آزاديءَ لئه روز مرن ٿا
ماڻهوئڙا!.
ايشيا يا آفريڪا آهي،
لاطيني آمريڪا آهي،
مرندي تائين ڪونه ڏرن ٿا،
ماڻهوئڙا!.
آخر هي آزاد ته ٿيندا
پر ڇا هي جلاد نه ٿيندا؟
ڪَنڌَ اَڏيءَ تي روز ڌَرن ٿا،
ماڻهوئڙا!.
ڪلهه جن آزادي ٿي چاهي
ٺاهن ٿا ٻئي ڪنهن لئي ڦاهي
فاتح ٿي جنهن وقت وَرن ٿا
ماڻهوئڙا!.
واءِ! اُهائي ڪارِ ڪَرن ٿا
ماڻهوئڙا!.
جنهن مان جِندُ ڇڏائڻ خاطر
روز مرن ٿا
ماڻهوئڙا!.
ويريءَ جا جنهن وقت اَڏيءَ تي
ڪنڌَ ڌرَن ٿا
ماڻهوئڙا!.
واءِ، اُهائي ڪار ڪَرن ٿا
ماڻهوئڙا!.
ماڻهوئڙا!.
او ماڻهوئڙا!.
او ماڻهوئڙا!.