محبت ۾ هڪٻئي جا راڻا هجون ٻئي،
۽ هڪٻئي جي ڳل جا ڳانا هجون ٻئي.
جيڏا نه وارَ تنهنجا گھاٽا اٿئي پرين،
ايڏائي پاڻ ۾ پڻ گھاٽا هجون ٻئي.
ڪپڙي اُڻيل اندر جئن ڌاڳن جو ربط آ،
اي ڪاش ان اڻت جا ڌاڳا هجون ٻئي.
ٻٻرن جي وچ ۾ جئن ڪو ٽالهي جو وڻ هجي،
تيئن ئي پريِميُن ۾، ساوا هجون ٻئي.
هرپل هميشه جت ڪت گڏ گڏ هجون پرين،
اي ڪاش هڪٻئي جي آشا هجون ٻئي.
خاموشي ساز ٿي پئي منزل ملي اها،
خود ماٺ هوندي ليڪن واڄا هجون ٻئي.
سچ جي سڪار خاطر سر گھورَ ٿي پئون،
“خاطي” سڌا سٻاجھا سادا هجون ٻئي.