گيِتُ پيارَ جو ڪِئن ڳايان، کَنگھِه اَچي ٿي
سُرَ ۾ سُرُ ڪيئن مِلايان، کَنگھِه اَچي ٿي
ڳوڙهَن جو قَرضُ اِلاهي آهي موُن تي
روئي يا مُشڪي لاهِيان کَنگھِه اَچي ٿي
قَدَمَ قَدَمَ تي ٽانڊا آهِن ماضيءَ جا
ڦوُڪَ ڏَئي حالُ ٻُڌايان، کَنگھِه اَچي ٿي
عَڪـسَ اِلاهي ذَهَنَ اَندَرِ سانڍيَلَ آهِن
يادِ ڪَري جَنهِن کي ساريان، کَنگھِه اَچي ٿي
ڪِرشنُ موُسيٰ، عيسيٰ، نانِڪُ ۽ توُن مان
ڪَنهِن کي ڏوهي ٺهرايان، کَنگھِه اَچي ٿي
خوابَ ٽُٽَل ڇيِهوُن ڇيِهوُن دِلِ، گُـذَرُ ڪَبو
ڪَنهِن آڏو هَٿُ ڦَهِـلايان، کَنگھِه اَچي ٿي
ڪونَ نِڀائي ڪو بِه سَگھان ڪِردارُ ڪَڏهِن
ڀوُتُ ٺَهي جي ڊيڄاريان، کَنگھِه اَچي ٿي