هو سڀ آڌيءَ رات اچن ٿا،
مُگرمانَ تي ناچُ نَچن ٿا.
مُگرمانَ جي چمڙي هيٺان
تن جون ڪيئي پيڙهيون آهن،
هڪٻئي پويان سيڙهيون آهن
تن تي گڏجي هيٺ لهن ٿا،
دودي تائين، ٻاگهيءَ تائين-
ڪُنڊ ڪُنڊ ۾ دِيپَ جَلن ٿا،
مُگرمانَ تي ناچُ نَچن ٿا.
جيڪي ڪالهه انهيءَ ڌرتيءَ تي
ماريا ويا ها، سي به اُٿن ٿا،
۽ پوءِ پنهنجي پيرَن هيٺان
لاشُ چنيسرَ جو چيڀاٽي
ڇاتي کولي، اوچي ڳاٽي
ڏاڪولن سان ٺڪ ٺڪ ڪن ٿا
مُگرمانَ تي ناچُ نچن ٿا.