دشمنن جي شھر ۾
گامون سچ ڳالھائيندو رهيو.
شھر ۾ سندس دشمنن جو تعداد وڌندو رهيو.
کيس چيم، ”سچ ڳالھائڻ ڇڏي ڏي، نہ تہ مارجي ويندين!“
چيائين، ”مان سچ ڳالھائڻ ڇڏي ڏيندس تہ مري ويندس!“
چيومانس، ”تہ پوءِ ڪنھن ٻئي شھر وڃي سچ ڳالھاءِ. هن شھر جا سڀ ماڻھو تنھنجا دشمن ٿي چڪا آهن!“
گامون پنھنجي شھر مان لڏي ٻئي شھر هليو ويو.
ڪجهہ عرصي کان پوءِ هو واپس موٽي آيو.
پڇيومانس، ”واپس ڇو موٽي آئين؟“
گامونءَ وراڻيو، ”جنھن شھر ۾ لائبريري، باغ ۽ راندين جو ميدان نہ هجي، انھيءَ ۾ رهڻ کان دشمنن جي شھر ۾ رهڻ وڌيڪ بھتر آهي!“