گلابن جي سڳنڌ جهڙو شاعر
سپنو سپنو هوندو آهي، سپنو ساڀيان ٿيندو ناهي
هي سٽون شاعري جي شروعاتي دؤر ۾ سرجيون هيم! اڄ احساس ٿئي ٿو ته، سوچون، حالات، خيال هڪ جھڙا نٿا رهن، اهي وقت به وقت بدلبا رهبا آهن. چوڻ جو مقصد اهو ته انسان جا سپنا ساڀيان ماڻين ٿا! جيڪر همت ۽ حوصلي سان ڪجهه ڪري ڏيکارڻ جو جذبو جوان هجي ۽ اڳتي وڌڻ لاءِ احساس جاويدان هجي! سو غزل جي انهن ٻن سٽن جي نفي ٿئي ٿي. سال 2017ع ۾ اسان جي اداري احساس جي بنياد تي عمل پيرا ٿي اوکن پيچرن تي وکون رکندي سينئر مزاحمتي شاعر سائين عبدالحڪيم “ارشد” جو سنڌي اردو غزلن جو ڪتاب “آواز اندر جو” پبلش ڪيو ان ڪتاب کي وڏي پذيرائي ملي، پڙهندڙن جي دلين ۾ جايون مليون ۽ اسان کي وري ڪم ڪرڻ جو اتساهه مليو. خان محمد “خاطي” شاعريءَ جي ميدان ۾ ڪو نئون نالو ناهي. سندس اڳ ۾ شاعريءَ جا ٽي ڪتاب “سهڻا گل ٽڙيا” “گلابن جي غلاميءَ ۾” “سرهاڻ مديني” پبلش ٿي چڪا آهن. ان سان گڏ سندس ذاتي اداري “چنڊ پبليڪيشن چودڳي” پاران سلسليوار رسالي“چنڊ” جا ست شمارا به ڇپيا آهن. سندس ڪتابن پڙهندڙن جي ذهن تي مثبت اثر ڇڏيو آهي. خاطي بنيادي طور رومانس جو شاعر آهي، اهو رومانس ٻنهي جهانن جي سردارﷺ جي ذات بابرڪات سان هجي، ڌرتي سان هجي توڙي محبوبه سان. ان هر جاءِ تي ان پيار کي اڇو اجرو رکيو آهي. هو احساسن جا عڪس ڀلي انداز ۾ چٽي ٿو، سندس عڪسي شاعريءَ ۾ داخلي توڙي خارجي احساسن جون تصويرون ڏاڍيون من موهيندڙ آهن. پيار پريت، قرب ۽ ڪهل، سڪ ۽ ڇڪ سان گڏ دک ۽ درد جي ڪهاڻي پڻ سندس شاعريءَ جا موضوع آهن. نفرت، ڌڪار، ڪروڌ ۽ ڪاوڙ، پٽ ۽ پاراتا ان جي احساسن کان ڪوهين ڏور آهن. اسين سندس شاعريءَ جو چوٿون مجموعو “ريجهايو روح رابيلن” کڻي حاضر ٿيا آهيون انهيءَ اميد سان ته سٺو ادب پڙهندڙن کي اسان جي هيءَ ڪاوش ضرور پسند ايندي. “خورشيد خضر علمي ادبي ۽ اشاعتي ادارو” خان محمد خاطي جي نج ۽ خوبصورت احساسن کي پبلش ڪري انتهائي خوشي محسوس ڪري ڪري رهيا آهيون.