پِڃِرَنِ جي ڳالهِه نَه آ ڪَمرَنِ ۾ پِڻِ ساهُه مُنجھي
ڪِٿي وَڃي ساهُه کڻان اَڱـڻَن ۾ پِڻِ ساهُه مُنجھي
دِلِ جو سناٽو ڊيڄاريِندَڙ ٿيِندو آهي
اَگر غزل، نَظم پَڙهان، لفظن ۾ پِڻِ ساهُه مُنجھي
اَکِ کوليان ڏاروُن- ڏاروُن ڇيهوُن- ڇيهوُن سَڀُ ڪُجھُه
اَکِ ٻوُٽيان چُڀَن ٿِئي، سُپنن ۾ پِڻِ ساهُه مُنجھي
بي چئني، هِن بي چئنيءَ کي ڪَهِڙو ڏوهُه ڏِجي
وَقتُ ڪَڍي ٿَـڌِڙا، ٿَـڌِڙَن ۾ پِڻِ ساهُه مُنجھي
گِرجا گھَرُ دوُنهون- دوُنهون، مَندَرُ مَسجِد دوُنهون- دوُنهون
بَرپَٽَ، جھَنگلَ، پَربَت، پَٿرَن ۾ پِڻِ ساهُه مُنجھي
تَنها ڪا ڪُنڊَ مِلي جِتِ ويهي ساهي پَٽِجي
جي اُڏِران اُڀَ ۾، ڪَڪَرَن ۾ پِڻِ ساهُه مُنجھي
دُنيا ڪورو سُپنو ڪِئَن مَڃان اِهو سَچُ آهي
شرڌالُن جي وَچَ ۾ سِمرَنَ ۾ پِڻِ ساهُه مُنجھي