سفر جون تياريون
• گورنمينٽ جو پاسپورٽ
• 6 ملين (60 لک) جو ضمانتي بانڊ
• حيدرآباد بورڊ مان ميٽرڪ ۽ انٽرميڊيٽ جي سرٽيفڪيٽن جي تصديق
• آئي بي سي سي ڪراچيءَ مان ميٽرڪ ۽ انٽرميڊيٽ جي سرٽيفڪيٽن جي تصديق
• B.E ۽M.E جي ڊگريءَ جي يونيورسٽيءَ مان تصديق
• B.E ۽M.E جي ڊگريءَ جي HEC مان تصديق
• B.E ۽M.E جي ڊگريءَ جي پرڏيھي معاملن واري وزارت(MOFA) کان تصديق
• پوليس ڪليئرنس سرٽيفڪيٽ
• ميڊيڪل سرٽيفڪيٽ
اسين سڀ پنھنجي سسٽم کان واقف آهيون، انھيءَ ڪري بغير ڪوششن، وقت ۽ گڏوگڏ خواريءَ جي، هڪڙو بہ سرٽيفڪيٽ حاصل ڪرڻ سوَلو ڪونہ هو. سرڪاري پاسپورٽ جاري ڪرڻ لاءِ يونيورسٽيءَ مان نو آبجيڪشن سرٽيفڪيٽ (NOC) جي ضرورت کان وٺي، آئي بي سي سي ڪراچيءَ مان ميٽرڪ ۽ انٽرميڊيٽ سرٽيفڪيٽن جي تصديق، B.E ۽ M.E ڊگريءَ جي MOFA کان تصديق تائين سڀ ڪجهہ سولو نہ ھيو، پر وري سڀ کان وڌيڪ پريشان HEC جي ضمانتي (شوئرٽي) بانڊ ڪيو. جنھن ۾ نہ صرف اهو بانڊ شامل هو، پر اثاثن جو پڌرو ڪرڻ، روينيو ڊپارٽمنٽ طرفان اثاثن جي تصديق، گارنٽي ڏيندڙ ۽ شاهد شامل هيا. يونيورسٽيءَ جا دستاويز بہ پورا ڪرڻ تمام ڏکيو ڪم ھو، ڇاڪاڻ تہ ان ۾ بہ شوئرٽي بانڊ کان وٺي گورنر هائوس کان ٻاھر وڃڻ جي NOC وٺڻ شامل ھئا. سڀئي ڪاغذ پورا ڪرڻ کان پوءِ، مون کي HEC طرفان ويزا جاري ڪرڻ جي لاءِ فائنل ايوارڊ لسٽ ۽ گورنر هائوس طرفان ٻاهرين سفر لاءِ NOC ڏني وئي. ايتري ڊگهي ۽ مشڪل پروسيس دوران منھنجو ٻاھر وڃڻ جو جوش تقريبن ختم ٿي ويو هو. مٿان وري ڪوريا جي سفارتخاني جي بہ ڊگهي لسٽ ھئي، جنھن ۾ پوري ميڊيڪل رپورٽ ۽ پوليو سرٽيفڪيٽ پڻ شامل ھئا. پوليو وارن تہ سرٽيفڪيٽ ڏيڻ کان اڳ ڦڙا بہ پياريا، پر ٻاھر وڃڻ جو جنون تڏھن ٻيھر شروع ٿي ويو، جڏهن مون کي ڪوريا جو ويزا جاري ڪيو ويو. ويزا لاءِ درخواست سان گڏ گهربل دستاويزات مان اڳ ۾ ئي پنھنجي سؤٽ عبدالرشيد سومرو سان گڏ جمع ڪرائي آيو ھيس. ھڪ ھفتي کان پوءِ سفارتخاني مان فون آيو تہ پنھنجو پاسپورٽ کڻي وڃو. سفارتخاني وارا اھو نہ ٻڌائيندا آھن تہ ويزا لڳو يا نه. بھرحال مون کي اهو ڏينھن ياد آهي، جڏهن مان پنھنجي مائٽن ڊاڪٽر احسان احمد سومرو ۽ جنيد احمد سومرو سان گڏجي ڪراچيءَ ۾ ڪوريا جي سفارتخاني مان ويزا وٺڻ لاءِ ويو ھئس. دل ڏاڍي پريشان ھئي؛ جڏھن آئون سفارتخاني جي ڪائونٽر تي پھتس تہ ڪجهہ ماڻھو مون کان اڳ پھتل ھيا. منھنجي پريشاني ان مھل وڌيڪ وڌي وئي، جنھن مھل ڏٺم تہ ڪافي ماڻھن کي پاسپورٽ بغير ويزا جي واپس ڪيا پيا وڃن. نيٺ منھنجو وارو بہ آيو. مون کان ڪائونٽر تي ويٺل ليڊي رسيد ورتي ۽ اندر ھلي وئي. ڪجهہ دير کان پوءِ واپس آئي ۽ مون کي پاسپورٽ واپس ڏنائين. مان پاسپورٽ وٺي ھڪ پاسي ٿي پاسپورٽ جي پنن تي ويزا ڳولھڻ لڳم... نيٺ ھڪ پني تي ويزا نظر اچي ويو، پر ويزا تي منھنجو نالو غلط لکيل ھو. وري نئين پريشاني... نيٺ اھا غلطي بہ صحيح ڪرايم. سفارتخاني کان ويزا حاصل ڪرڻ بعد سنگت کي ڏيکاريم، تہ سنگت ٽريٽ جو چيو. منجهند جو وقت ھو ۽ بک بہ سٺي لڳي ھئي سو اسان ڊفينس جي هڪ مشھور ريسٽورنٽ ۾ نھاري ۽ ڪبابن سان گڏ ماني کاڌي. مانجهاندي دوران آئون ويزا کي بار بار ڏسي رهيو هيس تہ مان ٻاهر وڃي رهيو آهيان. 17 جنوري 2016ع تي مون ويزا حاصل ڪئي ۽ 26 فيبروري 2016ع تي ٿائي ايئر THAI AIR ۾ وايا بئنڪاڪ Bangkok ڏکڻ ڪوريا جي ٽڪيٽ ڪرائي. انھن ڏينھن ۾ آئون ڏاڍو خوش هيس، پوءِ نيٺ مون خريداري شروع ڪئي، جنھن ۾ ڪپڙا جھڙوڪ پينٽون، شرٽون، جيڪٽون ۽ بوٽ شامل ھيا. دوستن طرفان ٻڌايو ويو تہ چانھ جي پتي ۽ مصالحا جيترا ٿي سگهن کڻي اچجان. تنھن ڪري مون پنھنجو بيگ ڪپڙن ۽ مصالحن سان سٿي ساڻ کنيو.