Micro Fiction
زندگي
چيائين، ”گهڻو نہ لِک، ٿڪجي پوندين.“
وراڻيم، ”روز نہ لکندس تہ، ساھ ڪيئن کڻندس!“
O
بک
ڳورهاري عورت
پنھنجي اڻ ڄاول ٻار جا ڪپڙا
وڪرو ڪري ڇڏيا!
O
مصور
چيائين، ”آهين تہ مصور پر ڪم مالھيءَ وارو پيو ڪرين!“
وراڻيم، ”دنيا ۾ مالھيءَ کان وڏو مصور ڪوبہ ناهي.“
O
وقت
چيم، ”تون پراڻي گيت جھڙي خوبصورت آهين.“
ٽھڪ ڏئي چيائين، ”نہ مان گراموفون واري دور جي ناهيان!“
O
لاڪ ڊائون
پيءُ جو آخري سگريٽ پُٽ چورائي ويو.
O
پنھنجي ٻَني
پڇيائين، ”تون سڀ ڪھاڻيون فقط سنڌيءَ ۾ ڇو ٿو لکين؟“
وراڻيم، ”مان پاڻي پنھنجي ٻنيءَ کي ڏيڻ ٿو چاهيان.“