شاعري

ڏاتِ ڏِيئا ٻاريا

هي ڪتاب ڏات ڏيئا ٻاريا لاڙڪاڻي جي 14 شاعرن جي ڪوتائن جو مجموعو آهي، جنهن جو مرتب رياضت ٻرڙو آهي. ڪتاب ۾ سعيـد ميمـڻ، جـواد جعفــري، مختيار سمـون، احسـان دانـــش، روبيـنه ابــڙو، عادل عباسـي، فـياض لـطـيـف، رضـا بـخـــاري، حـبـدار سولنگـي، ساجــد سنـڌي، رضـــوان گـل، ابـرار ابڙو، اقبال کـوکـر ۽ رياضـت ٻــرڙو جي شاعري شامل آهي۔
  • 4.5/5.0
  • 4091
  • 851
  • آخري ڀيرو اپڊيٽ ٿيو:
  • رياضت ٻرڙو
  • ڇاپو پھريون
Title Cover of book ڏاتِ ڏِيئا ٻاريا

آزاد نظم

آزاد نظم

”سنڌ مٺڙي ماءُ آهي“

درد جو درياءُ آهي
سنڌ گهرو گهاءُ آهي
جو جنونيءَ، انقلابيءَ
جي سچي سپني جيان مهڪي رهيو آ،
سنڌ هڪڙو روح آهي
جو، خدا جي خيال وانگر
ڄڻ ازل کان
جاڳ جي ويراڳ ۾ آ،
ڪنهن سچي ڀڪشوءَ جي
جيئن ڀاڳ ۾ آ بيقراري
ايئن اڄڪلهه ٿي پئي آ سنڌ ساري!
سنڌ هڪڙو آ صحيفو
جنهن جي هر هڪ ورق تي ڪيئي مُقدس
مامَ، معنى ۽ محبت جا سبقَ هِن!
سنڌ دل جي ڪُنڊ آهي
جنهن ۾ خوابن جا ٽُٽل ٽُڪرا پيا هِن
سونهن جا سُڏڪا پيا هِن.
سنڌ صوفيءَ جو نرالو نينهن آهي
جنهن اندر
سارن جهانن جي اُداسي
رقص ۾ آ!
سنڌ باغي عشق جي
آتم ڪٿا آ،
سنڌ ڪنهن معصوم ۽ مظلوم جي
دل جي دعا آ!
سنڌ مٺڙي ماءُ آهي
جنهن جي هر هڪ سَڏ ۾
ڪئين جُڳن جي درد جو پڙلاءُ آهي.

