ديوارون
حڪمران، نہ فقط سچ چوڻ پر سچ ٻُڌڻ تي بہ پابندي لڳائي ڇڏي.
سچ تي پابندي لڳي تہ گامون تپي باھہ ٿي ويو.
چيائين، ”مان اظھار جي آزاديءَ لاءِ تحريڪ هلائيندس!“
مان ڊڄي ويس.
چيومانس، ”آهستي ڳالھاءِ ديوان کي بہ ڪَنَ هوندا آهن!“
ڏاڍيان چيائين، ”مان سڀني ماڻھن کي ٻُڌائيندس تہ اظھار جي آزادي انھن جو بنيادي انساني حق آهي!“
اهو چئي هو اٿي هليو ويو.
هن اظھار جي آزاديءَ لاءِ تحريڪ هلائڻ جي ڪوشش ڪئي پر سندس تحريڪ ناڪام ٿي وئي.
هو واپس موٽي آيو.
پڇيومانس، ”تنھنجي تحريڪ ناڪام ڇو وئي؟“
گامونءَ ڏُک سان چيو، ”اڳي ديوارن کي ڪَنَ هوندا هئا، هاڻي ماڻھن ڪَنن ۾ ديوارون ٺھرائي ڇڏيون آهن!“