نعرو ڪو هٿيار نه آهي
پوءِ به اُن سان ڪائي تُنهنجي
دل کي ڄڻ تسڪين ملي ٿي.
زندان جون ديوارون تو لئه
روز اڳي کان اوچيون، ليڪن
نعري لئه ديوار نه آهي،
روز ٽَپِي ديوار وڃي ٿو
ڄن ته پراهين پار وڃي ٿو؛
ها، پر هاڻي تنهجا نعرا
توکان پهريدارَ کَسِن ٿا
توکي گونگو گَسُّ ڏَسِن ٿا؛
سڀئي هاڻي اِيئن سوچِن ٿا،
”نعري مان ڇا ملڻو آهي؟
”نعرو ڪائي گولي ناهي،
”ها دشمن تي وارُ ته آهي،
”نعرو پر هٿيارُ نه آهي
”اُن جي ڇيڙي تي اَڄُ ڪوئي
”آزاديءَ جو پارُ نه آهي“
ساري ديس ڇَڏي سڀ نعرا
چُپِّ چَپن تي لاتي آهي
اندر جهاتي پاتي آهي.