سانڍي ڪُجھُه بِه نَه رَکندو آهيان
سڀ ڪجھه مُنهن تي چَوَندو آهيان
هَلِـڻو آ اونداهو رَستو
هَـرَ شَئِه هَـٿَ ۾ رَکندو آهيان
ٻارُ مُئلُ ڪِئَن واپَسِ ايِندو
روزُ ڪَنوَرَ کان پُڇندو آهيان
ٻانگَ ڪُڪُڙُ جي ڏِئي اَويلي
مان ديوَن کان ڊِڄندو آهيان
ڪَنهِن اَڻَ پوُري سُپني وانگُر
لِڪي اَکيُن ۾ وِهندو آهيان
شاهَه سَچَلَ جو بيتُ پُراڻو
وَرَ وَرَ چَپَ سان چُمَندو آهيان
ٿورا باقي موُن وَٽِ سُپنا
اکڙيوُن کولي سُمهَندو آهيان