي هن بند مان جلدي تون ڇڏائي، ديدار ڪرائي.
شب روز روئي راھ مديني جي نهاريان، هنجون هجر مان هاريان،
مشتاق کي مولا سِگھو محبوب مِلائي ، ديدار ڪرائي.
ڪج مون تي شفاعت جي نظر آهيان گنهگار، اي سيد ابرار،
’حافظ‘ کي سڪرات جي سختي کان ڇڏائي، ديدار ڪرائي.
*
محمد حافظ شاھ ٽکڙائي
وسين ملوڪ شاھ