هِنَ کي هُنَ کي خود کي رکبو شَڪَ جي گھيري ۾
هَـرَ ڪَنهِنکي ڏوهاري چَئِبو شَڪَ جي گھيري ۾
پيارُ ڪَري ڪيڏانهُن هَليو وِيو ڳولهِيان آخِر ڪِئَن
ذرو ذرو هورِيان چُمِبو شَڪَ جي گھيري ۾
ڪَهِڙو سُپنو سَچُ ٿي پَوَندو مُشڪِل آ سَمجھَڻُ
هَر هِڪُ سُپنو مُٺِ ۾ جھَلِبو شَڪَ جي گھيري ۾
ڪو ڳوڙهو، ڪا چيِخَ هِتي شايَد جيِئري نِڪري
هَرَ ماڻهوءَ جو آهي مَلبو شَڪَ جي گھيري ۾
توُن ڪابعي ڪاشيءَ ۾ آهيِن اَهِڙي آ اُفواه
پَـٿَـرُ پَـٿَـرُ سِـرَ سان ڀَـڃِـبو شَڪَ جي گھيري ۾